തിരുവനന്തപുരം: മുഖ്യമന്ത്രി വി.ഡി. സതീശന്റെ വാഹനം തടഞ്ഞ് ഭീഷണിപ്പെടുത്തിയ കേസില് അറസ്റ്റിലായ ഡി.സി.സി. അംഗം അനില്കുമാറിനെ (ചേന്തി അനി) കോണ്ഗ്രസ് പുറത്താക്കി. മുഖ്യമന്ത്രിയുടെ ഔദ്യോഗിക കൃത്യനിര്വഹണം തടസപ്പെടുത്തിയതിനു ശ്രീകാര്യം പോലീസ് അറസ്റ്റ് ചെയ്ത അനിലിനെ കോടതി 14 ദിവസത്തേക്ക് റിമാന്ഡ് ചെയ്തിരുന്നു.
അനില് പോലീസിന്റെ ഗുണ്ടാപ്പട്ടികയില് ഉള്പ്പെട്ടയാളാണെന്നും ശ്രീകാര്യം, തുമ്പ, മെഡിക്കല് കോളജ് പോലീസ് സ്റ്റേഷനുകളില് ഇയാള്ക്കെതിരേ ക്രിമിനല് കേസുകളുണ്ടെന്നും റിമാന്ഡ് റിപ്പോര്ട്ടില് പറയുന്നു. ചെമ്പഴന്തിയില് ശ്രീനാരായണഗുരു ജയന്തി ആഘോഷപരിപാടിയില് പങ്കെടുക്കാതിരുന്നതില് പ്രതിഷേധിച്ചാണ് അനില് മുഖ്യമന്ത്രിയുടെ വാഹനവ്യൂഹം തടഞ്ഞത്. മുഖ്യമന്ത്രിക്കു മുന്നോട്ടുപോകാന് കഴിയാത്ത തരത്തില് മാര്ഗതടസം സൃഷ്ടിച്ചഅനില്, 'ഏറ്റ പരിപാടിയല്ലേ, എന്താ പങ്കെടുക്കാത്തത്?' എന്ന് ഉച്ചത്തില്
ചോദിച്ചെന്നു റിമാന്ഡ് റിപ്പോര്ട്ടില് പറയുന്നു. 'നീ എന്തിനാണ്ദേഷ്യപ്പെടുന്നത്?' എന്ന് മുഖ്യമന്ത്രി ചോദിച്ചപ്പോള്, 'ചൂടായാല് നീ എന്തു ചെയ്യും?' എന്ന് ഭീഷണിപ്പെടുത്തി. കഴിഞ്ഞ 28-നു രാത്രി കസ്റ്റഡിയിലെടുത്ത അനിലിന്റെ അറസ്റ്റ് ഇന്നലെ രാവിലെയാണ് രേഖപ്പെടുത്തിയത്. പ്രതിക്ക് ജാമ്യം നല്കിയാല് തെളിവുകള് നശിപ്പിക്കാനും സാക്ഷികളെ സ്വാധീനിക്കാനും സാധ്യതയുണ്ടെന്നു പോലീസ് കോടതിയെ അറിയിച്ചു.നിരവധി ക്രിമിനല് കേസുകളിലെ പ്രതി എങ്ങനെ ഡി.സി.സി. അംഗമായെന്ന ചോദ്യം കോണ്ഗ്രസിനുള്ളിലും ഉയരുന്നു. ഇയാള് അറസ്റ്റിലായതിനേത്തുടര്ന്ന് കെ.പി.സി.സി. നേതൃത്വം ഇടപെടുകയും ഡി.സി.സി. പ്രസിഡന്റ് എന്. ശക്തന് സംഘടനാച്ചുമതലയുള്ള നേതാക്കളുമായി കൂടിയാലോചിച്ച് നടപടി സ്വീകരിക്കുകയുമായിരുന്നു. തിരുവനന്തപുരം നഗരസഭയിലെ കോണ്ഗ്രസ് കൗണ്സിലറുടെ ഭര്ത്താവ് കൂടിയായ അനില്, പ്രാദേശികരാഷ്ട്രീയത്തിലെ സ്വാധീനമുപയോഗിച്ചാണ് പാര്ട്ടിയില് ഉയര്ന്നുവന്നതെന്ന് ആരോപണമുണ്ട്.
Comments