യൂട്യൂബിൽ ഏറ്റവും കൂടുതൽ ആളുകൾ കണ്ട ഇന്ത്യൻ സിനിമയെന്ന റെക്കോർഡ് സ്വന്തമാക്കി 'ജയ ജാനകി നായക'; പ്രേക്ഷകർക്ക് നന്ദി അറിയിച്ച് രാകുൽ പ്രീത് സിംഗ്

യൂട്യൂബിൽ ഏറ്റവും കൂടുതൽ ആളുകൾ കണ്ട ഇന്ത്യൻ സിനിമയെന്ന റെക്കോർഡ് സ്വന്തമാക്കിയിരിക്കുകയാണ് 2017-ൽ പുറത്തിറങ്ങിയ, രാകുൽ പ്രീത് സിംഗ് നായികയായെത്തിയ തെലുങ്ക് റൊമാന്റിക് ആക്ഷൻ ചിത്രം 'ജയ ജാനകി നായക'. ഇപ്പോഴിതാ ഈ സവിശേഷനേട്ടത്തിൽ പ്രേക്ഷകർക്ക് നന്ദി പറഞ്ഞ് എത്തിയിരിക്കുകയാണ് താരം. ചിത്രത്തിലെ ജാനകി എന്ന കഥാപാത്രം ഹൃദയത്തോട് എക്കാലവും ചേർന്നുനിൽക്കുന്ന ഒന്നായിരിക്കുമെന്ന് രാകുൽ സോഷ്യൽ മീഡിയയിൽ കുറിച്ചു.

‘ചില കഥാപാത്രങ്ങൾ നിങ്ങളോടൊപ്പം എന്നെന്നേക്കുമായി നിലനിൽക്കും, ജാനകി എപ്പോഴും അതിലൊന്നായിരിക്കും. നിങ്ങൾ നൽകിയ എല്ലാ സ്നേഹത്തിനും 'ജയ ജാനകി നായകയെ' യൂട്യൂബിൽ ഏറ്റവും കൂടുതൽ ആളുകൾ കണ്ട ഇന്ത്യൻ ചിത്രമാക്കി മാറ്റിയതിനും നന്ദി. ഇതൊരു സവിശേഷമായ നേട്ടമാണ്,’ -രാകുൽ പ്രീത് സിംഗ് ഇൻസ്റ്റഗ്രാം സ്റ്റോറിയിൽ കുറിച്ചു.

ചിത്രത്തിന്റെ വിജയത്തിന് പിന്നിൽ പ്രവർത്തിച്ച സംവിധായകൻ ബോയപതി ശ്രീനുവിനും മുഴുവൻ അണിയറപ്രവർത്തകർക്കും താരം പ്രത്യേക നന്ദി രേഖപ്പെടുത്തിയിട്ടുണ്ട്.

ദ്വാരക ക്രിയേഷൻസിന്റെ ബാനറിൽ മിര്യാല രവീന്ദർ റെഡ്ഡി നിർമ്മിച്ച്, ബോയപതി ശ്രീനു സംവിധാനം ചെയ്ത ചിത്രം 2017 ഓഗസ്റ്റ് 11-നാണ് തിയേറ്ററുകളിൽ എത്തിയത്. ബെല്ലംകൊണ്ട ശ്രീനിവാസും രാകുലും പ്രധാന വേഷങ്ങളിൽ എത്തിയ ഈ ചിത്രത്തിൽ ജഗപതി ബാബു, തരുൺ അറോറ, പ്രഗ്യ ജയ്സ്വാൾ, ശരത് കുമാർ, നന്ദു, സുമൻ, ജയപ്രകാശ് തുടങ്ങിയവരും പ്രധാന വേഷങ്ങളിൽ അഭിനയിച്ചിട്ടുണ്ട്.

അതേസമയം നിതേഷ് തിവാരി സംവിധാനം ചെയ്യുന്ന 'രാമായണ'മാണ് രാകുലിന്റെ വരാനിരിക്കുന്ന ഏറ്റവും പുതിയ ചിത്രം. ഈ ബ്രഹ്മാണ്ഡ പുരാണ ചിത്രത്തിൽ 'ശൂർപ്പണഖ' എന്ന ശക്തമായ കഥാപാത്രത്തെയാണ് രാകുൽ അവതരിപ്പിക്കുന്നത്. രൺബീർ കപൂർ ശ്രീരാമനായും, യാഷ് രാവണനായും, സായ് പല്ലവി സീതയായും അഭിനയിക്കുന്ന ചിത്രത്തിന് ഓസ്കാർ ജേതാക്കളായ ഹാൻസ് സിമ്മറും എ.ആർ. റഹ്മാനുമാണ് സംഗീതമൊരുക്കുന്നത്.