തനിക്കെതിരെ സിംഹത്തിന്റെ ആക്രമണമുണ്ടായി എന്ന രീതിയില്‍ സോഷ്യല്‍ മീഡിയയില്‍ പ്രചരിക്കുന്ന വീഡിയോയെക്കുറിച്ചുളള അഭ്യൂഹങ്ങളില്‍ വ്യക്തത വരുത്തി കന്നഡ നടന്‍ കിരണ്‍ രാജ്. വിദേശത്ത് ചിത്രീകരിച്ച ഈ വീഡിയോ തെറ്റായി വ്യാഖ്യാനിക്കപ്പെടുകയായിരുന്നുവെന്ന് അദ്ദേഹം വ്യക്തമാക്കി.
സിംഹം തന്നെ ആക്രമിക്കുകയായിരുന്നില്ലെന്നും പകരം സ്‌നേഹത്തോടെ കെട്ടിപ്പിടിക്കുകയാണുണ്ടായതെന്നം കിരണ്‍ രാജ് പറഞ്ഞു. താന്‍ പൂര്‍ണമായും സുരക്ഷിതനാണെന്നും സംഭവത്തില്‍ യാതൊരുവിധ പരിക്കുകളും പറ്റിയിട്ടില്ലെന്നും താരം കൂട്ടിച്ചേര്‍ത്തു.
‘അതൊരു ആക്രമണമേ ആയിരുന്നില്ല. സിംഹം യഥാര്‍ഥത്തില്‍ എന്നെ കെട്ടിപ്പിടിക്കാന്‍ വന്നതാണ്. സിഹം മുഖം മറുവശത്തേക്ക് തിരിച്ചു നില്‍ക്കുമ്പോള്‍ ഞാന്‍ അവിടുന്ന് തിരിച്ചുപോകാന്‍ നടക്കുകയായിരുന്നു. ആ സമയത്താണ് അത് എന്റെ അടുത്തേക്ക് വന്ന് എന്നെ കെട്ടിപ്പിടിച്ചത്. അല്ലാതെ അവിടെയൊരു ആക്രമണവും നടന്നിട്ടില്ല ’കിരണ്‍ രാജിന്റെ വാക്കുകള്‍.
വീഡിയോ വൈറലായ ശേഷം അതിന് ലഭിച്ച തെറ്റായ വ്യാഖ്യാനത്തില്‍ നടന്‍ നിരാശ പ്രകടിപ്പിച്ചു. യഥാര്‍ഥ സാഹചര്യം വളരെ വ്യത്യസ്തമായിരിക്കേ, ഇതിനെ അപകടകരമായ ഒരു ആക്രമണമായി ചിത്രീകരിച്ച് പ്രചരിപ്പിച്ചത് ആളുകളില്‍ തെറ്റിദ്ധാരണയ്ക്കും ഭീതിക്കും ഇടയാക്കിയെന്ന് അദ്ദേഹം ചൂണ്ടിക്കാണിച്ചു. മുന്‍പ് പങ്കുവെച്ച ദൃശ്യങ്ങള്‍ സിംഹവുമായുളള തന്റെ പരിചയവും ഇണക്കവും വ്യക്തമാക്കുന്നതാണെന്നും അദ്ദേഹം കൂട്ടിച്ചേര്‍ത്തു.
വരാനിരിക്കുന്ന പുതിയ സിനിമയിലെ രംഗത്തിനായി മൃഗങ്ങളുമായി അടുപ്പമുണ്ടാക്കിയെടുക്കുന്ന പ്രത്യേക പരിശീലനം നടത്തുന്നതിനിടയിലാണ് ഈ വീഡിയോ പകര്‍ത്തിയത്. സുരക്ഷിതമായ അന്തരീക്ഷത്തില്‍ കൃത്യമായ മുന്‍കരുതലുകളോടെയാണ് ഈ പരിശീലനങ്ങള്‍ നടന്നതെന്നും നടന്‍ വെളിപ്പെടുത്തി.
നിലവില്‍ കര്‍ണന്‍ എന്ന ജനപ്രിയ ടെലിവിഷന്‍ പരമ്പരയില്‍ പ്രധാന കഥാപാത്രമായ കര്‍ണനെ അവതരിപ്പിച്ചു വരികയാണ് കിരണ്‍ രാജ്.
Comments