പുനലൂര്: അമിതഭാരവുമായി പോകുകയായിരുന്ന ലോറിയില് നിന്നും കയര്പൊട്ടി കൂറ്റന് തടികള് പിന്നാലെ വന്ന കാറിന് മുകളില് വീണ് യാത്രക്കാരന് തലനാരിഴയ്ക്ക് രക്ഷപ്പെട്ടു. മൂവാറ്റുപുഴ റോഡിലെ ഉതിമൂട് പിഐപി നീര്പ്പാലത്തില് വെച്ചുണ്ടായ അപകടത്തില് ഒരു കാറിന് കനത്ത നാശനഷ്ടം സംഭവിച്ചു.
അമിതമായി റബര് തടികള് കയറ്റി പെരുമ്പാവൂരിലേക്ക് പോവുകയായിരുന്ന ലോറി, ഉയരം കുറഞ്ഞ നീര്പ്പാലത്തില് തട്ടിയതിനെത്തുടര്ന്നാണ് അപകടമുണ്ടായത്. പാലത്തില് തട്ടി തടികള് കെട്ടിയിരുന്ന കയര് പൊട്ടുകയും, തൊട്ടുപിന്നാലെ വരികയായിരുന്ന കാറിന് മുകളിലേക്ക് തടികള് പതിക്കുകയുമായിരുന്നു. പഴവങ്ങാടി പഞ്ചായത്ത് മുന് പ്രസിഡന്റ് ഏബ്രഹാം തോമസിന്റെ മകന് നിഫിനായിരുന്നു കാര് ഓടിച്ചിരുന്നത്. തലനാരിഴയ്ക്ക് യാത്രക്കാരന് രക്ഷപ്പെട്ടത്.
തടികള് വീഴുന്നത് കണ്ട് കാര് പെട്ടെന്ന് വെട്ടിച്ചുമാറ്റിയതിനാല് നിഫിന് പരിക്കേല്ക്കാതെ അത്ഭുതകരമായി രക്ഷപ്പെട്ടു. തടിവീണ് കാറിന്റെ മുന്വശത്തെ ചില്ല്, ബോണറ്റ്, ഹെഡ്ലൈറ്റ് എന്നിവ തകര്ന്നിട്ടുണ്ട്. മോട്ടോര് വാഹന വകുപ്പ് ലോറി ഉടമയ്ക്ക് അനധികൃതമായി അമിതഭാരം കയറ്റിയതിന് 32,000 രൂപ പിഴ ചുമത്തി. ഈ നീര്പ്പാലത്തില് തട്ടി തടികള് റോഡിലേക്ക് വീഴുന്ന സംഭവങ്ങള് മുന്പും ഉണ്ടായിട്ടുണ്ട്.
