ഒരു കാലത്ത് മലയാളസിനിമയില്‍ തിളങ്ങി നിന്നിരുന്ന താരമാണ് ലിസി പ്രിയദര്‍ശന്‍. ബാലചന്ദ്ര മേനോൻ സംവിധാനം ചെയ്ത ഇത്തിരി നേരം ഒത്തിരി കാര്യം എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച ലിസ്സി പിന്നീട് പ്രിയദർശൻ സംവിധാനം ചെയ്ത ബോയിങ്ങ് ബോയിങ്, ഓടരുതമ്മാവാ ആളറിയാം, ചിത്രം താളവട്ടം തുടങ്ങീ നിരവധി സിനിമകളില്‍ നായിക- സഹനായിക വേഷങ്ങളില്‍ തിളങ്ങി. മലയാളത്തിലെ പ്രിയ സംവിയാധകന്‍ പ്രിയദര്‍ശനെ വിവാഹം ചെയ്ത ലിസി പിന്നീട് സിനിമകളില്‍ നിന്ന് വിട്ടു നിന്നു. രണ്ട് മക്കളാണ് ഇവര്‍ക്കുള്ളത്. മകള്‍ കല്യാണി പ്രിയദര്‍ശന്‍, പാന്‍ ഇന്ത്യന്‍ തലത്തില്‍ വരെ ശ്രദ്ധ നേടിയ ഒരു തെന്നിന്ത്യന്‍ താരമാണ്.
ഇപ്പോഴിതാ തന്റെ മകളും അഭിനേത്രിയുമായ കല്യാണിയ്ക്കൊപ്പം സ്ക്രീന്‍ പങ്കിട്ട സന്തോഷം പങ്കിടുകയാണ് ലിസി പ്രിയദര്‍ശന്‍. ഇതില്‍ കൂടുതൽ സ്നേഹമുള്ള ഒരു സഹതാരത്തെ തനിക്ക് ചോദിക്കാൻ കഴിയുമായിരുന്നില്ലെന്നും കല്യാണിയത് അനായാസമായും ഗ്രേസോടെയും ആത്മാർത്ഥതയോടെയും പെര്‍ഫോം ചെയ്യുന്നത് കണ്ട് തന്നിൽ അപാരമായ അഭിമാനം നിറഞ്ഞെന്നും ലിസി കുറിച്ചു.
‘‘എന്റെ പ്രിയപ്പെട്ട കല്യാണി പ്രിയദർശൻ...
ഈ മനോഹരമായ കല്യാൺ ജ്വല്ലേഴ്‌സ് പരസ്യചിത്രത്തിൽ നീയുമായി സ്‌ക്രീൻ പങ്കിടാൻ കഴിഞ്ഞതിൽ എന്തൊരു തികഞ്ഞ സന്തോഷമായിരുന്നു! എനിക്ക് കംഫര്‍ട്ട് നല്‍കാനായി നീ നിന്റെ സേഫ് സോണില്‍ നിന്ന് പുറത്തേക്ക് കടന്നു, ഇതില്‍ കൂടുതൽ സ്നേഹമുള്ള ഒരു സഹതാരത്തെ എനിക്ക് ചോദിക്കാൻ കഴിയുമായിരുന്നില്ല... നീ വളരെ അനായാസമായും ഗ്രേസോടെയും ആത്മാർത്ഥതയോടെയും പെര്‍ഫോം ചെയ്യുന്നത് കണ്ട് എന്നിൽ അപാരമായ അഭിമാനം നിറഞ്ഞു...
‘ആന്റണി’ക്കും ‘ലോക’യ്ക്ക് വേണ്ടിയുള്ള കഠിനമായ പരിശീലന സെഷനുകൾക്ക് ശേഷം, ചതവുകളും കണങ്കാലിൽ ഉളുക്കുമായി നീ വീട്ടിലേക്ക് വന്ന ദിവസങ്ങളാണ് ഒരു അമ്മയെന്ന നിലയില്‍ ഞാൻ ഇപ്പോഴും ഓർക്കുന്നത്. അന്നെന്റെ ഹൃദയം നിനക്കായി വേദനിച്ചു. പിന്നെ, സുരഭി ലക്ഷ്മിയ്‌ക്കൊപ്പം ദിവസങ്ങൾ ചെലവഴിക്കുന്നത് കണ്ടപ്പോൾ, ‘ശേഷം മൈക്ക് ഇൽ ഫാത്തിമ’യ്‌ക്കായി പദാവലിയും ഭാഷാഭേദവും പൂര്‍ണ്ണമാക്കാന്‍ അശ്രാന്തം പരിശ്രമിക്കുന്നത് കണ്ടപ്പോള്‍, എനിക്ക് കൗതുകമല്ലാതെ മറ്റൊന്നും തോന്നിയില്ല... ക്രാഫ്റ്റിനോടുള്ള നിന്റെ സമർപ്പണവും അച്ചടക്കവും അഭിനിവേശവും എല്ലാ ദിവസവും എന്നെ പ്രചോദിപ്പിക്കുകയും അത്ഭുതപ്പെടുത്തുകയും ചെയ്യുന്നു...
