തെന്നിന്ത്യന്‍ സിനിമയിൽ ഒരു കാലത്ത് ഒരേ പോലെ തിളങ്ങിനിന്ന പ്രശസ്ത സഹോദരിമാരാണ് അംബികയും രാധയും. ഒരു കാലത്ത് സൂപ്പര്‍സ്റ്റാറുകളേക്കാള്‍ പ്രതിഫലം വാങ്ങിയിരുന്ന താരമാണ് അംബിക. അംബികയ്ക്ക് ശേഷം സിനിമയിലെത്തിയ അനിയത്തി രാധയും അധികം വൈകാതെ താരപദവിയിലേക്ക് ഉയര്‍ന്നു. ഏറെ സ്നേഹമുള്ള സഹോദരിമാരാണ് ഇവരെന്ന് പറഞ്ഞിരുന്ന കാലത്തു നിന്ന് ഇപ്പോള്‍ അംബികയും രാധയും തമ്മിലുള്ള സ്വത്ത് തര്‍ക്കമാണ് ചര്‍ച്ചകളില്‍ നിറയുന്നത്. രാധയുടെ 50 കോടി രൂപയുടെ ചെക്കുകൾ അംബിക തട്ടിയെടുത്തെന്നും സ്വത്ത് വകകളിൽ അവകാശ നിഷേധം നടത്തിയെന്നും കാണിച്ചാണ് രാധ പൊലീസിൽ പരാതി നൽകിയത്.
ഇപ്പോഴിതാ തനിക്കെതിരെ ഉയര്‍ന്ന ആരോപണങ്ങളില്‍ പ്രതികരിക്കുകയാണ് അംബിക. രാധ ചെക്ക് നൽകിയ ശേഷം പേയ്‌മെന്റ് തടയുകയാണ് ചെയ്തതെന്നും തനിക്ക് ലഭിച്ച ചെക്ക് അതോടെ ബൗണ്‍സായെന്നും യഥാര്‍ത്ഥത്തില്‍ പരാതിയും കേസും നല്‍കേണ്ടിയിരുന്നത് താനായിരുന്നെന്നുമാണ് അംബിക പറയുന്നത്.
‘‘മനുഷ്യർക്ക് എത്ര കിട്ടിയാലും മതിയാവാത്ത ഒരേ ഒരു സാധനം പണമാണ്. ഒരേ പോലെയുള്ള വസ്ത്രങ്ങൾ ധരിച്ച്, അത്രയധികം സ്നേഹത്തോടെ കഴിഞ്ഞിരുന്ന ഞങ്ങളുടെ ഇടയിൽ ഇങ്ങനെ സംഭവിച്ചിട്ടുണ്ടെങ്കിൽ അതിന് കാരണം പണം മാത്രമാണ്. സിനിമയിലേക്ക് രാധ വരുന്നതും കരിയർ തുടങ്ങുന്നതുമെല്ലാം എന്റെ പിന്തുണയോടെയാണ്. അതെല്ലാം രാധ മറന്നാലും സിനിമാലോകത്തിന് അതറിയാം.
പ്രശ്നം നിലവിൽ കോടതിയുടെ പരിഗണനയിലായതിനാൽ കൂടുതൽ കാര്യങ്ങൾ ഇപ്പോൾ വെളിപ്പെടുത്താൻ കഴിയില്ല. എന്നാൽ, ഞങ്ങളുടെ ‘എ.ആർ.എസ്’ പ്രോപ്പർട്ടി വിൽക്കാൻ ഞാൻ ഒരിക്കലും സമ്മതിക്കില്ല. പണം തട്ടിയെടുത്തു എന്ന ആരോപണം തികച്ചും വ്യാജമാണ്. രാധ ചെക്ക് നൽകുകയും പേയ്‌മെന്റ് തടയുകയും ചെയ്തു, എന്നാൽ എനിക്ക് ലഭിച്ച ചെക്ക് മടങ്ങി (ബൗൺസ് ആയി), അങ്ങനെ എനിക്ക് പണം നഷ്ടപ്പെട്ടു. അങ്ങനെയെങ്കിൽ, പരാതി നൽകേണ്ടത് ഞാനാണ്. യഥാർത്ഥത്തിൽ ഞാനാണ് പറ്റിക്കപ്പെട്ടത്. ഞാനാണ് കേസ് കൊടുക്കേണ്ടിയിരുന്നത്, എന്നാൽ അതിന് മുതിരുന്നില്ല. ദൈവത്തിൽ പൂർണ്ണ വിശ്വാസമുണ്ട്. എന്നെ വിശ്വസിക്കുന്നവർ എന്നെ കൈവിടില്ല. യാതൊരു യാഥാർത്ഥ്യവുമറിയാതെ വിഷയത്തിൽ തെറ്റായ പ്രചാരണങ്ങൾ നടത്തരുത് എന്നൊരു അഭ്യര്‍ത്ഥന മാത്രമാണ് മാധ്യമങ്ങളോടും പൊതുജനങ്ങളോടുമുള്ളത്...
