ഹൂസ്റ്റണ്: ഉസ്ബെക്കിസ്ഥാനെതിരേ പോര്ച്ചുഗല് അഞ്ചുഗോള് വിജയം നേടുമ്പോള് ലോകത്തുടനീളമുള്ള ക്രിസ്ത്യാനോ ആരാധകരാണ് ശ്വാസം വലിച്ചുവിട്ടത്. കഴിഞ്ഞ മത്സരത്തില് കോംഗോയ്ക്ക് എതിരേ വിഷമിച്ച താരം ഇരട്ടഗോളുകളുമായി ഗോളടിയിലേക്ക് തിരിച്ചെത്തിയപ്പോള് ലോകറെക്കോഡ് കുടിയാണ് പിറന്നത്.
ആറ് വ്യത്യസ്ത ഫിഫ ലോകകപ്പുകളില് ഗോള്നേടുന്ന ഭൂമിയിലെ ഏക വ്യക്തിയായി അദ്ദേഹം മാറി. 2006 ല് അരങ്ങേറ്റ മത്സരത്തിലാണ് റൊണാള്ഡോയുടെ ഗോള്വേട്ട ആരംഭിക്കുന്നത്. തുടര്ന്ന് 2010, 2014, 2018, 2022 വര്ഷങ്ങളിലും അദ്ദേഹം ഗോള് വല കുലുക്കി. ഏറ്റവും കൂടുതല് ടൂര്ണമെന്റുകള് കളിച്ച റെക്കോര്ഡ് മെസ്സിയുമായി പങ്കിടുമ്പോഴും, കളിച്ച എല്ലാ പതിപ്പുകളിലും ഗോള് നേടിയ ഏക താരം എന്ന ബഹുമതി റൊണാള്ഡോയ്ക്ക് മാത്രമാണ് സ്വന്തം. ആറ് ലോകകപ്പ് ടൂര്ണമെന്റുകളില് കളിച്ച ചരിത്രത്തിലെ ഒരേയൊരു താരങ്ങളാണ് റൊണാള്ഡോയും അര്ജന്റീന ക്യാപ്റ്റന് ലയണല് മെസ്സിയും. ബാക്കി എല്ലാ ലോകകപ്പുകളിലും ഗോള് നേടിയിരുന്നെങ്കിലും 2010 ലെ ദക്ഷിണാഫ്രിക്കന് ലോകകപ്പില് മെസ്സിക്ക് ഗോള് നേടാന് കഴിഞ്ഞിരുന്നില്ല.
അള്ജീരിയയ്ക്കെതിരെ ലയണല് മെസ്സി ഹാട്രിക് നേടി മണിക്കൂറുകള്ക്ക് ശേഷം, ഡിആര് കോംഗോയ്ക്കെതിരെയുള്ള പോര്ച്ചുഗലിന്റെ ആദ്യ മത്സര സമനിലയില് വലിയൊരു സ്വാധീനം ചെലുത്താന് റൊണാള്ഡോയ്ക്ക് കഴിഞ്ഞിരുന്നില്ല. എന്നാല് തിങ്കളാഴ്ച ഓസ്ട്രിയയ്ക്കെതിരെ ഇരട്ട ഗോള് നേടി മെസ്സി ഫിഫ ലോകകപ്പ് ചരിത്രത്തിലെ എക്കാലത്തെയും ഉയര്ന്ന ഗോള്വേട്ടക്കാരനായതോടെ, റൊണാള്ഡോയ്ക്ക് മേലുള്ള സമ്മര്ദ്ദം അതിന്റെ ഉച്ചസ്ഥായിയിലെത്തി.
ചൊവ്വാഴ്ച ആദ്യം ഗോളടിച്ചപ്പോള് റൊണാള്ഡോയുടെ ഗോള്നേട്ടം ഒന്പതായിരുന്നു. രണ്ടാമതും ഗോളടിച്ചതോടെ പോര്ച്ചുഗലിന്റെ ഇതിഹാസ താരം യുസേബിയോ ഉള്പ്പെടെയുള്ള മറ്റേതൊരു പോര്ച്ചുഗീസ് കളിക്കാരനേക്കാളും ഉയര്ന്ന ഗോള്നേട്ടം റൊണാള്ഡോ സ്വന്തമാക്കി. എന്നാല് ആദ്യ മത്സരത്തിലെ ഹാട്രിക്കും രണ്ടാം മത്സരത്തിലെ ഇരട്ട ഗോളുകളും മെസ്സിയുടെ ലോകകപ്പ് ഗോള് നേട്ടം 18 ആക്കി ഉയര്ത്തി.
