തമിഴകത്തിന്റെ പ്രിയതാരം സൂര്യയെ നായകനാക്കി സൂപ്പർഹിറ്റ് തെലുങ്ക് സംവിധായകൻ വെങ്കി അറ്റ്ലൂരി ഒരുക്കുന്ന പുതിയ ചിത്രമാണ് 'വിശ്വനാഥ് ആൻഡ് സൺസ്’. സൂര്യയുടെ കരിയറിലെ 46-ാമത്തെ ചിത്രമായ ‘വിശ്വനാഥ് ആന്‍ഡ് സണ്‍സ്’, ബ്ലോക്ക്ബസ്റ്റർ ഹിറ്റായ ‘ലക്കി ഭാസ്‌കറി’ന് ശേഷം വെങ്കി അറ്റ്ലൂരി ഒരു ഗംഭീര ഫാമിലി എന്റർടെയ്‌നറാണ്. ചിത്രത്തിലെ ഗാനങ്ങളെല്ലാം തന്നെ ഇതിനോടകം തന്നെ ഹിറ്റാണ്.
പ്രണയം, ഹാസ്യം, വൈകാരിക നിമിഷങ്ങൾ, മികച്ച ഗാനങ്ങൾ എന്നിവ കോർത്തിണക്കി, സൂര്യ ആരാധകർക്കും കുടുംബ പ്രേക്ഷകർക്കും ഒരുപോലെ ആസ്വദിക്കാവുന്ന രീതിയില്‍ ഒരുക്കിയിരിക്കുന്ന ഈ ചിത്രത്തില്‍ മലയാളികളുടെ പ്രിയതാരം മമിത ബൈജുവാണ് നായിക. രവീണ ടണ്ഡൻ, രാധിക ശരത്കുമാർ, ഭവാനിശ്രീ എന്നിവരാണ് ചിത്രത്തിലെ മറ്റു താരങ്ങൾ. ഓഗസ്റ്റ് 14 ന് റിലീസ് കാത്തിരിക്കുന്ന ചിത്രത്തിന്റെ പ്രൊമോഷന്‍ തിരക്കുകളിലാണ് താരങ്ങളും അണിയറപ്രവര്‍ത്തകരും.
ഇപ്പോഴിതാ സിനിമയുടെ പ്രമോഷണൽ പരിപാടി നടന്ന ഒരു വേദിയിൽ വച്ച് സംവിധായകന്‍ വെങ്കി അറ്റ്ലൂരിയും സൂര്യയും തമ്മിലുള്ള ഹൃദയസ്പർശിയായ ഒരു നിമിഷമാണ് സോഷ്യല്‍ മീഡിയ കീഴടക്കുന്നത്. വേദിയില്‍ വച്ച് സൂര്യ സദസ്സിനോട് സംസാരിക്കുമ്പോള്‍ തൊട്ടടുത്ത് സംവിധായകന്‍ വെങ്കി അറ്റ്ലൂരിയുമുണ്ട്. സൂര്യ സംസാരിക്കുന്ന സമയത്ത് വെങ്കി പെട്ടെന്ന് സൂര്യയെ സമീപിച്ച് മുകളിലേക്ക് നോക്കാൻ ആവശ്യപ്പെട്ടു. സൂര്യ മുകളിലേക്ക് നോക്കിയ അതേ സമയത്ത്, വെങ്കി അറ്റ്ലൂരി കുനിഞ്ഞ് ആദരസൂചകമായി താരത്തിന്റെ കാലിൽ സ്പർശിച്ചു. സൂര്യ അത്ഭുതപ്പെട്ടതിനൊപ്പം സംവിധായകന്റെ ആരാധനാ പ്രകടനത്തിന് ഊഷ്മളമായും കളിയായും സൂര്യ മറുപടിയും നൽകി. നിമിഷനേരം കൊണ്ടാണ് ഈ വീഡിയോ സോഷ്യല്‍ മീഡിയയില്‍ വൈറലായത്. നിരവധി ആരാധകരാണ് ഈ വീഡിയോയ്ക്ക് താഴെ ഹൃദയം കവരും കമന്റുകള്‍ കുറിക്കുന്നത്. ‘വെങ്കി അറ്റ്ലൂരി, താങ്കള്‍ ശരിക്കും ഇമോഷണലാക്കി, ഈ സിനിമാ വ്യവസായത്തിൽ നിരവധി നായകന്മാരുണ്ടാകാം, പക്ഷേ എല്ലാവർക്കും സൂര്യയാകാൻ കഴിയില്ല, ശരിക്കുമൊരു ഫാന്‍ മൊമന്റ്...’ എന്നതടക്കമാണ് കമന്റുകള്‍. ‘കറുപ്പ്’ എന്ന ചിത്രത്തിലൂടെ വമ്പന്‍ തിരിച്ചു വരവ് നടത്തിയ സൂര്യയുടെ റൊമാന്റിക് ഡ്രാമ ചിത്രമായ ‘വിശ്വനാഥ് & സൺസി’ന് വേണ്ടി കാത്തിരിക്കുകയാണ് ആരാധകര്‍.
Comments