അഞ്ചു ദശാബ്ദത്തിനിടയിൽ 120 ലധികം സിനിമകളിൽ അഭിനയിച്ച് ബോളിവുഡിന്റെ ഇതിഹാസമായി മാറിയ അഭിനേതാവായിരുന്നു ഋഷി കപൂർ. ഇന്ത്യൻ വെള്ളിത്തിരയിലെ പ്രണയത്തിന്റെ ആഘോഷമായിരുന്നു ഋഷി കപൂര്‍. അര്‍ബുദമെന്ന മഹാമാരി തന്നെ കീഴടക്കാന്‍ എത്തിയപ്പോഴും ഒട്ടും ഭയമില്ലാതെയാണ് അതിനെ താരം നേരിട്ടത്. ഇന്ന് താരത്തിന്റെ 74-ാം ജന്മവാര്‍ഷികമായിരുന്നു. ബോളിവുഡ് സിനിമാലോകം മുഴുവനും മണ്‍മറഞ്ഞ അതുല്യ കലാകാരന്‍ ഋഷി കപൂറിന്റെ ജന്മവാര്‍ഷികത്തില്‍ ആശംസകള്‍ നിറയ്ക്കുകയാണ്.
ഇപ്പോഴിതാ ബോളിവുഡിന്റെ സ്വന്തം ‘ഷോമാന്‍’ സംവിധായകന്‍ സുഭാഷ് ഘായ് ഋഷി കപൂറിന് ഹൃദയത്തില്‍ ചാലിച്ച ആശംസകള്‍ നേരുകയാണ്. തനിക്കും ഋഷി കപൂറിനുമിടയിലുള്ള സൗഹൃദത്തിന്റെ ആഴം ഒരു അനുഭവത്തിലൂടെ പങ്കിട്ടാണ് സംവിധായകന്റെ കുറിപ്പ്.
‘‘2010 ൽ പുലർച്ചെ 2.30 ന് എന്റെ ഫോൺ റിംഗ് ചെയ്യുന്നു. ഋഷി കപൂറിന്റെ ശബ്ദം കേട്ട് ഞാൻ അത്ഭുതപ്പെട്ടു... ‘എന്തൊരു സിനിമയാടോ താന്‍ ചെയ്തു വച്ചിരിക്കുന്നത്’ എന്നായിരുന്നു ചോദ്യം. ‘ഏതെന്ന്’ ആയി ഞാന്‍. ‘ ഓ, നമ്മുടേത്... ‘കര്‍സ്’... ഞാനിപ്പോള്‍ വീണ്ടും കണ്ടു... എന്നാല്‍ നീ ഉറങ്ങാന്‍ പൊയ്ക്കോളൂ...’ എന്ന് പറഞ്ഞു. എന്നിട്ട് അദ്ദേഹം ഫോൺ കട്ട് ചെയ്തു...
ഋഷി കപൂറിന് മാത്രമേ ഇത് ചെയ്യാൻ കഴിയൂ... കർസ് 1980 ൽ ചെയ്ത സിനിമയാണ്...
ഇന്ന് അദ്ദേഹത്തിന്റെ ജന്മദിനത്തിൽ, 1972 മുതൽ 1999 വരെ സ്‌ക്രീനിലെ ഏറ്റവും ആകർഷകമായ റൊമാന്റിക് ജെൻ സി താരമായിരുന്നു അദ്ദേഹം എന്ന് ഞാൻ ഓർക്കുന്നു. തന്റെ കരിയറിലെ രണ്ടാം ഇന്നിംഗ്സിൽ എല്ലാ സിനിമാ നിർമ്മാതാക്കളെയും അത്ഭുതപ്പെടുത്തുന്ന വ്യത്യസ്ത കഥാപാത്രങ്ങളെ അദ്ദേഹം അവതരിപ്പിച്ചു.
ഇൻഡസ്ട്രിയിൽ ഞാൻ കണ്ടുമുട്ടിയ ഏറ്റവും സ്നേഹനിധിയായ താരം, സത്യസന്ധനായ, കർക്കശക്കാരനായ വ്യക്തി....ഭാര്യ നീതുവിന് മാത്രമേ അദ്ദേഹത്തെ കൈകാര്യം ചെയ്യാൻ കഴിയൂ. അവർക്ക് അഭിനന്ദനങ്ങൾ ...എനിക്ക് ഈ ദമ്പതികളെ വലിയ ഇഷ്ടമാണ്...ജന്മദിനാശംസകൾ ചിന്റൂ...’’ എന്നാണ് സുഭാഷ് ഘായ് കുറിച്ചിരിക്കുന്നത്. ഋഷി കപൂറിനും നീതുവിനും ഒപ്പമുള്ള ത്രോബാക്ക് ചിത്രം കൂടി പങ്കിട്ടാണ് സുഭാഷ് ഘായ് യുടെ ആശംസ.
Comments