ആലപ്പുഴ: മോഷ്ടിച്ച ബൈക്കില്‍ മോഷണം നടത്തിയ ശേഷം അമിതവേഗത്തില്‍ പോയി അപകടത്തില്‍പെട്ട് രണ്ടു യുവാക്കള്‍ക്ക് ദാരുണാന്ത്യം. ആലപ്പുഴ കൈചൂണ്ടി മുക്കില്‍ ഇന്ന് പുലര്‍ച്ചെയാണ് അപകടമുണ്ടായത്. സംഭവത്തില്‍ പെട്ട ഒരാളുടെ നില ഗുരുതരമാണ്. രണ്ടുപേരും അപകടസ്ഥലത്തുവെച്ച് തന്നെ മരിച്ചതായി പോലീസ് വ്യക്തമാക്കി. ബൈക്ക് അമിതവേഗത്തില്‍ ആയിരുന്നു. ആര്‍ക്കും ഹെല്‍മറ്റും ഇല്ലായിരുന്നു.
ഇന്ന് പുലര്‍ച്ചെ 4 മണിക്ക് മണ്ണഞ്ചേരിയില്‍ നിന്നും ആലപ്പുഴ നഗരത്തിലേക്ക് പോകുമ്പോഴായിരുന്നു അപകടം. സ്‌പ്ലെണ്ടര്‍ ബൈക്കിലായിരുന്നു മൂവരുടേയും യാത്ര. ഹെല്‍മറ്റ് പോലുമില്ലാതെ അമിതവേഗതയില്‍ പോകുമ്പോള്‍ ഒരു നായ കുറുകെ ചാടുകയും ബൈക്ക് നിയന്ത്രണം വിട്ട് എതിര്‍വശത്തുകൂടി വേഗത്തില്‍ എത്തിയ വാഹനത്തില്‍ ഇടിക്കുകയുമായിരുന്നു. ഇടിയുടെ ആഘാതത്തില്‍ ബൈക്ക് തെറിച്ചുവീഴുന്നതിന്റെ സിസിടിവി ദൃശ്യം പുറത്തുവന്നിട്ടുണ്ട്. എതിരേ വരുന്ന വാഹനം ദൃശ്യത്തിലില്ല. ബൈക്ക് യാത്രികരായ മൂന്നുപേര്‍ക്കും ഹെല്‍മറ്റ് ഇല്ലായിരുന്നു.
ഇടിയെ തുടര്‍ന്ന് വഴിയില്‍ ഏറെ നേരം കിടക്കേണ്ടി വന്ന ഇവരെ അപകടത്തിന് സാക്ഷിയായവര്‍ അറിയിച്ചത് അനുസരിച്ച് ആലപ്പുഴ നോര്‍ത്ത് പോലീസ് എത്തി വണ്ടാനം മെഡിക്കല്‍ കോളേജില്‍ എത്തിക്കുകയായിരുന്നു. സംഭവസ്ഥലത്ത് വെച്ച് തന്നെ രണ്ടുപേര്‍ കൊല്ലപ്പെട്ടിരുന്നു. എന്നാല്‍ ഒരാളുടെ നില ഗുരുതരമായി തുടരുകയാണ്. സംഘം ആലപ്പുഴയിലെ ഒരു പെട്ടിക്കടയില്‍ മോഷണം നടത്തിയ ശേഷമാണ് അപകടത്തില്‍ പെട്ടത്. സ്ഥലത്ത് നിന്നും 25 പാക്കറ്റ് സിഗററ്റും കണ്ടെത്തി.
മൂവര്‍സംഘം സഞ്ചരിച്ച വാഹനം മറ്റൊരാളുടേതാണെന്ന് പോലീസ് കണ്ടെത്തിയിട്ടുണ്ട്. ഇവര്‍ ബൈക്ക് മോഷ്ടിച്ച് എടുത്തതാണോ മറ്റാരെങ്കിലും ഇടനില നിന്ന് കൊണ്ടുവന്നതാണോ എന്നറിയേണ്ടതുണ്ട്. മോഷണം നടത്തിയിട്ടുണ്ടെന്ന് പോലീസ് ഉറപ്പിക്കുന്നുണ്ട്. ലഹരി ഇടപാടുകള്‍ ഉണ്ടോ എന്നതടക്കം അന്വേഷിച്ച് അറിയേണ്ടതുണ്ട്. പ്രതികള്‍ എല്ലാവര്‍ക്കും 25 വയസ്സില്‍ താഴെയാണ് പ്രായം. പുലര്‍ച്ചെ സമയം ആയതിനാല്‍ അധികം ആളുകള്‍ നിരത്തുകളില്‍ ഉണ്ടായിരുന്നില്ല. ലഹരിയിലായിരുന്നോ പ്രതികള്‍ എന്ന കാര്യവും അന്വേഷിക്കുന്നുണ്ട്.
Comments