തമിഴ്‌നാട് മുഖ്യമന്ത്രി സി. ജോസഫ് വിജയ്‌യുമായുള്ള കൂടിക്കാഴ്ചയ്ക്ക് ശേഷം ഇൻസ്റ്റഗ്രാമിൽ വൈകാരികമായ കുറിപ്പ് പങ്കുവെച്ച് നടി വരലക്ഷ്മി ശരത്കുമാർ. വിജയ്‌യുടെ രാഷ്ട്രീയ നേതൃത്വത്തിലുള്ള തന്റെ പൂർണ്ണ വിശ്വാസവും ആരാധനയും പ്രകടിപ്പിച്ച നടി, തമിഴ്‌നാടിന്റെ ഉന്നമനത്തിനായി അദ്ദേഹം പ്രവർത്തിക്കുമെന്ന പ്രതീക്ഷയും പങ്കുവെച്ചു. ഭർത്താവ് നിക്കോളായ് സച്ച്‌ദേവിനൊപ്പമാണ് താരം വിജയ്‌യെ കാണാനെത്തിയത്.കൂടിക്കാഴ്ചയുടെ ചിത്രങ്ങളും വരലക്ഷ്മി പങ്കുവെച്ചിട്ടുണ്ട്.
‘ദളപതി.. ഈ പോസ്റ്റിനെക്കുറിച്ച് എന്താണ് പറയേണ്ടതെന്ന് ഞാൻ ഒരുപാട് ആലോചിച്ചു. പക്ഷേ അപ്പോഴാണ് ഓർത്തത് ഇതിനകം തന്നെ ഒരുപാട് കാര്യങ്ങൾ പറയപ്പെട്ടു കഴിഞ്ഞുവെന്ന്. അതുകൊണ്ട് ഒരു കാര്യം മാത്രം പറയാൻ ഞാൻ ആഗ്രഹിക്കുന്നു. ആളുകൾ നൂറുകൂട്ടം കാര്യങ്ങൾ പറഞ്ഞേക്കാം. പക്ഷേ ഒടുവിൽ... സി. ജോസഫ് വിജയ് നമ്മുടെ മുഖ്യമന്ത്രിയാണ്. അദ്ദേഹം ഇവിടെത്തന്നെയുണ്ടാകും.
വിമർശിക്കാൻ എളുപ്പമാണ്, എന്നാൽ ആദ്യ ശ്രമത്തിൽ തന്നെ മുഖ്യമന്ത്രിയായി തിരഞ്ഞെടുക്കപ്പെടാൻ അസാധ്യമായ ധൈര്യവും നിശ്ചയദാർഢ്യവും തമിഴ്‌നാട്ടിലെ ജനങ്ങളുടെ അളവറ്റ സ്നേഹവും ആവശ്യമാണ്..!! ഈ അധികാര പദവിയെ നമുക്ക് ആദരിക്കാം. വാക്കുകളേക്കാൾ ശക്തമായി പ്രവർത്തികൾ സംസാരിക്കും. എപ്പോഴും കുറ്റങ്ങൾ മാത്രം കണ്ടെത്തുന്നവരോട്, കാലം സത്യം വെളിപ്പെടുത്തും. അതുവരെ, അദ്ദേഹം യഥാർത്ഥത്തിൽ എന്താണ് കൈവരിക്കുന്നതെന്ന് കാണാൻ നമുക്ക് അൽപ്പം ക്ഷമയും ബഹുമാനവും പ്രോത്സാഹനവും നൽകാം.
എനിക്ക് നിങ്ങളെ ഒരുപാട് ഇഷ്ടമാണ് സാർ.. ഞാൻ എപ്പോഴും ഒരു "വിജയ് ആരാധികയായിരുന്നു, അങ്ങനെ തന്നെയായിരിക്കുകയും ചെയ്യും.
ഞങ്ങളെ കാണാനും ഇത്രയധികം സമയം ചിലവഴിക്കാനും തയ്യാറായതിന് നന്ദി.!! "സർക്കാർ" സിനിമയുടെ സെറ്റിൽ വെച്ച് ഞാൻ അദ്ദേഹത്തോട് പറഞ്ഞ കാര്യങ്ങൾ ഓർത്ത് ഞങ്ങൾ ചിരിച്ചു. അദ്ദേഹത്തിന്റെ യാത്ര ഈ വഴിയിലേക്കാണെന്ന് എനിക്ക് അന്ന് തന്നെ അറിയാമായിരുന്നു..
എപ്പോഴും ഊഷ്മളതയുള്ളവനും വിനയമുള്ളവനുമാണ് അദ്ദേഹം..
സ്ത്രീക്ഷേമവുമായി ബന്ധപ്പെട്ട ചില വിഷയങ്ങൾ ചർച്ച ചെയ്യാനും ഞങ്ങൾക്ക് കഴിഞ്ഞു. തമിഴ്‌നാട്ടിലെ ജനങ്ങൾക്കായി വരാനിരിക്കുന്ന അത്ഭുതകരമായ മാറ്റങ്ങൾ കാണാൻ ഞാൻ കാത്തിരിക്കുകയാണ്..!! ദൈവം നിങ്ങളെ അനുഗ്രഹിക്കട്ടെ സാർ, നിങ്ങളുടെ നേതൃത്വത്തിൽ തമിഴ്‌നാട്ടിലെ ജനങ്ങൾ അഭിവൃദ്ധിപ്പെടട്ടെ... ’വരലക്ഷ്മി കുറിച്ചു.
അടുത്തിടെ 'എസ് സരസ്വതി' എന്ന ചിത്രത്തിലൂടെ വരലക്ഷ്മി സംവിധായികയായി അരങ്ങേറ്റം കുറിച്ചിരുന്നു. നിലവിൽ 'റിസാന - എ കേജ്ഡ് ബേർഡ്' എന്ന ശ്രീലങ്കൻ സിനിമയുടെ ജോലിയിലാണ് താരം. അതേസമയം, വിജയ്‌യുടെ അവസാന ചിത്രമായ 'ജനനായകൻ' ജൂലൈ 23-ന് തിയേറ്ററുകളിൽ റിലീസ് ചെയ്യാൻ ഒരുങ്ങുകയാണ്.
Comments