ന്യൂഡൽഹി: പശ്ചിമേഷ്യൻ പ്രതിസന്ധിയെ തുടർന്ന് ഏർപ്പെടുത്തിയിരുന്ന താൽക്കാലിക നിയന്ത്രണങ്ങൾ പിൻവലിച്ച്, രാജ്യത്തെ വാണിജ്യ എൽപിജി വിതരണം കേന്ദ്ര സർക്കാർ പൂർണ്ണതോതിലാക്കി. ഇതോടെ ഹോട്ടൽ വ്യവസായത്തിൽ നിലനിന്നിരുന്ന പ്രതിസന്ധിക്ക് അയവ് വരികയാണ്. വിതരണ ശൃംഖലയിലെ തടസ്സങ്ങൾ നീങ്ങിയ സാഹചര്യത്തിലാണ് പ്രതിസന്ധിക്ക് മുൻപുള്ള അളവിൽ തന്നെ വാണിജ്യ സിലിണ്ടറുകൾ ലഭ്യമാക്കാൻ തീരുമാനിച്ചതെന്ന് കേന്ദ്ര പെട്രോളിയം-പ്രകൃതിവാതക മന്ത്രാലയം അറിയിച്ചു.
എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ചീഫ് സെക്രട്ടറിമാർക്ക് അയച്ച ഔദ്യോഗിക സന്ദേശത്തിൽ പെട്രോളിയം മന്ത്രാലയം സെക്രട്ടറി ഡോ. നീരജ് മിത്തൽ ആണ് ഇക്കാര്യം വ്യക്തമാക്കിയത്. വാണിജ്യ ആവശ്യങ്ങൾക്കുള്ള എൽപിജി വിതരണത്തിന്മേൽ ഏർപ്പെടുത്തിയിരുന്ന എല്ലാവിധ മേഖല തിരിച്ചുള്ള നിയന്ത്രണങ്ങളും ഒഴിവാക്കാൻ മന്ത്രാലയം തീരുമാനിച്ചിട്ടുണ്ട്.
പശ്ചിമേഷ്യയിലെ സംഘർഷങ്ങൾ കാരണം ഇന്ധന ഇറക്കുമതിയിൽ അനിശ്ചിതത്വം ഉണ്ടായ ഘട്ടത്തിലാണ് വാണിജ്യ സിലിണ്ടറുകൾക്ക് നിയന്ത്രണം ഏർപ്പെടുത്തിയത്. വീടുകളിലെ പാചകവാതക വിതരണം തടസ്സമില്ലാതെ ഉറപ്പാക്കുന്നതിന് വേണ്ടിയായിരുന്നു ഈ മുൻകരുതൽ നടപടി. പുതിയ തീരുമാനത്തോടെ വാണിജ്യ എൽപിജി വിതരണം പഴയ പടിയാകും. കൂടാതെ, ബൾക്ക് എൽപിജി (മൊത്ത വിതരണം) വിതരണത്തിന്മേലുള്ള നിയന്ത്രണങ്ങളിലും ഇളവ് വരുത്തിയിട്ടുണ്ട്. ഇത് പ്രതിസന്ധിക്ക് മുൻപുണ്ടായിരുന്ന ഉപഭോഗത്തിന്റെ 50 ശതമാനം വരെ പുനഃസ്ഥാപിക്കാൻ അനുവദിക്കും. ഹോട്ടലുകൾ, റെസ്റ്റോറന്റുകൾ, വ്യാവസായിക യൂണിറ്റുകൾ, മറ്റ് വാണിജ്യ സ്ഥാപനങ്ങൾ എന്നിവയ്ക്ക് വലിയ ആശ്വാസം പകരുന്നതാണ് കേന്ദ്രത്തിന്റെ ഈ തീരുമാനം.
വാണിജ്യ, വ്യവസായിക ഉപഭോക്താക്കളുടെ വിവരങ്ങൾ പൊതുമേഖലാ എണ്ണക്കമ്പനികൾ തുടർന്നും സൂക്ഷിക്കും. വിതരണവും നിരീക്ഷണവും കൂടുതൽ കാര്യക്ഷമമാക്കുന്നതിനായി മൂന്ന് പൊതുമേഖലാ എണ്ണക്കമ്പനികളെയും ഉൾപ്പെടുത്തി ഒരു ഏകീകൃത ഡാറ്റാബേസ് രൂപീകരിക്കാനും മന്ത്രാലയം നിർദ്ദേശിച്ചിട്ടുണ്ട്.
എൽപിജി വിതരണം സാധാരണ നിലയിലായെങ്കിലും, കൂടുതൽ പരിസ്ഥിതി സൗഹൃദമായ പൈപ്പ്ഡ് നാച്ചുറൽ ഗ്യാസ് ഉപയോഗത്തിലേക്ക് മാറാനുള്ള ആഹ്വാനം സർക്കാർ ശക്തമായി തുടരുകയാണ്. ഇതിനകം പിഎൻജിയിലേക്ക് മാറിയ വാണിജ്യ-ബൾക്ക് ഉപഭോക്താക്കൾ അത് തന്നെ തുടർന്നും ഉപയോഗിക്കണമെന്ന് മന്ത്രാലയം നിർദ്ദേശിക്കുന്നു. നിലവിൽ പിഎൻജി ശൃംഖല ലഭ്യമായ പ്രദേശങ്ങളിലെ എൽപിജി ഉപഭോക്താക്കളെയും, കണക്ഷൻ ലഭിക്കാൻ നടപടികൾ പുരോഗമിക്കുന്നവരെയും ശാശ്വതമായി പിഎൻജിയിലേക്ക് മാറ്റാനും തീരുമാനമായിട്ടുണ്ട്.
