തെന്നിന്ത്യന്‍ താരറാണി എന്നതിലുപരി ആരാധകരെ ‘നാഷണല്‍ ക്രഷ്’ എന്ന വിശേഷണം കൂടി കൃത്യമായി യോജിക്കുന്ന താരമാണ് രാശ്മിക മന്ദാന. കരിയറില്‍ തിളങ്ങി നില്‍ക്കുന്ന താരം വിജയ് ദേവരകൊണ്ടയെ വിവാഹം ചെയ്തതോടെ ആരാധകരുടെ സ്നേഹം ഇ‍രട്ടിയായി. ഓണ്‍സ്ക്രീനിലൂടെ പ്രേക്ഷകഹൃദയം കീഴടക്കിയ ഈ താരങ്ങള്‍ ഓഫ്സ്ക്രീനിലും ഒരുമിക്കണമെന്ന് ആരാധകര്‍ ഏറെ ആഗ്രഹിച്ചിരുന്നു. തെന്നിന്ത്യയില്‍ മാത്രമല്ല ബോളിവുഡിനും ഏറെ പ്രിയപ്പെട്ട താരമാണിപ്പോള്‍ രാശ്മിക.
താരത്തിന്റേതായി പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന പുത്തന്‍ ചിത്രമാണ് ‘മൈസ’. പതിവില്‍ നിന്ന് വ്യത്യസ്തമായി ഒരു ആക്ഷൻ ഹീറോ ഇമേജില്‍ രാശ്മികയെത്തുന്ന ചിത്രം കൂടിയാണിത്. മാസ് ആക്ഷൻ ചിത്രങ്ങളിലെ നായകന്മാർ ചെയ്യുന്ന എല്ലാത്തരം ആക്ഷൻ രംഗങ്ങളും ചെയ്യുന്ന രശ്മികയെ സിനിമയുടെ ടീസറില്‍ കാണാനാകും. ഗ്ലാമർ വേഷങ്ങളിൽ നിന്നൊക്കെ മാറി, തികച്ചും വ്യത്യസ്തമായ ഒരു രൂപത്തിൽ രശ്മികയെ കാണുന്നതിലുള്ള ആവേശം പങ്കുവെച്ചുകൊണ്ട് നിരവധി ആരാധകരാണ് ഈ ടീസറിനെ വരവേറ്റത്. രശ്മികയുടെ ഗംഭീര ആക്ഷനാണ് ചിത്രത്തിന്റെ ഹൈലൈറ്റ്. ഇതുവരെ കാണാത്ത വേഷത്തിലാണ് രശ്മിക ചിത്രത്തിലെത്തുന്നത്.
ഇപ്പോഴിതാ ‘മൈസ’ യില്‍ ഏറെ വെല്ലുവിളികളും ശാരീരിക അധ്വാനവും നേരിടേണ്ടി വന്നിട്ടുണ്ടെന്ന് പറയുകയാണ് രാശ്മിക മന്ദാന. മുൻപ് ചെയ്തിട്ടുള്ള വേഷങ്ങളിൽ നിന്നെല്ലാം തികച്ചും വ്യത്യസ്തമായ ഒന്നാണിതെന്നും ഒരു ചെറിയ പിഴവ് പോലും ഗുരുതരമായ പരിക്കുകള്‍ക്ക് കാരണമാകുമായിരുന്ന ഭയാനകമായ സാഹചര്യങ്ങളായിരുന്നെന്നും രാശ്മിക പറയുന്നു.
‘‘ഈ സിനിമ എനിക്കൊരു പുതിയ അനുഭവമാണ്. ആദ്യമായി ഒരു കാര്യം ചെയ്യുമ്പോൾ എപ്പോഴും ചെറിയൊരു ആശങ്കയുണ്ടാകാറുണ്ട്. ഓരോ തവണയും പുതിയ എന്തെങ്കിലും പരീക്ഷിക്കാൻ ഞാൻ ആഗ്രഹിക്കാറുണ്ട്. ‘മൈസ'’ എന്ന ചിത്രത്തിനായി ഞാൻ എന്റെ സർവ്വസ്വവും നൽകി. അവർ എന്നെക്കൊണ്ട് ചെയ്യിച്ച കാര്യങ്ങൾ ചില്ലറയല്ല! ഭാവനയ്ക്ക് അതിരുകളില്ല, എന്നാൽ അത് അതേപടി സ്ക്രീനിലെത്തിക്കുക അത്ര എളുപ്പമല്ല.
കേരളത്തിലെ വന പ്രദേശങ്ങളിലാണ് സിനിമയുടെ ഷൂട്ടിംഗ് നടന്നത്. ഒരു ചെറിയ പിഴവ് പോലും ഗുരുതരമായ പരിക്കുകള്‍ക്ക് കാരണമാകുമായിരുന്ന ഭയാനകമായ സാഹചര്യങ്ങളായിരുന്നു. സംവിധായകൻ ഞങ്ങളെ ഒരു കുന്നിൻ മുകളിലേക്ക് കൊണ്ടുപോയി പരമാവധി വേഗതയില്‍ ഓടാൻ ആവശ്യപ്പെട്ടു. ഒന്ന് ചെറുതായി വഴുതിയാല്‍ മറ്റ് ചിത്രങ്ങളുടെ ഷെഡ്യൂളുകള്‍ മുഴുവൻ താളംതെറ്റുമെന്ന് പറഞ്ഞ് ഞാൻ എന്റെ ആശങ്ക പ്രകടിപ്പിച്ചു. പക്ഷേ അദ്ദേഹം അത് കേള്‍ക്കാൻ തയ്യാറായില്ല, തന്റെ തീരുമാനത്തിൽ അദ്ദേഹം ഉറച്ചുനിന്നു.
