പാലക്കാട് : പാലക്കാട് കവര്ച്ചയ്ക്കിടെ വയോധികയെ തീയിട്ട് കൊലപ്പെടുത്തി കുഴിച്ചുമൂടി. പാലക്കാട് കൊഴിഞ്ഞാമ്പാറയിലാണ് സംഭവം. ആട്ടയാമ്പതി സ്വദേശി സരസ്സമാളിനെയാണ് പ്രദേശവാസികളായ യുവാക്കള് ചേര്ന്ന് കൊലപ്പെടുത്തി കുഴിച്ചിട്ടത്.സംഭവത്തില് പ്രദേശവാസിയായ യുവാവ് പോലീസ് പിടിയില്.
ജൂണ് 10 മുതല് സരസാളിനെ കാണാതായതിനെ തുടര്ന്ന് മകള് ജൂണ് 12-ന് കൊഴിഞ്ഞാമ്പാറ പോലീസില് പരാതി നല്കിയിരുന്നു. പരാതിയുടെ അടിസ്ഥാനത്തില് അന്വേഷണം ആരംഭിച്ച പോലീസ് പ്രദേശത്തെ ചില യുവാക്കളെ കസ്റ്റഡിയിലെടുത്തത്. കവര്ച്ചയ്ക്കും കൊലപാതകത്തിനും ഇയാളെ സഹായിച്ച 17 കാരനായി പോലീസ് അന്വേഷണം ആരംഭിച്ചു.
സംഭവത്തില് കൊഴിഞ്ഞാമ്പാറ പോലീസ് നടത്തിയ അന്വേഷണത്തിലാണ് കൊലപാതകം തെളിഞ്ഞത്. 66 വയസ്സുകാരിയായ സരസാളിന്റെ് ആഭരണങ്ങള് മോഷ്ടിക്കുന്നതിനിടെയാണ് കൊലപാതകം നടന്നത്. ചോദ്യം ചെയ്യലിനിടെ വയോധികയെ കൊലപ്പെടുത്തിയശേഷം മൃതദേഹം ശുചിമുറിയിലെ ഡ്രമ്മില് ഇട്ടു കത്തിക്കുകയും പകുതി കത്തിയ നിലയില് ചാക്കില് കെട്ടി കുഴിച്ചുമൂടിയതായും പ്രതികള് സമ്മതിച്ചതായി സൂചനയുണ്ട്. മൃതദേഹം പുറത്തെടുത്ത് ശാസ്ത്രീയ പരിശോധനയും തുടര്നടപടികളും പൂര്ത്തിയാക്കിയ ശേഷമേ സംഭവത്തില് ഔദ്യോഗിക സ്ഥിരീകരണം ലഭിക്കുകയുള്ളൂ. കേസുമായി ബന്ധപ്പെട്ട അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
