ബോളിവുഡിന്റെ താരറാണിമാരില്‍ മുന്‍പന്തിയിലാണ് ആലിയ ഭട്ട്. സിനിമാപാരമ്പര്യമുള്ള കുടുംബത്തില്‍ നിന്നെത്തിയ ആലിയ രണ്‍ബീര്‍ കപൂറിനെ വിവാഹം ചെയ്ത് കപൂര്‍ കുടുംബത്തിന്റെ മരുമകള്‍ കൂടിയായതോടെ ആലിയയുടെ ആരാധകവൃന്ദം ഇരട്ടിയായി. താരത്തിന്റെ സിനിമകള്‍ക്കായി വലിയ ആവേശത്തോടെയാണ് ആരാധകര്‍ കാത്തിരിക്കുന്നത്.
അഭിനയമികവില്‍ മാത്രമല്ല തന്റെ വ്യത്യസ്തമായ ഫാഷൻ പരീക്ഷണങ്ങളിലൂടെയും താരം എപ്പോഴും ശ്രദ്ധിക്കപ്പെടാറുണ്ട്. പരമ്പരാഗത വസ്ത്രങ്ങളായാലും മോഡേൺ വെയറായാലും തന്റേതായ ഒരു ക്ലാസിക് ലുക്ക് നിലനിര്‍ത്താന്‍ ആലിയക്ക് കഴിയാറുണ്ട്. ഏറെ അലങ്കാരങ്ങളുള്ള വസ്ത്രങ്ങൾ പോലും അനായാസമായി ധരിക്കാൻ താരത്തിന് കഴിയാറുണ്ട്.
ഇപ്പോഴിതാ സീക്വിനുകള്‍ നിറഞ്ഞ ഷോര്‍ട്ട് സ്ലീവ് ടോപ്പും മിനി സ്കർട്ടും ധരിച്ച് സ്റ്റൈലിഷ് ലുക്കില്‍ എത്തിയിരിക്കുകയാണ് ആലിയ ഭട്ട്. ആശിഷിന്റെ ‘ഫോൾ 2026’ കളക്ഷനിൽ നിന്നുള്ള ഒരു ‘ടു-പീസ്’ സെറ്റിലാണ് താരം തിളങ്ങുന്നത്. റൗണ്ട് നെക്ക്ലൈന്‍ ടോപ്പും ആക്സസറീസായി ആകർഷകമായ മോതിരങ്ങളും എമറാള്‍ഡ് ഹീൽസ് ചെരുപ്പുകളുമാണ് ഈ ഔട്ട്ഫിറ്റിന് സ്റ്റൈലിഷ് ലുക്ക് നല്‍കുന്നത്. സില്‍വര്‍ കളര്‍ സീക്വന്‍ഡ് ഡ്രസ്സില്‍ ചുവപ്പ്, നീല, മഞ്ഞ, പിങ്ക് എന്നീ നിറങ്ങളിലുള്ള ഫ്ലോറല്‍ മോട്ടീഫുകളുമുണ്ട്.
തന്റെ സഹോദരി ഷഹീൻ ഭട്ടിനൊപ്പം നിർമ്മിച്ച ‘ഡോണ്ട് ബി ഷൈ’ എന്ന ചിത്രത്തിന്റെ പ്രത്യേക സ്‌ക്രീനിംഗിനായാണ് ആലിയ ഈ വേഷമണിഞ്ഞത്. രൺബീർ കപൂർ, നീതു കപൂർ, സോണി റസ്ദാൻ, മഹേഷ് ഭട്ട് എന്നിവരും ചടങ്ങിനെത്തിയിരുന്നു.
സഞ്ജയ് ലീല ബൻസാലിയുടെ ബിഗ് ബജറ്റ് പ്രൊജക്ടായ ‘ലവ് ആൻഡ് വാർ’ ആണ് ആലിയയുടെ ഷൂട്ടിംഗ് പുരോഗമിക്കുന്ന ചിത്രം. ഇതിന്റെ സെക്കൻഡ് പോസ്റ്ററാണ് ഇപ്പോള്‍ സോഷ്യല്‍ മീഡിയയില്‍ നിറയുന്നത്. ചിത്രത്തിൽ നായികയാകുന്ന ആലിയ ഭട്ടിന്റെ ക്യാരക്ടർ ലുക്കാണ് പോസ്റ്ററിലുള്ളത്. അതീവ ഗ്ലാമറസ് ലുക്കിലെത്തുന്ന ആലിയയെ പോസ്റ്ററില്‍ കാണാം. രക്തം പുരണ്ട കൈകളുമായിവിന്റേജ് കാറിൽ ഡ്രൈവ് ചെയ്തു പോകുന്ന രൺബീറിന്റെ ലുക്ക് ആണ് ആദ്യം പുറത്തുവന്ന ഫസ്റ്റ് ലുക്ക് പോസ്റ്റര്‍. അടുത്തതായി ആരാധകര്‍ കാത്തിരിക്കുന്നത് വിക്കി കൗശാലിന്റെ പോസ്റ്ററാണ്. 2027 ജനുവരി റിലീസായാണ് ചിത്രം തിയറ്ററുകളിലെത്തുക.
Comments