മലയാളികള്‍ക്ക് ഏറെ പ്രിയപ്പെട്ട നടനും മിമിക്രി കലാകാരനുമാണ് നിയാസ് ബക്കര്‍. സമൂഹമാധ്യമങ്ങളില്‍ സജീവമായ നിയാസ് ബക്കര്‍ പങ്കുവയ്ക്കുന്ന പോസ്റ്റുകള്‍ എല്ലാം ശ്രദ്ധിക്കപ്പെടാറുണ്ട്. ഇപ്പോഴിതാ സംവിധായകന്‍ ജിയോ ബേബിക്കൊപ്പമുളള ചിത്രങ്ങളും കുറിപ്പും പങ്കുവച്ചിരിക്കുകയാണ് താരം.
മറിമായത്തിന്റെ തുടക്കകാലത്താണ് താന്‍ ജിയോയെ പരിചയപ്പെടുന്നതെന്ന് നിയാസ് ബക്കര്‍ പറയുന്നു. അന്ന് മറിമായത്തിന് വേണ്ടി സ്‌ക്രിപ്റ്റ് എഴുതിയ ചെറുപ്പക്കാരന്‍ ഇന്ന് മലയാള സിനിമയിലെ ശ്രദ്ധേയനായ സംവിധായകനായി വളര്‍ന്നത് കാണുമ്പോള്‍ ഒരു സുഹൃത്ത് എന്ന നിലയില്‍ തനിക്ക് ഏറെ സന്തോഷവും അഭിമാനവും തോന്നുന്നു എന്നും നിയാസ് ബക്കര്‍ കുറിച്ചു.
നിയാസ് ബക്കറിന്റെ കുറിപ്പ്:
ഒരു പഴയ സൗഹൃദം… ഒരു പുതിയ കൂടിക്കാഴ്ച…
ഇന്നലെ അതിരടി സിനിമയുടെ വിജയാഘോഷത്തിനിടയിൽ, director and script writer കൂടിയായ സുഹൃത്ത് ജിയോ ബേബിയെ ഒരുപാട് നാളുകൾക്ക് ശേഷം വീണ്ടും കണ്ടുമുട്ടിയപ്പോൾ മനസ്സിൽ ആദ്യം ഓടിയെത്തിയത് പഴയ മറിമായം കാലത്തെ ഓർമ്മകളായിരുന്നു. മറിമായത്തിന്റെ തുടക്കകാലത്താണ് ജിയോയെ ഞാൻ പരിചയപ്പെടുന്നത്. അന്ന് അദ്ദേഹം നൽകിയിരുന്ന നല്ല കുറെ സ്ക്രിപ്റ്റുകളും, മറിമായത്തിന് വളരെയേറെ ഗുണം ചെയ്തിട്ടുണ്ട്.
ഇന്നത്തെ കൂടിക്കാഴ്ചയ്ക്കിടയിൽ അതിരടിയിലെ SI വേഷം വളരേ നന്നായിരുന്നു എന്ന് ഞാൻ ഓർമ്മപ്പെടുത്തിയപ്പോൾ അദ്ദേഹം മറ്റൊരു പഴയ ഓർമ്മയും എന്നെ ഓർമ്മിപ്പിച്ചു.— ഞങ്ങൾ ഒരുമിച്ച് അഭിനയിച്ച ഒരു എപ്പിസോഡ്. അതിൽ ജിയോ എന്റെ അച്ഛനായി അഭിനയിച്ചിരുന്നു. കാലം കടന്നുപോയപ്പോൾ മനസ്സിന്റെ ഏതോ കോണിൽ മറഞ്ഞുപോയ ആ മനോഹരമായ ഓർമ്മ, അദ്ദേഹം പറഞ്ഞപ്പോഴാണ് വീണ്ടും തെളിഞ്ഞുവന്നത്.
അന്ന് മറിമായത്തിനായി എഴുതിയിരുന്ന ആ ചെറുപ്പക്കാരൻ പിന്നീട് മലയാള സിനിമയിൽ തന്റേതായ ഒരു ഇടം നേടിയ സംവിധായകനായി വളർന്നത് കാണുമ്പോൾ, ഒരു സുഹൃത്ത് എന്ന നിലയിൽ ഒരുപാട് സന്തോഷവും അഭിമാനവും തോന്നുന്നു. ദി ഗ്രേറ്റ് ഇന്ത്യൻ കിച്ചൻ, കാതൽ – ദി കോർ തുടങ്ങി വ്യത്യസ്തമായ ചിന്തകളും ശക്തമായ മനുഷ്യകഥകളും പറഞ്ഞുകൊണ്ട് ജിയോ മലയാള സിനിമയ്ക്ക് സമ്മാനിച്ച സിനിമകൾ എന്നും ഓർമ്മിക്കപ്പെടുന്നവയാണ്.
മറിമായത്തിന്റെ പഴയ കൂട്ടുകാരനിൽ നിന്ന് മലയാള സിനിമയുടെ ശ്രദ്ധേയനായ സംവിധായകനിലേക്കുള്ള ജിയോയുടെ യാത്ര… അതിന് സാക്ഷിയാകാൻ കഴിഞ്ഞതിൽ ഒരു സുഹൃത്ത് എന്ന നിലയിൽ ഏറെ സന്തോഷവും അഭിമാനവും. ഇന്നത്തെ ഈ കൂടിക്കാഴ്ചയും, ജിയോ ഓർമ്മിപ്പിച്ച ആ പഴയ എപ്പിസോഡും… മനസ്സിൽ സൂക്ഷിക്കാൻ പറ്റിയ മറ്റൊരു മനോഹരമായ ഓർമ്മയായി. പ്രിയ ജിയോ… ഇനിയും ഒരുപാട് നല്ല സിനിമകൾക്കായി കാത്തിരിക്കുന്നു. സ്നേഹത്തോടെ.
Comments