അവർ എന്തിനാണ് പരാതി നൽകിയതെന്ന് അറിയില്ല, അത് കാണുമ്പോൾ തമാശയായി തോന്നുതാണ്. കാരണം, ഞാൻ പറ്റിക്കപ്പെട്ട് ചെന്ന് പരാതി നൽകേണ്ടതിന് പകരം, എനിക്കെതിരെ പരാതി നൽകിയിരിക്കുന്നു എന്ന് കേൾക്കുമ്പോൾ അവർക്ക് ആരോ ഉപദേശം കൊടുത്തിട്ടുണ്ടാകും. അതുകൊണ്ട് ഒരൊന്നര വർഷമായി അവർ ആ വീട്ടിൽ കയറാൻ പോലും അനുവദിക്കുന്നില്ല, എന്റെ സ്വന്തം വീട്ടിൽ... ആദ്യം നമ്മൾ വിചാരിക്കും, നമ്മുടെ കുടുംബവും അതിലെ ബന്ധങ്ങളും ഉണ്ടെങ്കിൽ മാത്രം മതി, എന്തിനെയും നേരിടാം എന്ന്. എന്നാൽ ഇപ്പോൾ അങ്ങനെ ഒരു കാര്യം ഡിക്ഷണറിയിൽ പോലുമില്ല.
സഹോദരിമാർ എന്നാൽ അങ്ങനെ ആയിരിക്കണം... ഒരേപോലെ ഡ്രസ്സ് ഒക്കെ ചെയ്ത് നടക്കുക...ചെറുപ്പത്തിൽ ഞങ്ങളുടെ അച്ഛൻ ആന്ധ്രയിൽ നിന്ന് വരുമ്പോൾ മൂന്ന് പേർക്കും ഒരേപോലെയുള്ള ഫ്രോക്ക് വാങ്ങി തരുമായിരുന്നു. അങ്ങനെയുണ്ടായിരുന്ന ഒരു ബന്ധം വേറൊരു രീതിയിൽ ആയിട്ടുണ്ടെങ്കിൽ അതിന് കാരണം പണം മാത്രമാണ്.
എആർഎസ് ഗാർഡൻസ് എന്ന ബോർഡ് മാറി വേറൊരു ബോർഡ് കണ്ടപ്പോൾ എനിക്ക്... താങ്ങാൻ പറ്റിയില്ല. എആർഎസ് ഗാർഡൻസ് ഇരുന്ന സ്ഥലത്ത് ഏത് ബോർഡ് വെച്ചാലും അത് എആർഎസ് ഗാർഡൻസ് തന്നെയാണ്. മീഡിയയിലുള്ള ചിലർ എആർഎസ് ഗാർഡൻസിനെ കുറിച്ചും, ഐയ്യായെ (എം.ജി.ആർ) കുറിച്ചും അലവലാതിത്തരങ്ങൾ സംസാരിച്ചിട്ടുണ്ട്. അതൊന്നും സത്യമല്ല. അയ്യ ഞങ്ങൾക്ക് ആർക്കും സൗജന്യമായി ഒന്നും തന്നിട്ടില്ല. ഇത് കണ്ടുകൊണ്ടിരിക്കുന്ന എല്ലാവരോടും പറയുകയാണ്, ഞങ്ങൾ കഷ്ടപ്പെട്ട് കാശ് കൊടുത്ത്, എന്റെ അമ്മ ദേവർ ഫിലിംസ് ഫാമിലിയിൽ നിന്ന് വാങ്ങിയതാണ് ഇത്. എആർഎസ് ഗാർഡൻസ് എന്നത് എനിക്ക് ജീവനാണ്...’’ എന്നാണ് അംബിക പറയുന്നത്.
അംബികയ്ക്കെതിരേ 46 കോടി രൂപയുടെ ചെക്ക് തട്ടിപ്പ് പരാതിയുമായിട്ടാണ് സഹോദരിയും നടിയുമായ രാധ രംഗത്തെത്തിയത്. അംബികയ്ക്കും സഹോദരൻ മല്ലികാർജുന കുഞ്ഞൻ നായർക്കുമെതിരേയാണ് ചെന്നൈ സിറ്റി പോലീസ് കമ്മിഷണർ ഓഫീസിൽ നേരിട്ടെത്തി രാധ പരാതി നൽകിയത്. അംബികയും സഹോദരനും ചേർന്ന് തന്റെ ചെക്കുകൾ ദുരുപയോഗം ചെയ്ത് അക്കൗണ്ടിൽനിന്ന് 46 കോടി രൂപ തട്ടിയെടുക്കാൻ ശ്രമിച്ചെന്നാണ് പരാതി.
Comments