ദോഹ:മനുഷ്യബന്ധങ്ങളുടെയും സുഡാനി മിത്തുകളുടെയും കഥാകാരൻ ഡോ. അമീർ താജ് അൽസിറുമായി ഖത്തറിലെ ഇന്ത്യൻ എഴുത്തുകാരുടെ കൂട്ടായ്മയായ ഖത്തർ ഇന്ത്യൻ ഓതേഴ്സ് ഫോറം (ഖിയാഫ്) നടത്തിയസാംസ്കാരിക വിനിമയം ശ്രദ്ധേയമായി. ഖത്തറിലെ പ്രശസ്ത മറുനാടൻ എഴുത്തുകാരെയും അവരുടെ കൃതികളെയും അടുത്തറിയാനും സംവദിക്കാനുമായി സംഘടിപ്പിച്ച മുഖാമുഖത്തിൽ കത്താറ നോവൽ പുരസ്കാരജേതാവ് ഡോ. അമീർ താജ് അൽസിർ എഴുത്തുവിശേഷങ്ങൾ പങ്കുവച്ചു.
ഐ സി സി മുംബൈ ഹാളിൽ 'ഏൻ ഈവ് വിത്ത് ദ ലെജൻഡ്: ബിയോണ്ട് ദി പേജസ്, ബിയോണ്ട് ദ വേർഡ്സ്'എന്നപേരിൽ നടന്ന പരിപാടിയിൽ വായനാപ്രേമികളും സാംസ്കാരിക പ്രമുഖരും പങ്കെടുത്തു.അതിർത്തികൾക്കപ്പുറം മനുഷ്യരെ ഒരുമിപ്പിക്കുന്നതിൽ കലയ്ക്കും സാഹിത്യത്തിനും വലിയ പങ്കുവഹിക്കാനാവുമെന്ന് സദസ്സുമായി സംവദിക്കവെ ഡോ. അമീർ താജ് ചൂണ്ടിക്കാട്ടി. സമകാലികഅറബി സാഹിത്യത്തിലെ പ്രശസ്ത എഴുത്തുകാരനായ അദ്ദേഹം ഹമദ് മെഡിക്കൽ കോർപ്പറേഷനിലെ ഡോക്ടർ കൂടിയാണ്.
സങ്കീർണ്ണമായ മനുഷ്യബന്ധങ്ങളെയും സുഡാന്റെ രാഷ്ട്രീയ-സാമൂഹ്യ പശ്ചാത്തലത്തെയും തനത് ശൈലിയിൽ ആവിഷ്കരിച്ച ഡോ. അമീർ താജ് മുപ്പതോളം പുസ്തകങ്ങൾ രചിച്ചിട്ടുണ്ട്. ഇവയിൽ പലതും ഇംഗ്ലീഷ്, ഫ്രഞ്ച്, ഇറ്റാലിയൻ തുടങ്ങി പത്തിലധികം ഭാഷകളിലേക്ക് വിവർത്തനം ചെയ്യപ്പെട്ടിട്ടുണ്ട്. ആഫ്രിക്കൻ-സുഡാനീസ് സംസ്കാരം, ചരിത്രം, മിത്തുകൾ, സാമൂഹിക യാഥാർത്ഥ്യങ്ങൾ എന്നിവയെല്ലാം അദ്ദേഹത്തിന്റെ എഴുത്തുകളുടെ സവിശേഷതയാണ്.
എബോള-76, ദി ഗ്രബ് ഹണ്ടർ, ഫ്രഞ്ച് പെർഫ്യൂം, 366, ദി ടെലിഗ്രാം തുടങ്ങിയവയാണ്p അദ്ദേഹത്തിന്റെ ശ്രദ്ധേയമായ കൃതികൾ. 2015-ലാണ് '366' എന്ന നോവലിലൂടെ അദ്ദേഹം കത്താറ നോവൽ പുരസ്കാരത്തിന് അർഹനായത്. വിരഹത്തിന്റെയും ഭ്രാന്തമായ പ്രണയത്തിന്റെയും പച്ച മഷിപ്പകർപ്പുകളാണ്അമീർ താജ് അൽസിറിന്റെ '366' എന്ന നോവൽ. സുഡാനി നഗരങ്ങളുടെ അധോലോകങ്ങളും, ഇടുങ്ങിയ തെരുവുകളും , ദാരിദ്രവും , ഭാവനകളെയും സ്വപ്നങ്ങളെയും തളർത്തിക്കളയുന്ന അധ്യാപനവൃത്തിയെയും അമീർ താജ് അൽസിർ '366' നോവലിൽസൂക്ഷ്മമായി വരച്ചുകാട്ടുന്നുണ്ട്. ഖിയാഫ് പ്രസിഡൻറ് ഡോ. സാബു കെ സി അധ്യക്ഷത വഹിച്ച പരിപാടിയിൽ ഗവേണിംഗ് ബോഡി ചെയർമാൻ ഹുസൈൻ കടന്നമണ്ണ, വൈസ് പ്രസിഡണ്ട് മജീദ് പുതുപ്പറമ്പ് എന്നിവർ മോഡറേറ്റർമാരായിരുന്നു. ഹുസൈൻ അഹമ്മദ്, മുഹമ്മദ് നജീബ്, ത്വയ്യിബ ഇബ്രാഹീം, മജീദ് നാദാപുരം തുടങ്ങിയവർ ചടങ്ങിൽ സംസാരിച്ചു.ജനറൽ സെക്രട്ടറി തൻസീം കുറ്റിയാടി സ്വാഗതവും ജോയിൻ്റ് സെക്രട്ടറി ചിത്രാ ശിവൻ നന്ദിയും പറഞ്ഞു.മുനീർ തൂലിക, ആർട്ടിസ്റ്റ് അച്ചു എന്നിവർ വരച്ച ഡോ. അമീർ താജിൻ്റെ ചിത്രങ്ങൾ അദ്ദേഹത്തിന് സമ്മാനിച്ചു.
ട്രഷറർ അൻസാർ അരിമ്പ്ര, വൈസ് പ്രസിഡൻ്റ് ഷംന ആസ്മി, നേഹ ആസ്മി, സുരേഷ് കുവാട്ട് എന്നിവർ ചേർന്ന് നിർമ്മിച്ച ഡോക്യുമെന്ററി പ്രദർശിപ്പിച്ചു. മഹാത്മാഗാന്ധിയുടെ ആത്മകഥ 'എന്റെ സത്യാന്വേഷണപരീക്ഷണങ്ങൾ' ചടങ്ങിൽ അമീർ താജിന് സമ്മാനിച്ചു.
വൈസ് പ്രസിഡന്റ് അഷ്റഫ് മടിയാരി, ജോയിൻ്റ് സെക്രട്ടറി ഷംല ജഅഫർ, ശ്രീനാഥ് ശങ്കരൻകുട്ടി, ജാബിർ റഹ്മാൻ എന്നിവർ പരിപാടിക്ക്നേതൃത്വം നൽകി.
ഷഫീക്ക് അറയ്ക്കൽ
