' അമ്മയാണ് എന്റെ ജീവിതത്തിലെ തൂണ്‍, എല്ലാ കാര്യങ്ങളും തുറന്ന് പറയുന്നത് അനുജത്തിയോടാണ് ' ; ജേസണ്‍ സഞ്ജയ്

വിജയ്‌യുടെ മകൻ ജേസൺ സഞ്ജയ് ആദ്യമായി സംവിധാനം ചെയ്യുന്ന ചിത്രമാണ് 'സിഗ്മ' . ചിത്രത്തിന്റെ റിലീസിന് മുന്നോടിയായുള്ള പ്രമോഷൻ തിരക്കുകളിലാണിപ്പോള്‍ ജേസണ്‍. സിനിമയുടെ വിശേഷങ്ങൾ പങ്കുവെക്കുന്നതിനിടെ തൻ്റെ കുടുംബത്തെക്കുറിച്ച് ജേസൺ നടത്തിയ തുറന്നുപറച്ചിലുകളാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.

എസ്.എസ്. മ്യൂസിക്കിന് നൽകിയ അഭിമുഖത്തിലാണ് മാതാപിതാക്കളായ വിജയ്, സംഗീത എന്നിവരെക്കുറിച്ചും സഹോദരിയെക്കുറിച്ചും ജേസൺ മനസ്സ് തുറന്നത്. തൻ്റെ ജീവിതത്തിലും സിനിമയിലേക്കുള്ള യാത്രയിലും ഏറ്റവും വലിയ പിന്തുണയായി കൂടെ നിന്നത് അമ്മയാണെന്ന് ജേസൺ വ്യക്തമാക്കി.

“എന്റെ ജീവിതത്തിലെ ഏറ്റവും വലിയ തൂൺ അമ്മയാണ്. എന്റെയും സഹോദരിയുടെയും കാര്യങ്ങളെക്കുറിച്ച് 24 മണിക്കൂറും അമ്മ ചിന്തിക്കും. ഒരു ദിവസം ഞാൻ അമ്മയെ വിളിക്കാൻ മറന്നാൽ പോലും എന്തുപറ്റിയെന്ന് ചോദിച്ച് അമ്മ തിരിച്ചു വിളിക്കും,” ജേസൺ പറഞ്ഞു.

എന്നാൽ മാതാപിതാക്കളോട് എല്ലാ കാര്യങ്ങളും തുറന്നുപറയാൻ തനിക്ക് ഇപ്പോഴും ചെറിയ മടിയുണ്ടെന്നും അദ്ദേഹം വെളിപ്പെടുത്തി. അത്തരം കാര്യങ്ങൾ തുറന്ന് സംസാരിക്കാൻ മാതാപിതാക്കൾ തനിക്ക് അത്രയും സ്വാതന്ത്ര്യം നൽകിയിട്ടില്ലെന്നും ജേസൺ പറഞ്ഞു.

“അച്ഛനോടും അമ്മയോടും എല്ലാം പറയാൻ എനിക്ക് ചെറിയ മടിയുണ്ട്. അവർ എനിക്ക് അത്തരമൊരു ഇടം നൽകിയിട്ടില്ല. എന്നാൽ എന്റെ സഹോദരിയോട് എനിക്ക് എല്ലാ കാര്യങ്ങളും തുറന്ന് സംസാരിക്കാം,” ജേസൺ വ്യക്തമാക്കി.

സുന്ദീപ് കിഷൻ നായകനാകുന്ന ‘സിഗ്മ’യിലൂടെയാണ് ജേസൺ സഞ്ജയ് സംവിധായകനായി അരങ്ങേറ്റം കുറിക്കുന്നത്. സാമ്പത്ത്, രാജു സുന്ദരം എന്നിവരും ചിത്രത്തിൽ പ്രധാന വേഷങ്ങളിലുണ്ട്.