90 അടി ഉയരമുള്ള അതിരപ്പിള്ളി വെള്ളച്ചാട്ടത്തില്‍ നിന്ന് ചാടാൻ ആവശ്യപ്പെട്ടപ്പോള്‍ എന്റെ ഉയരത്തോടുള്ള ഭയം പരീക്ഷിക്കപ്പെട്ടു. സംവിധായകൻ വളരെ നിസ്സാരമായാണ് എന്നോട് അത് ചെയ്യാൻ ആവശ്യപ്പെട്ടത്. അന്ന് ദിവസം മുഴുവൻ ഞാൻ വിറയ്ക്കുകയായിരുന്നു. എട്ട് മണിക്കൂറോളം വെള്ളത്തിനടിയിൽ നിൽക്കാനും അദ്ദേഹം ആവശ്യപ്പെട്ടു. പറയൂ, ഞാനൊരു മീനാണോ? ചെളിയിലുള്ള ആ പോരാട്ടമായിരുന്നു മറ്റൊരു അനുഭവം. അതീവ ദുഷ്കരമായിരുന്നു അത്. എങ്കിലും ഞാൻ അത് ചെയ്തു.
ഷൂട്ടിംഗ് പൂർത്തിയാക്കാൻ ഇനി പന്ത്രണ്ട് ദിവസങ്ങൾ മാത്രമേ ബാക്കിയുള്ളൂ, പക്ഷേ എനിക്ക് ഇപ്പോൾത്തന്നെ പേടിയാകുന്നുണ്ട്... ഏറ്റവും വലിയ തിരിച്ചടി നേരിട്ടത് ക്യാമറയ്ക്ക് പിന്നിലായിരുന്നു. നൃത്തം ചെയ്യുന്നതിനിടെ എന്റെ ഇടുപ്പിലെ ടെൻഡൻ (ഹിപ്പ് ടെന്‍ഡന്‍) വേർപെട്ടുപോയി. ഫുട്ബോൾ കളിക്കാരിൽ മാത്രമേ ഇത്തരം പരിക്കുകൾ കണ്ടിട്ടുള്ളൂ എന്നാണ് ഡോക്ടർ പറഞ്ഞത്. പൂർണമായി സുഖം പ്രാപിക്കാൻ ഇനിയും മൂന്നാഴ്ചയോളം സമയമെടുക്കും. ഞാൻ മൃദുലമായ മനസ്സിനുടമയാണ്. എന്നാല്‍ സംവിധായകന് സിനിമയോട് വലിയ അഭിനിവേശമുണ്ടെങ്കിൽ, ആത്മാർത്ഥതയുണ്ടെങ്കില്‍ അതിനായി എത്ര ദൂരം വേണമെങ്കിലും പോകാൻ ഞാൻ തയ്യാറാണ്, ആ ചിത്രത്തിനായി എന്ത് കഷ്ടപ്പാടും സഹിക്കാൻ തയ്യാറാണ്...’’രാശ്മിക പറഞ്ഞു. സിനിമയുടെ ടീസർ ലോഞ്ച് ചടങ്ങിലാണ്, ഷൂട്ടിംഗിനിടയില്‍ താൻ അനുഭവിച്ച മാനസികവും ശാരീരികവുമായ ബുദ്ധിമുട്ടുകളെക്കുറിച്ച്‌ താരം വെളിപ്പെടുത്തിയത്.
രവീന്ദ്ര പുല്ലെയുടെ സംവിധാനത്തില്‍ ഒരുങ്ങുന്ന ‘മൈസ’യില്‍ സമുദ്രക്കനി, ഈശ്വരി റാവു, ഈശ്വരി റാവു, താരക് പൊന്നപ്പ, ഗുരു സോമസുന്ദരം എന്നിങ്ങനെയുള്ള വലിയ ഒരു താരനിര തന്നെയുണ്ട്. ജേക്സ് ബിജോയ് ആണ് ഈ പവർപാക്ക്ഡ് ത്രില്ലറിന് സംഗീതം ഒരുക്കുന്നത്. സമൂഹത്തിൽ നേരിടേണ്ടിവരുന്ന പ്രതിസന്ധികളോട് പൊരുതുന്ന ഗോണ്ട് ഗോത്രവിഭാഗത്തിൽ പെട്ട സ്ത്രീയായാണ് ചിത്രത്തിൽ രശ്മിക എത്തുന്നത്. രശ്മികയുടെ ബോഡി ട്രാൻസ്ഫർമേഷനും ചിത്രത്തിന്റെ ഹൈലൈറ്റ് ആണ്. അണ്ടർവാട്ടർ ആക്ഷൻ സീക്വൻസുകളും നിരവധി ത്രില്ലിങ് നിമിഷങ്ങളും തരുന്ന ചിത്രമാണ് ‘മൈസ’ എന്നാണ് ടീസര്‍ നല്‍കുന്ന സൂചന. നവംബർ 27-നാണ് ചിത്രം തിയേറ്ററുകളിലെത്തുന്നത്.
Comments