മലയാള സിനിമയിലെ ലേഡി സൂപ്പര്സ്റ്റാര് പദവി സ്വപ്രയത്നം കൊണ്ട് നേടിയെടുത്തിയ താരമാണ് മഞ്ജു വാര്യര്. സാക്ഷ്യം എന്ന ചിത്രത്തിലൂടെ ബാലതാരമായിട്ടായിരുന്നു മഞ്ജുവിന്റെ വെള്ളിത്തിരയിലുള്ള അരങ്ങേറ്റം. ചുരുങ്ങിയ കാലം കൊണ്ട് മലയാള സിനിമയില് തന്റേതായ ഇടം നേടിയെടുത്ത താരം പിന്നീട് കരിയറിന്റെ പീക്ക് ടൈമിലാണ് ദിലീപിനെ വിവാഹം ചെയ്ത് അഭിനയലോകത്ത് നിന്ന് ഇടവേളയെടുത്തത്.
സ്വകാര്യ ജീവിതത്തിലെ പ്രശ്നങ്ങളും പ്രതിസന്ധികളും തരണം ചെയ്ത് 14 വര്ഷത്തെ ഇടവേളയ്ക്കു ശേഷം താരം വീണ്ടും സിനിമയിലേക്ക് തിരിച്ചെത്തി. മടങ്ങിവരവില് മലയാളത്തില് മാത്രമല്ല തമിഴിലും തിളങ്ങാന് താരത്തിന് കഴിഞ്ഞിട്ടുണ്ട്. മടങ്ങിവരവില് നിരവധി ആരാധകരെ നേടിയെടുത്ത താരം സോഷ്യല് മീഡിയയിലും നിറസാന്നിധ്യമാണ്. താരം പങ്കിടുന്ന ചിത്രങ്ങളെല്ലാം നിമിഷനേരം കൊണ്ട് തരംഗമായി മാറാറുണ്ട്.
ഇപ്പോഴിതാ സ്റ്റൈലിഷ് ലുക്കിലുള്ള പുത്തന് ചിത്രങ്ങള് പങ്കിടുകയാണ് മഞ്ജുവാര്യര്. ഡാര്ക്ക് ബ്രൗണ് ടോപ്പും മാക്സി സ്കര്ട്ടുമണിഞ്ഞാണ് താരം തിളങ്ങുന്നത്. ലോംഗ് സ്ലീവ് ടര്ട്ടില് നെക്ക് ടോപ്പിനൊപ്പം മാക്സി ലെംഗ്ത് ടാർട്ടൻ പാറ്റേൺ പ്ലീറ്റഡ് സ്കര്ട്ടും ധരിച്ച താരത്തിന്റെ ചിത്രങ്ങള് നിമിഷനേരം കൊണ്ട് ആരാധകര് ഏറ്റെടുത്തു. ലെതര് ബൈക്കർ ജാക്കറ്റും ഔട്ട്ഫിറ്റിനെ കൂടുതല് സ്റ്റൈലിഷാക്കുന്ന ബ്ലാക്ക് ലെതർ ബൂട്ടുകളും താരം ഇതിനൊപ്പം ധരിച്ചിട്ടുണ്ട്. ചിത്രങ്ങളിലെല്ലാം പതിവു പോലെ കാണുന്ന ക്യൂട്ട് ചിരി കണ്ട് പ്രായം റിവേഴ്സ് ഗിയറിലാണോ എന്ന ചോദ്യമാണ് പല ആരാധകരും കമന്റകളിലൂടെ ചോദിക്കുന്നത്. 47-ാം വയസ്സിലും തന്റെ ലുക്കിലും വസ്ത്രധാരണത്തിലും ഒരു ട്രെന്ഡ് സെറ്ററായി മാറുന്ന മഞ്ജുവിന്റെ പുത്തന് ചിത്രങ്ങളും വൈറലാകുകയാണ്.
ആനന്ദ് മേനൻ ഒരുക്കുന്ന ഹാപ്പിലൂപ്പ്, ബ്രഹ്മയുഗം ഫെയിം രാഹുൽ സദാശിവന് സംവിധാനം ചെയ്യുന്ന പൃഥ്വിരാജ് സുകുമാരനൊപ്പമുള്ള ഒടിയൻ എന്നീ ചിത്രങ്ങളാണ് മഞ്ജുവിന്റേതായി അണിയറയില് ഒരുങ്ങുന്നത്. താരത്തിന്റെ ഏറ്റവും പുതിയ റിലീസ് തമിഴ് സ്പൈ ആക്ഷൻ ത്രില്ലറായ ‘മിസ്റ്റര് എക്സാ’ണ്. താരത്തിന്റെ ആക്ഷന് രംഗങ്ങള്ക്ക് ഏറെ പ്രശംസ ലഭിച്ച ഒരു സിനിമ കൂടിയായിരുന്നു ഇത്.
പൃഥ്വിരാജിനെ നായകനാക്കി രാഹുൽ സദാശിവൻ സംവിധാനം ചെയ്യുന്ന പുതിയ ചിത്രമാണ് 'ഒടിയൻ.' പൃഥ്വിരാജിനൊപ്പം മഞ്ജു വാര്യരും പ്രധാനവേഷത്തിലെത്തുന്ന ചിത്രത്തിന്റെ ടൈറ്റിൽ പേസ്റ്റർ പുറത്തുവന്നതോടെ സോഷ്യൽ മീഡിയയിലടക്കം ഒടിയൻ ചർച്ചയാവുകയാണ്. കരൺ ജോഹർ നിർമിക്കുന്ന ആദ്യ മലയാള ചിത്രമെന്ന പ്രത്യേകതയും ഒടിയനുണ്ട്. പൃഥ്വിരാജ് പ്രൊഡക്ഷൻസും കരൺ ജോഹറിന്റെ ധർമ്മ പ്രൊഡക്ഷൻസും ചേർന്ന് അവതരിപ്പിക്കുന്ന ചിത്രം നിർമിക്കുന്നത് സുപ്രിയ മേനോൻ, കരൺ ജോഹർ, അദാർ പൂനവാല, അപൂർവ മെഹ്ത എന്നിവർ ചേർന്നാണ്.
