തന്റെ പ്രിയപ്പെട്ട വളര്‍ത്തുനായ ലൂക്കയെക്കുറിച്ച് സോഷ്യല്‍ മീഡിയയില്‍ കുറിപ്പുമായി ഡോ. റോബിന്‍ രാധാകൃഷ്ണന്‍. ജീവിതത്തിലെ ഏറ്റവും സന്തോഷമുള്ള നിമിഷങ്ങളിലും വിഷമഘട്ടങ്ങളിലും ലൂക്ക തനിക്ക് നല്‍കിയ നിരുപാധികമായ സ്‌നേഹത്തെക്കുറിച്ചാണ് റോബിന്‍ തന്റെ പോസ്റ്റില്‍ വികാരഭരിതനായി കുറിച്ചിരിക്കുന്നത്. ലൂക്ക തനിക്ക് വെറുമൊരു വളര്‍ത്തുമൃഗം മാത്രമല്ലെന്നും ഹൃദയത്തിന്റെ ഒരു ഭാഗമാണെന്നും റോബിന്‍ പറയുന്നു.
'' എന്റെ ലൂക്ക. ലൂക്ക എന്റെ വളര്‍ത്തുമൃഗം മാത്രമല്ല - അവനെന്റെ നെഞ്ചോട് ചേര്‍ന്നുനില്‍ക്കുന്ന ജീവനാണ്. എല്ലാ കാര്യങ്ങളും മാറിമറിയുന്ന ഈ ലോകത്ത്, അവന്റെ സ്നേഹം എപ്പോഴും വളരെ ലളിതവും, പരിശുദ്ധവും, യാതൊരു വ്യവസ്ഥകളുമില്ലാത്തതുമായിരുന്നു. വിജയം, പണം, പ്രശസ്തി, അല്ലെങ്കില്‍ ആളുകള്‍ പറയുന്ന കാര്യങ്ങള്‍ എന്നിവയൊന്നും അവന് ഒരു വിഷയമേയല്ല. ലൂക്കയ്ക്ക് ഞാന്‍ അവന്റെ പ്രിയപ്പെട്ട ആളാണ് അത് ഈ ലോകത്തിലെ ഏറ്റവും മനോഹരമായ വികാരങ്ങളിലൊന്നാണ്.
എന്റെ സന്തോഷനിമിഷങ്ങളിലും എനിക്ക് പുഞ്ചിരിക്കാന്‍ പോലും തോന്നാത്ത വിഷമഘട്ടങ്ങളിലും അവന് എനിക്കൊപ്പം ഉണ്ടായിരുന്നു. ചിലപ്പോഴൊക്കെ ഒരു വാക്ക് പോലും മിണ്ടാതെ തന്നെ അവന് എന്റെ എല്ലാ സങ്കടങ്ങളുടെയും ഭാരം കുറച്ചുതരും. അവന്റെ കണ്ണുകള്‍, അവന്റെ കൊച്ചു കൊച്ചു ശീലങ്ങള്‍, എന്നെ കാണുമ്പോള്‍ അവനുണ്ടാകുന്ന സന്തോഷം... ഈ നിമിഷങ്ങള്‍ ഞാന്‍ എന്നെന്നും എന്റെ മനസ്സില്‍ നിധി പോലെ സൂക്ഷിക്കും.
നായ്ക്കള്‍ നമ്മുടെ ജീവിതകാലം മുഴുവന്‍ നമ്മോടൊപ്പം ഉണ്ടാകണമെന്നില്ല, പക്ഷേ അവര്‍ നമ്മുടെ ജീവിതം പൂര്‍ണ്ണമാക്കുന്നു. ലൂക്ക, നീ വെറുമൊരു വളര്‍ത്തുനായ മാത്രമല്ല. നീ എന്റെ കുടുംബമാണ്, എന്റെ കുഞ്ഞു കൂട്ടുകാരനാണ്, എന്റെ സന്തോഷമാണ്, എന്റെ ഹൃദയത്തില്‍ എന്നെന്നും സൂക്ഷിക്കുന്ന സ്‌നേഹമാണ്. എന്റെ കുട്ടി. എന്റെ ലൂക്ക. എന്നെന്നേക്കുമായുള്ള എന്റെ സ്നേഹം'' , റോബിന്‍ കുറിച്ചു.
തന്റെ സന്തോഷവും കുഞ്ഞു കൂട്ടുകാരനുമായ ലൂക്കയെക്കുറിച്ചുളള റോബിന്റെ ഈ വൈകാരികമായ കുറിപ്പ് വളരെ പെട്ടെന്നാണ് ആരാധകർ ഏറ്റെടുത്തത്. നിരവധിയാളുകളാണ് പോസ്റ്റിന് താഴെ സ്നേഹം അറിയിച്ചുകൊണ്ട് രംഗത്തെത്തുന്നത്.
Comments