നടനായും സംവിധായകനായും മലയാളസിനിമയിൽ കഴിവ് തെളിയിച്ചിട്ടുള്ള താരമാണ് സിദ്ധാർഥ് ഭരതൻ. 'നമ്മൾ' എന്ന ചിത്രത്തിലൂടെയായിരുന്നു സിദ്ധാർഥിന്റെ സിനിമയിലേക്കുള്ള അരങ്ങേറ്റം. ബോക്സ് ഓഫീസിൽ വലിയ വിജയം നേടിയ ചിത്രത്തിലെ പാട്ടുകൾ ഇന്നും പ്രേക്ഷകർക്ക് ഏറെ പ്രിയപ്പെട്ടതാണ്.
ഇപ്പോഴിതാ, ചിത്രത്തിലെ എല്ലാ പാട്ടുകളും തനിക്ക് ഒരുപോലെ പ്രിയപ്പെട്ടതാണെന്ന് തുറന്നുപറയുകയാണ് സിദ്ധാർഥ്. റേഡിയോ മാംഗോയ്ക്ക് നൽകിയ അഭിമുഖത്തിലായിരുന്നു താരത്തിന്റെ പ്രതികരണം.
‘എനിക്ക് ആ സിനിമയിലെ എല്ലാ പാട്ടുകളും വളരെ പ്രിയപ്പെട്ടതാണ്. ടൈറ്റില്‍ സോങായ സൂര്യനെ അടക്കം. എന്നെ അമ്മേ എന്ന പാട്ട് ഞാന്‍ മറന്നാലും എന്നെ മറക്കാന്‍ സമ്മതിക്കില്ലല്ലോ. ഒരുപാട് പേര്‍ ആ പാട്ട് അയച്ചു തന്നിട്ടുണ്ട്. അമ്മ മരിച്ചപ്പോള്‍ ഒരുപാട് പേര്‍ ആ പാട്ട് അയച്ചു തന്നിട്ടുണ്ട്. എന്നെ ആശ്വസിപ്പിക്കാനായി'' സിദ്ധാര്‍ത്ഥ് ഭരതന്‍ പറയുന്നു. അതേസമയം ചിത്രത്തിലെ പാട്ടുകളുടെ പേരില്‍ നടന്‍ വിനയ് ഫോര്‍ട്ട് തന്നെ കളിയാക്കാറുണ്ടെന്നും സിദ്ധാര്‍ത്ഥ് പറയുന്നു.
''വിനയ് ഫോര്‍ട്ട് ഈ സെറ്റില്‍ പോലും ആ ലവ് സോങ് പറഞ്ഞ് കളിയാക്കിയിരുന്നു. എടോ തനിക്ക് അറിയുമോ? ഞാന്‍ പത്താം ക്ലാസില്‍ പഠിക്കുമ്പോഴാണ് സുഖമാണീ നിലാവ് കണ്ടത് എന്നും പറഞ്ഞ്. നാലാമത്തെ പ്രാവശ്യം പത്താം ക്ലാസ് പഠിക്കുമ്പോഴായിരിക്കും. വിനയ്‌യുടെ വളരെ പ്രിയപ്പെട്ട പാട്ടാണ്. അല്ലാതെ അങ്ങനെ പറയില്ലല്ലോ'' എന്നാണ് സിദ്ധാര്‍ത്ഥ് പറയുന്നത്.
2002 ല്‍ പുറത്തിറങ്ങിയ ചിത്രമാണ് നമ്മള്‍. കമല്‍ സംവിധാനം ചെയ്ത ചിത്രത്തില്‍ സിദ്ധാര്‍ത്ഥ് ഭരതന്‍, ജിഷ്ണു രാഘവന്‍, ഭാവന, രേണുക മേനോന്‍ തുടങ്ങിയവരായിരുന്നു പ്രധാന വേഷത്തിലെത്തിയത്. മോഹന്‍ സിത്താരയായിരുന്നു ചിത്രത്തിലെ ഹിറ്റ് പാട്ടുകള്‍ ഒരുക്കിയത്.
Comments