ദില്ലി: അച്ഛന്റെ വേർപാടിന്g പിന്നാലെ വികാരനിർഭരമായ കുറിപ്പുമായി അർജന്റീന നായകൻ ലിയോണൽ മെസ്സി. ഫുട്ബോളിൽ ഇനി എത്രകാലം തുടരാനാകുമെന്നതിൽ സംശയമുണ്ടെന്ന് മെസ്സി വ്യക്തമാക്കി. അച്ഛൻ ഹോർഹെ മെസ്സിയുടെ മരണശേഷമുള്ള താരത്തിന്റെ ആദ്യ പ്രതികരണമാണിത്.
ഓഗസ്റ്റ് ഏഴിനാണ് ദീർഘകാലമായി രോഗബാധിതനായിരുന്ന ഹോർഹെ മെസ്സി അന്തരിച്ചത്. അച്ഛനില്ലാതെ മുന്നോട്ട് പോകുന്നത് ഏറെ പ്രയാസമാണെന്നും ഇനി എന്ത് ചെയ്യണമെന്ന് അറിയില്ലെന്നും മെസ്സി സമൂഹമാധ്യമ കുറിപ്പിൽ പറഞ്ഞു.
കുട്ടിക്കാലം മുതൽ തന്റെ വളർച്ചയിൽ അച്ഛൻ വഹിച്ച പങ്കും തനിക്കായി നടത്തിയ ത്യാഗങ്ങളും മെസ്സി ഓർത്തെടുത്തു. പിതാവ്, സുഹൃത്ത്, പ്രതിനിധി എന്നീ നിലകളിലെല്ലാം അദ്ദേഹം തനിക്കായി ശരിയായ തീരുമാനങ്ങളാണ് എടുത്തതെന്നും മെസ്സി കുറിച്ചു.
അവസാനമായി ഒരു ലോകകപ്പ് കൂടി കളിക്കണമെന്നത് അച്ഛന്റെ നിരന്തരമായ ആഗ്രഹമായിരുന്നുവെന്നും മെസ്സി പറഞ്ഞു. എന്നാൽ അച്ഛൻ ഗാലറിയിലില്ലാതിരുന്ന ആദ്യ ടൂർണമെന്റായിരുന്നു അതെന്നും ഓരോ മത്സരത്തിനും ശേഷം അദ്ദേഹത്തിന്റെ സന്ദേശത്തിനായി കാത്തിരുന്നുവെന്നും താരം ഓർത്തെടുത്തു.
ലോകകപ്പ് കിരീടം അച്ഛന് വേണ്ടി നേടിക്കൊടുക്കണമെന്നായിരുന്നു ആഗ്രഹം. എന്നാൽ ഫൈനൽ വരെയെത്തിയെങ്കിലും അത് സാധിച്ചില്ലെന്നും ടൂർണമെന്റിലുടനീളം ശരീരവും കാലുകളും തളർന്നിരുന്നതായും മെസ്സി വ്യക്തമാക്കി.
‘നിങ്ങളില്ലാതെ ഇനി എന്ത് ചെയ്യണമെന്ന് അറിയില്ല. എങ്ങനെ മുന്നോട്ട് പോകണമെന്നും അറിയില്ല. കളിക്കളത്തിൽ ഇനി എത്രകാലം തുടരുമെന്നതിലും വലിയ സംശയമുണ്ട്’ എന്ന മെസ്സിയുടെ വാക്കുകൾ ആരാധകരിലും കായികലോകത്തും നിരാശയുണ്ടാക്കുന്നതാണ്. തുടക്കം മുതൽ ഒപ്പമുണ്ടായിരുന്ന അച്ഛൻ ലക്ഷ്യത്തോട് അടുത്തെത്തിയപ്പോൾ കുറച്ചുകൂടി കാത്തിരിക്കാമായിരുന്നുവെന്നും മെസ്സി കുറിച്ചു.
Comments