ലോര്ഡ്സ് : ബാറ്റിംഗിന് പിന്നാലെ പന്തുകൊണ്ടും ഇന്ത്യ വിറപ്പിച്ചപ്പോള് ഇംഗ്ളണ്ടിനെതിരേ കാത്തിരിക്കുന്നത് ചരിത്രവിജയം. ബാറ്റ് കൊണ്ട് യാസ്തിക ഭാട്ടിയയും പന്തുകൊണ്ട് ക്രാന്തി ഗൗഡും വിറപ്പിച്ചപ്പോള് ചരിത്രപ്രസിദ്ധമായ ഏകദിന വനിതാ ടെസ്റ്റിന്റെ മൂന്നാം ദിനത്തില് ഇന്ത്യ കളിയുടെ നിയന്ത്രണം കയ്യിലെടുത്തു. ആതിഥേയര്ക്ക് 457 റണ്സിന്റെ കൂറ്റന് ലക്ഷ്യമാണ് മുന്നിലേക്ക് നീട്ടിയിരിക്കുന്നത്.
ഇംഗ്ളണ്ടിനെതിരേ ടെസ്റ്റ് സെഞ്ച്വറി നേടുന്ന ആദ്യ വനിതാ താരമെന്ന റെക്കോര്ഡാണ് യാസ്തിക നേടിയത്. ഇതിന് പിന്നാലെ ക്രാന്തി ഗൗഡിന്റെ തകര്പ്പന് ബൗളിംഗ് പ്രകടനം ഇംഗ്ലണ്ടിനെ 6 വിക്കറ്റ് നഷ്ടത്തില് 130 റണ്സ് എന്ന നിലയിലാക്കി. യാസ്തികയുടെ സമാനതകളില്ലാത്ത 113 റണ്സ് ഇന്ത്യയ്ക്ക് രണ്ടാം ഇന്നിംഗ്സില് വലിയ മേല്ക്കൈയ്യാണ് സമ്മാനിച്ചത്്. 158 പന്തുകളില് നിന്നായിരുന്നു നേട്ടം.
ഇന്ത്യ തങ്ങളുടെ രണ്ടാം ഇന്നിംഗ്സ് 7 വിക്കറ്റ് നഷ്ടത്തില് 341 റണ്സിന് ഡിക്ലയര് ചെയ്തു. ഇതോടെ ഇംഗ്ലണ്ടിന് മുന്നില് 457 റണ്സിന്റെ വമ്പന് വിജയലക്ഷ്യമാണ് ഇന്ത്യ ഉയര്ത്തിയത്. മൂന്നാം ദിനം കളി അവസാനിക്കുമ്പോള്, വെറും 130 റണ്സിന് 6 വിക്കറ്റ് എന്ന നിലയില് തകര്ന്ന ഇംഗ്ലണ്ടിന് വിജയിക്കാന് 4 വിക്കറ്റുകള് മാത്രം ബാക്കിനില്ക്കെ 327 റണ്സ് കൂടി വേണം.
കഴിഞ്ഞ ദിവസം 39 റണ്സുമായി ബാറ്റിംഗ് പുനരാരംഭിച്ച ഈ ഇടംകൈയ്യന് ബാറ്റര്, മനോഹരമായ ഷോട്ടുകളും ക്ഷമയും ഒത്തുചേര്ത്ത് തന്റെ കരിയറിലെ തന്നെ ഏറ്റവും മികച്ച ഇന്നിംഗ്സുകളിലൊന്ന് പുറത്തെടുത്തു. തന്റെ സിഗ്നേച്ചര് സ്ട്രെയിറ്റ് ഡ്രൈവിലൂടെ അര്ദ്ധ സെഞ്ച്വറി തികച്ച യാസ്തിക, സ്പിന്നര്മാര്ക്കെതിരെ മികച്ച രീതിയില് ക്രീസിന് പുറത്തിറങ്ങി കളിച്ച് ചരിത്രപ്രസിദ്ധമായ സെഞ്ച്വറി നേട്ടം കൈവരിച്ചു. ഇതോടെ ലോര്ഡ്സിന്റെ ചരിത്രത്താളുകളില് യാസ്തിക തന്റെ പേര് കൂട്ടിച്ചേര്ത്തു.
തുടര്ന്ന് റിഷാ ഘോഷ് വെറും 52 പന്തുകളില് നിന്ന് പുറത്താകാതെ 50 റണ്സ് നേടി മികച്ച ഫിനിഷിംഗ് നല്കിയതോടെ, ചായസമയത്തിന് തൊട്ടുമുമ്പ് ഇന്ത്യ ഇന്നിംഗ്സ് ഡിക്ലയര് ചെയ്യുകയായിരുന്നു. ആദ്യ ഇന്നിംഗ്സില് അഞ്ചുവിക്കറ്റ് വീഴ്ത്തിയ ക്രാന്തി ഗൗഡ് രണ്ടാം ഇന്നിംഗ്സില് രണ്ടു വിക്കറ്റും നേടിയിട്ടുണ്ട്.
