സീരിയലുകളിലൂടെ പ്രേക്ഷകമനസ്സ് കീഴടക്കിയ ഒരുപാട് താരങ്ങളുണ്ട്, അതില്‍ത്തന്നെ ഒറ്റ കഥാപാത്രത്തിലൂടെ കുടുംബപ്രേക്ഷകരുടെ ഹൃദയത്തിലേക്ക് ആഴ്ന്നിറങ്ങിയവരും കുറവല്ല. അങ്ങനെ എടുത്തു പറയാവുന്ന ഒരു പേരാണ് ചന്ദ്ര ലക്ഷ്മണ്‍ എന്ന താരത്തിന്റേത്. ‘സ്വന്തം’ എന്ന സീരിയലിലെ സാന്ദ്ര നെല്ലിക്കാടന്‍ എന്ന കഥാപാത്രത്തിലൂടെയാണ് ചന്ദ്ര പ്രേക്ഷകമനസ്സിലിടം പിടിച്ചത്. സിനിമയിലൂടെയാണ് അഭിനയരംഗത്തേക്ക് എത്തിയതെങ്കിലും ചന്ദ്ര ലക്ഷ്മണ്‍ പ്രേക്ഷകര്‍ക്ക് പ്രിയങ്കരിയായത് ടെലിവിഷന്‍ പരമ്പരകളിലൂടെയാണ്.
സ്വന്തം സീരിയലിനു ശേഷം ഒരുപിടി ഹിറ്റ് പരമ്പരകളില്‍ ശ്രദ്ധിക്കപ്പെടുന്ന കഥാപാത്രങ്ങള്‍ ചെയ്ത് ചന്ദ്ര സീരിയല്‍ രംഗത്ത് തിളങ്ങി. കുറച്ചു നാളുകളായി അഭിനയരംഗത്ത് നിന്ന് വിട്ടു നില്‍ക്കുകയാണെങ്കിലും യൂട്യൂബ് ചാനലിലൂടെയും സോഷ്യല്‍ മീഡിയയിലൂടെയും സജീവമാണ് താരം. അതിനൊപ്പം തന്നെ ആഭരണ ബിസിനസ്സിലും തിളങ്ങി നില്‍ക്കുകയാണ് താരം. നടന്‍ ടോഷ് ക്രിസ്റ്റിയാണ് ചന്ദ്രയുടെ ഭര്‍ത്താവ്. ഇവര്‍ക്ക് അയാന്‍ എന്നൊരു മകനുമുണ്ട്.
ഇപ്പോഴിതാ സീരിയലുകള്‍ തന്റെ വ്യക്തിജീവിതത്തില്‍ എന്തൊക്കെയാണ് നല്‍കിയിട്ടുള്ളതെന്നും ജീവിതം എത്രത്തോളം മാറ്റിമറിച്ചിട്ടുണ്ടെന്നും പറയുകയാണ് ചന്ദ്ര ലക്ഷ്മണ്‍. ടോഷിനും മകനുമൊപ്പമുള്ള ഈ അഭിമുഖത്തില്‍ സ്വന്തം സീരിയലിനെക്കുറിച്ചും സുജാത സീരിയലിനെക്കുറിച്ചുമാണ് ചന്ദ്ര സംസാരിക്കുന്നത്. സുജാത സീരിയലില്‍ ഒപ്പമഭിനയിച്ച ടോഷിനെയാണ് ചന്ദ്ര ജീവിതപങ്കാളിയാക്കിയത്.
‘‘സുജാതയുടെ സെറ്റാണ് ജീവിതത്തിൽ വഴിത്തിരിവായത്. അതിൽ വെച്ചാണ് ടോഷിനെ പരിചയപ്പെടുന്നത്. ഞങ്ങൾക്ക് കുറേ സമാന താത്പര്യങ്ങൾ ഉണ്ടായിരുന്നു. ഇളയരാജ സാറിന്റെ പാട്ടുകൾ രണ്ടാൾക്കും ഭയങ്കര ഇഷ്ടമാണ്. എപ്പഴോ സുഹൃത്തുക്കളായി. പിന്നീട് ആ സൗഹൃദം അടുത്ത ലെവലിലേക്ക് എത്തി. പിന്നെ ഞങ്ങളുടെ പ്രണയത്തിന് പ്രേക്ഷകരും വലിയ കാരണമാണ്. യൂട്യൂബിൽ ഞങ്ങളുടെ എപ്പിസോഡിന്റെ താഴെ ഇവർ വിവാഹം കഴിച്ചാൽ നല്ലതാണെന്ന് പലരും കമന്റ് ചെയ്യുമായിരുന്നു.
എന്റെ ആദ്യത്തെ സീരിയൽ ആണ് സ്വന്തം. അത് എനിക്ക് വലിയ പ്രശസ്തി തന്നു. എന്റെ കരിയറിലെ തന്നെ വലിയ വഴിത്തിരിവാണത്. കഥാപാത്രത്തിന്റെ പേരിനും എന്റെ പേരിലും സാമ്യതകൾ ഉണ്ടായിരുന്നതുകൊണ്ട് പലർക്കും മാറിപ്പോകുമായിരുന്നു. സാന്ദ്ര ലക്ഷ്മൺ അല്ലേ എന്നൊക്കെ എന്നോട് ചിലർ വന്ന് ചോദിച്ചിട്ടുണ്ട്. നെല്ലിക്കാടൻ ആരായിട്ടു വരും. അപ്പൂപ്പന്റെ പേരാണോ, അതോ അച്ഛന്റെ പേരാണോ എന്നും ചിലർ ചോദിച്ചിട്ടുണ്ട്...’’ ചന്ദ്ര ലക്ഷ്മണ്‍ പറഞ്ഞു. ഒരു യൂട്യൂബ് ചാനലിനു നൽകിയ അഭിമുഖത്തിലാണ് ചന്ദ്ര മനസ്സു തുറന്നത്.
Comments