മയാമി: ലോകചാമ്പ്യൻമാരായ അർജന്റീനയെ അവസാന നിമിഷം വരെ കടുത്ത സമ്മർദ്ദത്തിലാക്കിയ പ്രകടനത്തിനൊടുവിലാണ് കേപ് വർദെ ലോകകപ്പിന്റെ പ്രീക്വാർട്ടർ ഘട്ടത്തിൽ നിന്ന് പുറത്തായത്. ആവേശം നിറഞ്ഞ മത്സരത്തിൽ 29-ാം മിനിറ്റിൽ ലയണൽ മെസി അർജന്റീനയ്ക്ക് ലീഡ് സമ്മാനിച്ചു. എന്നാൽ 59-ാം മിനിറ്റിൽ ഡെറോയ് ഡുവാർട്ടെയുടെ ഗോളിലൂടെ കേപ് വർദെ സമനില പിടിച്ചു.
രണ്ടാം പകുതിയിലും ആക്രമണ ഫുട്ബോൾ തുടർന്ന കേപ് വർദെയെ ഞെട്ടിച്ച് 90+6-ാം മിനിറ്റിൽ ലിസാൻഡ്രോ മാർട്ടിനസ് വീണ്ടും അർജന്റീനയെ മുന്നിലെത്തിച്ചു. പക്ഷേ അധികസമയത്ത് സിഡ്നി ലോപസ് കബ്രാളിന്റെ മികച്ച ഗോളിലൂടെ കേപ് വർദെ വീണ്ടും ഒപ്പമെത്തി. മത്സരം ഷൂട്ടൗട്ടിലേക്ക് നീങ്ങുമെന്ന് തോന്നിച്ച ഘട്ടത്തിലാണ് മെസിയുടെ കോർണറിൽ നിന്നുണ്ടായ ഹെഡർ ഡിനെ ബോർഗ്സിന്റെ സ്പർശത്തെ തുടർന്ന് സെൽഫ് ഗോളായി രേഖപ്പെടുത്തി അർജന്റീന വിജയഗോൾ നേടിയത്.
അർജന്റീന അനായാസം ജയിക്കുമെന്ന് കരുതിയ മത്സരത്തിൽ കേപ് വർദെയുടെ 40-കാരനായ ഗോൾകീപ്പർ വൊസിഞ്ഞയുടെ പ്രകടനമാണ് ശ്രദ്ധ പിടിച്ചുപറ്റിയത്. ഗോൾ ഉറപ്പിച്ച നിരവധി ശ്രമങ്ങൾ അദ്ദേഹം തടഞ്ഞു. ബോക്സിന് പുറത്തുനിന്ന് മെസി എടുത്ത അപകടകരമായ ഫ്രീകിക്കും വൊസിഞ്ഞ രക്ഷപ്പെടുത്തിയിരുന്നു.
മത്സരശേഷം മെസിയുമായി നടന്ന സംഭാഷണവും വൊസിഞ്ഞ വെളിപ്പെടുത്തി. തന്റെ അടുത്തെത്തിയ മെസി കെട്ടിപ്പിടിച്ച ശേഷം, "ഇന്ന് നിങ്ങൾ മഹത്തരമായ മത്സരമാണ് കളിച്ചത്. കേപ് വർദെയിലെ ജനങ്ങൾ നിങ്ങളെയോർത്ത് അഭിമാനിക്കട്ടെ," എന്ന് പറഞ്ഞതായി അദ്ദേഹം അറിയിച്ചു. ജീവിതത്തിൽ ഒരിക്കലും മറക്കാനാകാത്ത നിമിഷമായിരുന്നുവെന്നും വൊസിഞ്ഞ മാധ്യമങ്ങളോട് പറഞ്ഞു.
മത്സരം എളുപ്പമാകില്ലെന്ന് നേരത്തേ തന്നെ അറിയാമായിരുന്നുവെന്ന് മെസിയും പിന്നീട് പ്രതികരിച്ചു. കേപ് വർദെ അർജന്റീനയെ കനത്ത പരീക്ഷണത്തിന് വിധേയരാക്കിയെന്നും, ഈ ലോകകപ്പിലെ സർപ്രൈസ് ടീമെന്ന വിശേഷണം അവർ വീണ്ടും ശരിവെച്ചെന്നും അദ്ദേഹം പറഞ്ഞു. പ്രീക്വാർട്ടറിലെത്തിയ അർജന്റീനയുടെ അടുത്ത എതിരാളികൾ ഈജിപ്താണ്.