നിന്റെ യഥാർത്ഥ അമ്മയായിരിക്കെ നിന്റെ റീൽ അമ്മയായി അഭിനയിക്കാന്‍ എനിക്ക് അവിശ്വസനീയമായ അവസരം ലഭിച്ചപ്പോൾ ജീവിതം പൂർണ്ണമായി! വാക്കുകൾക്ക് അതീതമായ ഒരു വികാരമായിരുന്നു അത്, ഞാൻ എന്നേക്കും വിലമതിക്കുന്ന ഒന്ന്...
ഈ വിലപ്പെട്ട നിമിഷം സാധ്യമാക്കിയ കല്യാണ് ജ്വല്ലേഴ്‌സിന് എന്റെ ഹൃദയം നിറഞ്ഞ നന്ദി... എന്റെ പ്രിയപ്പെട്ട പ്രേക്ഷകർക്കും ആരാധകർക്കും, നിങ്ങൾ എന്നോടൊപ്പം നിൽക്കുകയും വളരെ സ്നേഹത്തോടെ എന്നെ സ്വീകരിക്കുകയും ചെയ്തു. ഇന്ന്, ഈ മനോഹരമായ യാത്രയിലേക്ക് തിരിഞ്ഞുനോക്കുമ്പോൾ, എന്റെ ഹൃദയം നന്ദിയാൽ നിറഞ്ഞിരിക്കുന്നു... നിങ്ങളുടെ അചഞ്ചലമായ പിന്തുണയില്ലാതെ ഞാൻ ഇവിടെ ഉണ്ടാകുമായിരുന്നില്ല...നിങ്ങളോടൊപ്പമുള്ള ഇനിയും അവിസ്മരണീയമായ നിരവധി യാത്രകൾക്കായി ഞാൻ കാത്തിരിക്കുമ്പോൾ സ്നേഹവും പ്രോത്സാഹനവും നൽകി നിങ്ങളെന്നെ അനുഗ്രഹിക്കുന്നത് തുടരുക...’’ എന്ന ക്യാപ്ഷന്‍ നല്‍കിയാണ് കല്യാണിയ്ക്കൊപ്പമുള്ള തന്റെ പരസ്യചിത്രത്തിന്റെ വീഡിയോ പങ്കിട്ട് ലിസി കുറിച്ചത്.
നീണ്ട ഇടവേളയ്ക്ക് ശേഷം കല്യാൺ ജ്വല്ലേഴ്‌സിന്റെ ഏറ്റവും പുതിയ പരസ്യചിത്രത്തിന് വേണ്ടിയാണ് ലിസി വീണ്ടും കാമറയ്ക്ക് മുന്നിലെത്തിയത്. പ്രിയദർശൻ ആണ് ഈ പരസ്യം ഒരുക്കിയത്. സെറ്റിലെത്തിയ ലിസ്സിയെ ആലിംഗനം ചെയ്തു സ്വീകരിക്കുന്ന കല്യാണിയും ദൃശ്യങ്ങളിലുണ്ട്. ഫ ഷൂട്ടിനു മുൻപ് പ്രിയദർശനെ ആലിംഗനം ചെയ്ത് ലിസ്സി സംസാരിക്കുന്നതും സ്ക്രിപ്റ്റ് ചർച്ച ചെയ്യുന്നതും വിഡിയോയിൽ കാണാം. 1988ൽ പുറത്തിറങ്ങിയ ‘ചിത്രം’ എന്ന സിനിമയ്ക്ക് ശേഷം ആദ്യമായാണ് പ്രിയദർശന്റെ സംവിധാനത്തിൽ ലിസി അഭിനയിക്കുന്നത്. 1990 ഡിസംബറില്‍ വിവാഹിതരായ ഇവര്‍ 26 വർഷത്തെ ദാമ്പത്യത്തിനു ശേഷം 2016ൽ വേർപിരിഞ്ഞ പ്രിയദർശനും ലിസ്സിയും ഈയടുത്ത് വീണ്ടും ഒന്നിച്ചിരുന്നു.
Comments