ചൊവ്വാഴ്ചത്തെ മത്സരം റൊണാള്ഡോയുടെ അന്താരാഷ്ട്ര കരിയറിലെ 230-ാമത്തെ മത്സരമായിരുന്നു, ഇത് ചരിത്രത്തിലെ ഏറ്റവും ഉയര്ന്ന റെക്കോര്ഡാണ്. 2016-ല് പോര്ച്ചുഗലിനൊപ്പം യൂറോപ്യന് ചാമ്പ്യന്ഷിപ്പും, മാഞ്ചസ്റ്റര് യുണൈറ്റഡ്, റിയല് മാഡ്രിഡ് ടീമുകള്ക്കൊപ്പം അഞ്ച് തവണ ചാമ്പ്യന്സ് ലീഗും നേടിയ റൊണാള്ഡോയുടെ അവസാന ലോകകപ്പായിരിക്കാം ഇത്. ക്രിസ്റ്റ്യാനോ റൊണാള്ഡോയേക്കാള് (144) കൂടുതല് അന്താരാഷ്ട്ര ഗോളുകള് മറ്റൊരു കളിക്കാരനും നേടിയിട്ടില്ല.
എന്നിരുന്നാലും, ഡിആര് കോംഗോയ്ക്കെതിരായ 1-1 സമനിലയില് ഗോള് നേടാനാകാതെ പോയത് ഒരു പ്രധാന ടൂര്ണമെന്റിലെ അദ്ദേഹത്തിന്റെ ഗോള് വരള്ച്ച 10 മത്സരങ്ങളിലേക്ക് നീട്ടിയിരുന്നു. 2022 ലോകകപ്പില് ഘാനയ്ക്കെതിരായ 3-2 വിജയത്തിന് ശേഷം റോണോ ഗോള് നേടിയത് ഉസ്ബെക്കിസ്ഥാനെതിരേയുള്ള ഇരട്ടഗോളുകള് ആയിരുന്നു.
ഡെമോക്രാറ്റിക് റിപ്പബ്ലിക് ഓഫ് കോംഗോയ്ക്കെതിരെ നടന്ന ആദ്യ മത്സരത്തില് റൊണാള്ഡോയ്ക്ക് പന്തുകള് കാര്യമായി ലഭിച്ചിരുന്നില്ല. എന്നാല് ലഭിച്ച രണ്ട് അവസരങ്ങള് അദ്ദേഹം ലക്ഷ്യത്തിലെത്തിക്കാന് പരാജയപ്പെടുകയും ചെയ്തു. ഇതോടെ അദ്ദേഹത്തെ ടീമില് നിന്ന് ഒഴിവാക്കാന് കോച്ച് റോബര്ട്ടോ മാര്ട്ടിനെസിനോട് ആവശ്യപ്പെട്ട് വിമര്ശകര് രംഗത്തെത്തിയിരുന്നു.
ഈ മത്സരത്തിന് മുന്പ് റൊണാള്ഡോയുടെ ഫോമിനെക്കുറിച്ചുള്ള ആശങ്കകള് ശക്തമായിരുന്നു. മുന്പ് കളിച്ച 10 വലിയ മത്സരങ്ങളില് (ലോകകപ്പും യൂറോയും) അദ്ദേഹത്തിന് ഗോളുകളൊന്നും നേടാനായിരുന്നില്ല, ഒരു അസിസ്റ്റ് മാത്രമാണ് ഉണ്ടായിരുന്നത്. എന്നാല് സൗദി അറേബ്യയിലെ അല് നസര് ക്ലബ്ബിനായി 30 ലീഗ് മത്സരങ്ങളില് നിന്ന് 28 ഗോളുകള് നേടി അദ്ദേഹം മികച്ച ഫോമിലായിരുന്നു.
മെസ്സി, എംബാപ്പെ, ഹാലണ്ട്, ഹാരി കെയ്ന് എന്നിവര് ലോകകപ്പില് മിന്നും തുടക്കം കുറിച്ചപ്പോള് റൊണാള്ഡോയുടെ ഫോമില്ലായ്മ കൂടുതല് ചര്ച്ചയായി. എങ്കിലും കോച്ച് മാര്ട്ടിനെസ് തന്റെ ക്യാപ്റ്റനില് പൂര്ണ്ണ വിശ്വാസം അര്പ്പിച്ചു. ഹൂസ്റ്റണ് സ്റ്റേഡിയത്തില് വാം-അപ്പിനായി ഇറങ്ങിയപ്പോഴും, വലിയ സ്ക്രീനുകളില് പ്രത്യക്ഷപ്പെട്ടപ്പോഴുമെല്ലാം ആരാധകര് വലിയ ആവേശത്തോടെയാണ് റൊണാള്ഡോയെ വരവേറ്റത്.
