കോട്ടയം: മുനിസിപ്പല് ഭരണവും കൗണ്സിലര് പദവിയും ജീവിത സാഫല്യമായി കാണാത്തതിനാല് ഭരണം നഷ്ടമാവുന്നത് വലിയ കാര്യമായി എടുക്കുന്നില്ലെന്ന് പ്രതികരിച്ച് പാലാ നഗരസഭാ കൗണ്സിലര് ബിജു പുളിക്കണ്ടം. യുഡിഎഫ്-സ്വതന്ത്ര കൂട്ടായ്മ സഖ്യം ഭരിക്കുന്ന പാലാ നഗരസഭയില് സ്വതന്ത്ര കൂട്ടായ്മയ്ക്കുള്ള പിന്തുണ കോണ്ഗ്രസ് പിന്വലിച്ചത് പാലാ നഗരസഭയിലെ ഭരണപ്രതിസന്ധിക്ക് കാരണമായിരുന്നു.
എല്ഡിഎഫും കൈവിട്ട സാഹചര്യത്തിലാണ് ഫേസ്ബുക്കി ബിജു പുളിക്കണ്ടത്തിന്റെ കുറിപ്പ് പ്രത്യക്ഷപ്പെട്ടത്. ഭരണം കിട്ടുമെന്ന് പ്രതീക്ഷിച്ചല്ല മൂന്നുപേരും തെരഞ്ഞെടുപ്പില് മത്സരിച്ചതെന്നും ഭരണം നഷ്ടമാവുന്നത് വലിയ കാര്യമായി എടുക്കുന്നില്ലെന്നുമാണ് കുറിപ്പ്. പൊതുപ്രവര്ത്തനം ജീവിതോപാധിയല്ലെന്നും പോസിറ്റീവ് ആയി കാര്യങ്ങളെ അഭിമുഖീകരിക്കുമെന്നും ബിജു പറഞ്ഞു.
ഫേസ്ബുക്ക് കുറിപ്പ് ഇങ്ങിനെ.
'ഞങ്ങള് മൂവരും ഇലക്ഷന് നിന്നത് ഭരണം കിട്ടുമെന്ന് പ്രതീക്ഷിച്ചല്ലല്ലോ..? ഭരണം കിട്ടിയത് അവിചാരിതമായിട്ട്.... മുനിസിപ്പല് ഭരണവും കൗണ്സിലര് പദവിയും ജീവിത സാഫല്യമായി കാണാത്തതിനാല്, ഭരണം നഷ്ടമാവുന്നത് വലിയ കാര്യമായി എടുക്കുന്നുമില്ല. നമ്മള്ക്കുണ്ടായ തിക്താനുഭവത്തിന് കാലം മറുപടി നല്കിക്കഴിഞ്ഞു. ഇനിയുള്ള കാലം ആരുമായും എതിര്പ്പ് വച്ചുപുലര്ത്തേണ്ട കാര്യമില്ലാന്നാണ് ഞങ്ങള് മൂവരുടെയും തീരുമാനം. പൊതുപ്രവര്ത്തനം ഞങ്ങളെ സംബന്ധിച്ചിടത്തോളം ജീവനോപാധിയല്ലാ. ഭാവി കാര്യങ്ങള് സമാനമനസ്കരുമായി ആലോചിച്ചു തീരുമാനമെടുക്കും. ഏതിനെയും പോസിറ്റീവ് ആയി അഭിമുഖീകരിക്കും', ബിജു പുളിക്കകണ്ടം കുറിച്ചു.
നഗരസഭയില് സ്വതന്ത്രരായി മത്സരിച്ചുജയിച്ച പുളിക്കകണ്ടം കുടുംബത്തിന് നല്കി വരുന്ന പിന്തുണ പിന്വലിക്കുന്ന പ്രമേയം കോണ്ഗ്രസ് മണ്ഡലം കമ്മിറ്റി പാസ്സാക്കിയിരുന്നു. എല്ഡിഎഫും കൈവിട്ടതോടെ ബിനു പുളിക്കകണ്ടവും കുടുംബവും രാജിവെക്കണമെന്നാണ് ആവശ്യവുമായി കേരളാകോണ്ഗ്രസ് മാണി വിഭാഗവും രംഗത്ത് വന്നിരിക്കുകയാണ്. സ്വയം രാജിവെച്ചില്ലെങ്കില് അവിശ്വാസപ്രമേയം കൊണ്ടുവരുമെന്നും കേരള കോണ്ഗ്രസ് എം കൗണ്സിലര് ബിജു പാലുപടവന് വ്യക്തമാക്കി.
പാലാ നഗരസഭയില് എല്ഡിഎഫിനും യുഡിഎഫിനും കേവലഭൂരിപക്ഷം ഇല്ലാതെ വന്നതോടെ സ്വതന്ത്രസ്ഥാനാര്ത്ഥികളായി മത്സരിച്ച ബിനു പുളിക്കകണ്ടവും മകള് ദിയാ ബിനു പുളിക്കക്കണ്ടവും ബിനുവിന്റെ സഹോദരന് ബിജു പുളിക്കകണ്ടവും യുഡിഎഫിനാണ് പിന്തുണ പ്രഖ്യാപിച്ചത്. ആദ്യടേമില് ചേയര്പേഴ്സണ് സ്ഥാനം ദിയയ്ക്ക് നല്കുകയായിരുന്നു. 26 അംഗ നഗരസഭയില് എല്ഡിഎഫിന് പതിനൊന്നും യുഡിഎഫിന് പത്തംഗങ്ങളുമായിരുന്നു ഉണ്ടായിരുന്നത്. ബിജു, ബിനു, ദിയ, കോണ്ഗ്രസ് വിമത മായാ രാഹുല് എന്നിവരും വിജയിച്ചിരുന്നു. പുളിക്കക്കണ്ടം കുടുംബത്തിന്റെയും മായയുടെയും പിന്തുണ ലഭിച്ചതോടെ യുഡിഎഫിന്റെ അംഗബലം 14 ആയി. ഇങ്ങിനെയാണ് യുഡിഎഫ് ഭരണം പിടിച്ചത്.
