കോഴിക്കോട്: ചേവായൂരില്‍ കാര്‍ കത്തി യാത്രക്കാരന്‍ മരിച്ച സംഭവത്തില്‍ ദുരൂഹതയേറുന്നു. ചേവായൂര്‍ സ്വദേശി സി.പി സുധാകരനാ (65)ണ് മരിച്ചത്. കാറിന് സമീപത്ത് നിന്നും മീറ്ററുകള്‍ മാത്രം അകലെ പെട്രോള്‍ നിറച്ച കന്നാസ് കണ്ടെത്തിയിട്ടുണ്ട്. അപകടം നടക്കുന്നത് സുധാകരന്റെ വീടിന് തൊട്ടടുത്തുവെച്ചായിരുന്നു. വാഹനം ഓടിക്കുമ്പോള്‍ ഉറങ്ങിപ്പോയി അപകടം സംഭവിക്കാനുള്ള സാധ്യത പോലീസ് തള്ളിയിട്ടുണ്ട്.
വാഹനം മതിലില്‍ ഇടിച്ച് തീ പിടിക്കാനുള്ള സാധ്യത വിരളമാണെന്ന് പോലീസ് പറയുന്നു. പെട്രോള്‍ കന്നാസിന്റെ സാന്നിദ്ധ്യം കണ്ടെത്തിയ സാഹചര്യത്തില്‍ പെട്രോളൊഴിച്ച് ആത്മഹത്യ ചെയ്തതാണോ എന്നു സംശയമുണ്ട്. എന്നാല്‍ അക്കാര്യത്തില്‍ സ്ഥിരീകരണം വന്നിട്ടില്ല.
സംഭവത്തില്‍ ബന്ധുക്കളുടെ മൊഴിയെടുക്കാനൊരുങ്ങുകയാണ് പോലീസ്. സുധാകരന് ഏതെങ്കിലും മാനസീകപ്രയാസം ഉണ്ടായിരുന്നോ എന്ന് പോലീസ് ആരായും. സംഭവത്തില്‍ കാറും പരിസരവും ഫോറന്‍സിക് പരിശോധന നടത്തേണ്ടതുണ്ട്. കോംപസ് എന്ന മോഡല്‍ കാറാണ് തീപിടിച്ച ശേഷം കാര്‍ മതിലില്‍ ഇടിച്ചതാണോ എന്ന് സംശയമുണ്ട്.
ഇറക്കം ഇറങ്ങി വരുന്നതിനിടെ വാഹനത്തിന്റെ നിയന്ത്രണം നഷ്ടമായി മതിലില്‍ ഇടിച്ചതായാണ് ആദ്യം കരുതിയിരുന്നത്. വാഹന, സ്ഥല കച്ചവടം നടത്തുന്ന അദ്ദേഹം ഇടപാടുമായി ബന്ധപ്പെട്ട് കൊയിലാണ്ടിയിലേക്ക് പോവുകയായിരുന്നു. രാവിലെ നാലു മണിയോടെ വീട്ടില്‍നിന്ന് വാഹനവുമായി ഇറങ്ങിയതാണ്. കാര്‍ പൂര്‍ണമായും കത്തി. രാവിലെ കോഴിക്കോട് മെഡിക്കല്‍ കോളജ് പൊലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്.
Comments