വയനാട്: കള്ളാടി മണ്ണിടിച്ചിലിനെ തുടർന്ന് മേപ്പാടി ഗവൺമെന്റ് പോളിടെക്നിക് കോളജിൽ ആരംഭിച്ച ദുരിതാശ്വാസ ക്യാമ്പ് പിരിച്ചുവിട്ടു. ക്യാമ്പിലുണ്ടായിരുന്ന 48 കുടുംബങ്ങളിലെ 129 പേരെയും സുരക്ഷിതമായി വീടുകളിലേക്ക് തിരിച്ചയച്ചു.
ദുരന്തമേഖലയിൽ നിന്ന് ഇതുവരെ ഏഴ് മൃതദേഹങ്ങളാണ് കണ്ടെത്തിയത്. ഇന്നലെ മീനാക്ഷി പുഴയിൽ നിന്ന് കണ്ടെത്തിയ രതീഷ് ഗുച്ചാദിന്റെ മൃതദേഹം ദുരന്തസ്ഥലത്ത് നിന്ന് ഏകദേശം ഒന്നര കിലോമീറ്റർ അകലെയായിരുന്നു.
ദുരന്തത്തിന്റെ അഞ്ചാം ദിവസമായ ഇന്ന് കാലാവസ്ഥ അനുകൂലമായതിനാൽ തിരച്ചിൽ കൂടുതൽ ഊർജിതമായി തുടരുകയാണ്. നാല് സോണുകളായി തിരിച്ചാണ് പരിശോധന നടക്കുന്നത്. ഒന്നാം സോണിനും രണ്ടാം സോണിനുമാണ് നിലവിൽ കൂടുതൽ പ്രാധാന്യം നൽകുന്നത്. മണ്ണൊലിച്ചെത്തിയ ദിശയുടെ അടിസ്ഥാനത്തിൽ കാണാതായ വിക്രം റാണ രണ്ടാം സോണിലായിരിക്കാമെന്നാണ് രക്ഷാപ്രവർത്തക സംഘത്തിന്റെ നിഗമനം.
അതേസമയം, ദുരന്തത്തിൽ മരിച്ചവരുടെ ആശ്രിതർക്ക് അഞ്ച് ലക്ഷം രൂപ ധനസഹായം അനുവദിച്ചുകൊണ്ട് സർക്കാർ ഉത്തരവിറക്കി. പരിക്കേറ്റവർക്ക് പരമാവധി രണ്ട് ലക്ഷം രൂപ വരെ ധനസഹായം നൽകും.
വിദഗ്ധ സമിതിയുടെ റിപ്പോർട്ട് ലഭിക്കുന്നതുവരെ തുരങ്ക നിർമാണം നിർത്തിവയ്ക്കാനും സർക്കാർ തീരുമാനിച്ചിട്ടുണ്ട്. ദുരന്തത്തിന്റെ യഥാർഥ കാരണം കണ്ടെത്തുക, കരാറുകാർ കരാർ വ്യവസ്ഥകൾ പാലിച്ചോയെന്ന് പരിശോധിക്കുക, കേന്ദ്ര-സംസ്ഥാന സർക്കാരുകൾ നൽകിയ പരിസ്ഥിതി അനുമതികൾ വിലയിരുത്തുക എന്നിവയാണ് സർക്കാർ നിയോഗിച്ച അഞ്ചംഗ വിദഗ്ധ സമിതിയുടെ പ്രധാന ചുമതലകൾ.
