‘മയൂഖം’ എന്ന ചിത്രത്തിലൂടെ അരങ്ങേറ്റം കുറിച്ച് പിന്നീട് ശക്തമായ നിരവധി കഥാപാത്രങ്ങളിലൂടെ മലയാളികള്‍ക്ക് ഏറെ പ്രിയപ്പെട്ട അഭിനേത്രികളില്‍ ഒരാളായ മാറിയ താരമാണ് മംമ്ത മോഹന്‍ദാസ്. വെള്ളിത്തിരയില്‍ കരുത്തുറ്റ കഥാപാത്രങ്ങള്‍ അവതരിപ്പിക്കാറുള്ള താരം വ്യക്തി ജീവിതത്തിലും പലര്‍ക്കും പ്രചോദനമായി മാറിയിട്ടുണ്ട്.
താനൊരു കാൻസർ രോഗിയാണെന്ന് അറിഞ്ഞിട്ടും അതൊന്നും കൂസാതെ ചികിത്സയ്ക്കായി തനിച്ച് യു.എസിലേക്ക് പോയ താരം ജീവിതം തനിക്ക് മുന്നിൽ ഉയർത്തിയ ഓരോ തടസ്സങ്ങളെയും തന്റെ ഇച്ഛാശക്തി കൊണ്ട് മറികടന്ന പോരാളിയാണ്. കരിയറിലെ ആദ്യ പരാജയത്തിലോ, മാരകമായ രോഗാവസ്ഥകളിലോ തളരാതെ, പോസിറ്റീവ് എനർജിയോടെയാണ് മംമ്ത മുന്നേറിയത്. ഇന്നും മികച്ച കഥാപാത്രങ്ങള്‍ അവതരിപ്പിച്ച് താരം ബിഗ്സ്ക്രീനില്‍ തിളങ്ങി നില്‍ക്കുകയാണ്. സോഷ്യല്‍ മീഡിയയിലും സജീവമായ താരം തന്റെ എല്ലാ വിശേഷങ്ങളും ഫോട്ടോഷൂട്ടുകളും സന്തോഷങ്ങളും അതിലൂടെ പങ്കിടാറുണ്ട്.
ഇപ്പോഴിതാ കാലിഫോർണിയയിലെ ബിഗ് സൂരിലുള്ള ചരിത്രപ്രസിദ്ധമായ ബിക്സ്ബി ക്രീക്ക് പാലത്തിൽ നിന്നുള്ള അവിസ്മരണീയമായ ഫോട്ടോഷൂട്ട് ചിത്രങ്ങള്‍ പങ്കിടുകയാണ് മംമ്ത മോഹന്‍ദാസ്. ആ ലാൻഡ്‌മാർക്കിനെ തന്റെ വ്യക്തിപരമായ കഥയുടെ വലിയൊരു ഭാഗമാണെന്ന് വിശേഷിപ്പിച്ചാണ് മംമ്ത ചിത്രങ്ങള്‍ പങ്കിട്ടിരിക്കുന്നത്.
‘‘ഒരു ചരിത്ര പാലം.. അത് എന്റെ കഥയുടെ വലിയൊരു ഭാഗമാണ്...’’ എന്ന ക്യാപ്ഷന്‍ നല്‍കിയാണ് കാലിഫോര്‍ണിയയിലെ ബിക്സ്ബി പാലത്തിന്റെ പശ്ചാത്തലത്തിലുള്ള ചിത്രങ്ങള്‍ മംമ്ത പങ്കിട്ടിരിക്കുന്നത്. ലോകത്തിലെ ഏറ്റവും ഉയരംകൂടിയ സിംഗിൾ-സ്പാൻ കോൺക്രീറ്റ് ആർച്ച് പാലങ്ങളിൽ ഒന്നാണിത്. ചിത്രങ്ങളില്‍ ഓഫ്-വൈറ്റ് ഫിറ്റഡ് ബോഡികോൺ മിനി ഡ്രസിലാണ് താരം തിളങ്ങുന്നത്. ഷീര്‍ ലേസ് ലോംഗ് സ്ലീവ്സുകളും ഹെംലൈനിലും നെക്ക്‌ലൈനിലും സ്കല്ലോപ്പ്-ഡീറ്റൈയിലിംഗും പോം-പോം ആക്‌സന്റുകളുള്ള ഓഫ്-വൈറ്റ് കേപ്പുമാണ് ഈ ഡ്രസ്സിന് മോഡേണ്‍ ഹോട്ട് ലുക്ക് നല്‍കുന്നത്. പതിവു പോലെ താരത്തിന്റെ പുത്തന്‍ ചിത്രങ്ങളും ഏറ്റെടുക്കുകയാണ് ആരാധകര്‍.
Comments