കഥയും മേക്കിങ്ങും പ്രകടനവും ഒപ്പത്തിനൊപ്പം നില്‍ക്കുന്ന കുറ്റാന്വേഷണ സിനിമകൾക്ക് എന്നും ഒരുപാട് ആരാധകരുണ്ടാകാം. ഇതുവരെ കണ്ടുപരിചയിച്ച സിനിമകളില്‍ നിന്ന് വ്യത്യസ്തമായി എന്തെല്ലാം പുതിയ ട്വിസ്റ്റുകളാണ് ഈ സിനിമ തരുന്നതെന്ന് ചിന്തിച്ചാണ് പ്രേക്ഷകര്‍ ടിക്കറ്റെടുക്കുന്നത്. സിനിമ കണ്ടു തുടങ്ങുമ്പോൾ മുതൽ ഓരോ പ്രേക്ഷകരും കുറ്റാന്വേഷകരായി സിനിമയിൽ ട്വിസ്റ്റ് വരുന്നതിനു മുൻപെ അതു കണ്ടുപിടിക്കാനുള്ള തത്രപ്പാടിലാണ് പ്രേക്ഷകര്‍.
എന്നാല്‍ തിയേറ്ററില്‍ സ്ക്രീനിലേക്ക് ജാഗരൂകരായി നോക്കിയിരിക്കുന്ന പ്രേക്ഷകരെ പോലും കൈയടിപ്പിക്കുന്ന ഒന്നായി മാറുകയാണ് ഷഹദ് സംവിധാനം ചെയ്ത ‘പ്രഥമദൃഷ്ട്യാ കുറ്റക്കാർ’ എന്ന സിനിമ. ആരാണ് കുറ്റവാളി, എന്താണ് കുറ്റകൃത്യം ആദ്യമേ തന്നെ പറയുന്നുണ്ടെങ്കിലും സസ്പെൻസും ബ്രില്യൻസും നിറച്ചാണ് ഈ സിനിമയുടെ ഓരോ രംഗങ്ങളും കടന്നു പോകുന്നത്. സിനിമയില്‍ കേന്ദ്രകഥാപാത്രമാകുന്നത് അലീന എന്ന പോലീസ് കോൺസ്റ്റബിള്‍ വേഷത്തിലെത്തുന്ന പാര്‍വതി തിരുവോത്താണ്. മികച്ച പ്രേക്ഷക- നിരൂപക പ്രശംസകളാണ് പാര്‍വതിയുടെ കഥാപാത്രത്തിന് കിട്ടിക്കൊണ്ടിരിക്കുന്നത്.
ഇപ്പോഴിതാ തന്റെ ഏറ്റവും പുതിയ സിനിമയായ പ്രഥമദൃഷ്ട്യാ കുറ്റക്കാര്‍ പ്രേക്ഷകര്‍ ഇരുകൈയും നീട്ടി സ്വീകരിക്കുന്നതിന്റെ നന്ദിയും സന്തോഷവും പങ്കിടുകയാണ് പാര്‍വതി തിരുവോത്ത്. പ്രേക്ഷകര്‍ അയയ്ക്കുന്ന ഓരോ മെസേജുകളും വായിക്കുന്നുണ്ടെന്നും പ്രേക്ഷകര്‍ കാരണമാണ് താനിവിടെയുള്ളതെന്നുമാണ് പാര്‍വതി സോഷ്യല്‍ മീഡിയയില്‍ കുറിച്ചിരിക്കുന്നത്.
‘‘ഫസ്റ്റ് ഡേ ഫസ്റ്റ് ഷോ മുതൽ ഞാൻ ആനന്ദാശ്രുക്കൾ പൊഴിക്കുകയാണെന്ന് പറയുമ്പോൾ എന്നെ വിശ്വസിക്കൂ...നിങ്ങൾ എനിക്ക് അയയ്ക്കുന്ന ഓരോ ഹൃദയസ്പർശിയായ സന്ദേശങ്ങളും ഞാൻ വായിക്കുന്നുണ്ട്. ഞാൻ ഇവിടെയുള്ളത് നിങ്ങൾ കാരണമാണ്. എന്റെ ആളുകൾ, എന്റെ ടീം, അവരുടെ പിന്തുണ, എന്നിലുള്ള വിശ്വാസം എന്നിവ കൊണ്ടാണ് ഞാൻ ഇവിടെയുള്ളത്. എപ്പോഴും എനിക്ക് പിന്തുണ നൽകുന്നതിന് നന്ദി! ഞാൻ എപ്പോഴും എന്റെ നൂറു ശതമാനം നൽകുമെന്ന് ഉറപ്പുനൽകുന്നു...’’ എന്നാണ് തന്റെ സന്തോഷം പങ്കിട്ട് പാര്‍വതി തിരുവോത്ത് കുറിച്ചിരിക്കുന്നത്.
Comments