' ചേച്ചി തന്ന സ്‌നേഹവും ഓര്‍മ്മകളും ഒരിക്കലും മായില്ല' ; നൊമ്പര കുറിപ്പുമായി രക്ഷ രാജ്

തനിക്ക് ഏറെ പ്രിയപ്പെട്ട ചേച്ചിയുടെ വിയോഗത്തില്‍ വേദന പങ്കുവച്ച് നടി രക്ഷ രാജ്. കസിന്‍ ചേച്ചിയല്ല തനിക്ക് നഷ്ടമായത് തന്റെ സ്വന്തം ചേച്ചിയെയാണെന്ന് രക്ഷ കുറിച്ചു. ചേച്ചിയോടൊപ്പമുളള ഓരോ ഓര്‍മ്മയും ഇനി തന്റെ ജീവിതത്തിലെ വിലപ്പെട്ട സമ്പത്താണെന്നും രക്ഷ പറയുന്നു.

''അകാലത്തിൽ ഞങ്ങളെ വിട്ടുപോയ എന്റെ സ്വന്തം Basini ചേച്ചി… Cousin ചേച്ചിയല്ല… എനിക്ക് നഷ്ടമായത് എന്റെ സ്വന്തം ചേച്ചിയെയാണ്. ഈ മക്കൾ കഴിഞ്ഞാൽ, ഈ നഷ്ടത്തിന്റെ ആഴവും വേദനയും ഏറ്റവും കൂടുതൽ അനുഭവിക്കുന്നത് ഒരുപക്ഷേ ഞാനായിരിക്കും.
ചേച്ചിയുമായി സംസാരിക്കാത്ത ദിവസങ്ങൾ വിരളമായിരുന്നു. അതുകൊണ്ടുതന്നെ, ഇന്നേക്ക് ഇരുപതാം നാൾ… ഈ കുറിപ്പ് ഒന്ന് എഴുതി തീർക്കാൻ പോലും എനിക്ക് ഇത്രയും ദിവസങ്ങൾ വേണ്ടിവന്നു.

ചേച്ചി എന്നോട് പറഞ്ഞ ആഗ്രഹങ്ങൾ എനിക്ക് സാധിച്ചുകൊടുക്കാൻ കഴിഞ്ഞു എന്നത് മാത്രമാണ് ഇപ്പോഴുള്ള ചെറിയൊരു ആശ്വാസം.
ആരോടും ഒരു വെറുപ്പോ വിദ്വേഷമോ കാണിക്കാത്ത മനസ്സ്… മക്കളെ ജീവനേക്കാൾ സ്നേഹിച്ച അമ്മ… ജീവിതത്തിലെ എല്ലാത്തിനെയും ചിരിച്ചുകൊണ്ട് നേരിട്ട കളങ്കമില്ലാത്ത മനസ്സിന്റെ ഉടമ… അതായിരുന്നു ചേച്ചി.

വന്നു… ഞങ്ങളെ സന്തോഷിപ്പിച്ചു… ഒരായുസ്സ് മുഴുവൻ ഓർത്തിരിക്കാനുള്ള ഒരുപാട് നല്ല ഓർമ്മകൾ സമ്മാനിച്ചു… ഒടുവിൽ ഒരു യാത്ര പോലും പറയാതെ ചേച്ചി ഞങ്ങളെ വിട്ടുപോയി. ഇപ്പോഴും ചേച്ചി ഞങ്ങളെ വിട്ടുപോയി എന്ന് വിശ്വസിക്കാൻ മനസ്സിന് കഴിയുന്നില്ല. എവിടെയോ ഒരു ദൂരയാത്ര പോയിരിക്കുകയാണെന്നും, ഒരിക്കൽ തിരിച്ചുവരുമെന്നുമാണ് മനസ്സ് ഇപ്പോഴും പറയുന്നത്.

ചേച്ചിയോടൊപ്പമുള്ള ഓരോ ഓർമ്മയും ഇനി എന്റെ ജീവിതത്തിലെ ഏറ്റവും വിലപ്പെട്ട സമ്പത്താണ്. സമയം കടന്നുപോകുംതോറും ചേച്ചിയുടെ അഭാവം കൂടുതൽ വേദനിപ്പിച്ചേക്കാം… പക്ഷേ ചേച്ചി തന്ന സ്നേഹവും ഓർമ്മകളും ഒരിക്കലും മായില്ല. ഇനിയൊരു ജന്മമുണ്ടെങ്കിൽ, എന്റെ സ്വന്തം ചേച്ചിയായി എന്റെ കൂടെ ഉണ്ടാകണേ… എന്ന പ്രാർത്ഥനയോടെ…''. രക്ഷ കുറിച്ചു.