ഒരു ജീവിതകാലം മുഴുവന് ഒരുമിച്ച് ജീവിക്കാമെന്ന വാഗ്ദാനം നല്കുന്ന വിവാഹമെന്ന കരാറിന് ഇന്നിപ്പോള് പുതുതലമുറ നല്കുന്ന അര്ത്ഥതലങ്ങള് ശരിക്കും അമ്പരപ്പിക്കുന്നതാണ്. പലപ്പോഴും കുറെയധികം ചടങ്ങുകളും ഫോട്ടോഷൂട്ടുകളും ഒക്കെയായി വെറുതെ ‘ഷോ ഓഫ്’ കാണിക്കാനുള്ള ഒരു വേദി മാത്രമായി വിവാഹം മാറിക്കൊണ്ടിരിക്കുന്നു. അതുകൊണ്ടു തന്നെയാണ് ഒരു വര്ഷത്തിനകം പരസ്പരം മടുത്ത് വിവാഹമോചനക്കേസുമായി ദമ്പതിമാര് കുടുംബക്കോടതികള് കയറിയിറങ്ങുന്നത്. അതിനേക്കാളുപരി വിവാഹമെന്ന കരാറില് ഒപ്പുവച്ചതു കൊണ്ടു മാത്രം ഭര്തൃവീട്ടിലെ പീഡനങ്ങളില് മനംനൊന്ത് ആത്മഹത്യ ചെയ്യുന്ന പെണ്കുട്ടികളുടെ അടുത്തിടെയായി വലിയ തോതില് എണ്ണം വര്ദ്ധിക്കുന്നു എന്നതാണ് ഇതിലെ ഏറ്റവും ഖേദകരമായ ഒരു സത്യം.
ഇത്തരം വാര്ത്തകള് ക്രമാതീതമായി കൂടുന്നതിനിടെ ഇപ്പോഴിതാ ഇന്ത്യൻ പുരുഷന്മാരെ വിവാഹം കഴിക്കരുതെന്ന വിവാദപ്രസ്താവന നടത്തുകയാണ് റിലേഷൻഷിപ്പ് പരിശീലക ചേതന ചക്രവർത്തി. നിങ്ങൾ ദയവു ചെയ്ത് ഇന്ത്യയിലെ പുരുഷന്മാരെ വിവാഹം കഴിക്കുകയോ അവരുമായി ഡേറ്റിങ്ങിൽ ഏർപ്പെടുകയോ അരുതെന്നും അതിലും ഭേദം ഒറ്റയ്ക്കു ജീവിക്കുന്നതാണെന്നുമാണ് ചേതന വീഡിയോയില് പറയുന്നത്. ഭോപ്പാലിൽ നടി ട്വിഷ ശർമ ഭർതൃഗൃഹത്തിൽ കൊല്ലപ്പെട്ട സംഭവവും സ്റ്റാൻഡ് അപ് കോമഡിയിൽ 360 രൂപയുടെ ചിക്കൻ ബിരിയാണി മുതലാക്കാൻ ശ്രമിച്ചതുമടക്കമുള്ള സംഭവങ്ങളുടെ പശ്ചാത്തലത്തിലാണ് ചേതനയുടെ ഈ തുറന്ന അഭിപ്രായപ്രകടനം.
‘‘നിങ്ങൾ ദയവു ചെയ്ത് ഇന്ത്യയിലെ പുരുഷന്മാരെ വിവാഹം ചെയ്യുകയോ അവരുമായി ഡേറ്റിങ്ങിൽ ഏർപ്പെടുകയോ അരുത്. അതിലും ഭേദം ഒറ്റയ്ക്കു ജീവിക്കുന്നതാണ്. മാനസിക പ്രശ്നമുള്ളവരെപ്പോലെ പെരുമാറുന്ന ഭർതൃമാതാവ്, ഉപദ്രവിക്കുന്ന ഭർത്താക്കന്മാർ, 370 രൂപയുടെ ബിരിയാണി വാങ്ങി നൽകിയതിന്റെ പേരിൽ സ്ത്രീയുടെ ശരീരത്തിന്മേൽ തനിക്ക് അവകാശമുണ്ടെന്ന് കരുതുന്ന നട്ടെല്ലില്ലാത്ത ആൺകുട്ടികൾ... ഇവർക്കൊപ്പം ജീവിക്കുന്നതിലും എത്രയോ ഭേദമാണ് സ്ത്രീകൾ ഒറ്റയ്ക്ക് കഴിയുന്നത്.
പണം ചെലവാക്കിയതിന്റെ പേരിൽ സ്ത്രീ ലൈംഗികതയ്ക്ക് ബാധ്യസ്ഥയാണെന്ന് കരുതുന്ന, കൺസെന്റ് എന്ന വാക്കിന്റെ അർഥം പോലും അറിയാത്ത ആണുങ്ങൾ സ്ത്രീകളെ അർഹിക്കുന്നില്ല. 15 വർഷമായി റിലേഷൻഷിപ്പ് കോച്ച് ആയി തുടരുകയാണ് ഞാന്. ഇതു വരെ അറിഞ്ഞ ജീവിതങ്ങളെ അടിസ്ഥാനമാക്കിയാണ് ഇക്കാര്യം പറയുന്നത്. പ്രതിവർഷം അയ്യായിരത്തിൽ പരം സ്ത്രീധന മരണങ്ങളും ലക്ഷക്കണക്കിന് പീഡനക്കേസുകളുമാണ് രാജ്യത്ത് റിപ്പോർട്ട് ചെയ്യപ്പെടുന്നത്. റിപ്പോർട്ട് ചെയ്യപ്പെടാതെ പോകുന്നവ അതിലും ഇരട്ടിയാണ്...’’ ചേതന പറഞ്ഞു. ഇന്സ്റ്റഗ്രാമില് പങ്കുവച്ച വീഡിയോയിലാണ് ചേതന തന്റെ അഭിപ്രായം ഒരു മടിയും കൂടാതെ പങ്കുവച്ചത്. ചേതനയുടെ വിഡിയോയ്ക്ക് താഴെ അനുകൂലിച്ചും പ്രതികൂലിച്ചും നിരവധി പേർ കമന്റുകള് കുറിക്കുന്നുണ്ട്.
