ന്യൂഡൽഹി: വെള്ളിയാഴ്ച ഡൽഹിയിലെ ബിജെപി ആസ്ഥാനത്തിന് എതിർവശത്തുള്ള പാർക്കിൽ നടന്ന 'ഭജൻ ക്ലബ്ബിങ്' പരിപാടിയിൽ പ്രധാനമന്ത്രി നരേന്ദ്ര മോദി പങ്കെടുത്തിനെ പരിഹസിച്ച് കർണാടക കോൺഗ്രസ് നേതാവും മന്ത്രിയുമായ പ്രിയങ്ക് ഖാർഗെ നടത്തിയ പരാമർശത്തിന് ബിജെപിയുടെ മറുപടി. ഇത്തരം പരാമർശത്തിലൂടെ കോൺഗ്രസ് ഒരിക്കൽ കൂടി ഇന്ത്യൻ പാരമ്പര്യത്തെ അപമാനിച്ചതാണെന്ന് ബിജെപി ആരോപിച്ചു. തുടർച്ചയായ തിരഞ്ഞെടുപ്പ് തോൽവികൾ നേരിടുന്ന കോൺഗ്രസ് അധ്യക്ഷൻ രാഹുൽ ഗാന്ധിയെ ചോദ്യം ചെയ്യാൻ പ്രിയങ്ക് ഖാർഗെയ്ക്ക് ധൈര്യമുണ്ടോ എന്നും ബിജെപി വക്താവ് സി.ആർ. കേശവൻ ചോദിച്ചു.
"കോൺഗ്രസ് ഒരിക്കൽ കൂടി ഭാരതത്തിന്റെ അസാധാരണമായ ഭജൻ, ഭക്തി സാംസ്കാരിക പൈതൃകത്തെ പരിഹസിക്കുന്നു. സ്വയം സേവിക്കുന്ന കോൺഗ്രസ് കുടുംബത്തിന്റെ സ്തുതിഗീതങ്ങൾ മാത്രം പാടാൻ അറിയാവുന്ന ജൂനിയർ ഖാർഗെയിൽ നിന്ന് ഇതിൽ കൂടുതൽ എന്ത് പ്രതീക്ഷിക്കാൻ കഴിയും?" എന്ന് ബിജെപി വക്താവ് സി.ആർ. കേശവൻ പ്രിയങ്ക് ഖാർഗെയ്ക്ക് മറുപടിയായി പോസ്റ്റ് ചെയ്തു. തുടർച്ചയായ തിരഞ്ഞെടുപ്പ് തോൽവികൾ നേരിടുന്ന കോൺഗ്രസ് അധ്യക്ഷൻ രാഹുൽ ഗാന്ധിയെ ചോദ്യം ചെയ്യാൻ പ്രിയങ്ക് ഖാർഗെയ്ക്ക് ധൈര്യമുണ്ടോ എന്നും അദ്ദേഹം ചോദിച്ചു. "രാഹുൽ ഗാന്ധിയുടെ ദയനീയമായ നേതൃത്വത്തിന് കീഴിൽ കോൺഗ്രസ് പാർട്ടി 3 ലോക്സഭാ തിരഞ്ഞെടുപ്പുകളിലും ഏകദേശം 100 നിയമസഭാ തിരഞ്ഞെടുപ്പുകളിലും പരാജയപ്പെട്ടിട്ടും, അതിനെക്കുറിച്ച് സംസാരിക്കാൻ ജൂനിയർ ഖാർഗെയ്ക്ക് ധൈര്യമുണ്ടോ?" എന്നും അദ്ദേഹം ചോദിച്ചു.
പരമ്പരാഗത ഭക്തിഗാനങ്ങൾക്കൊപ്പം യുവജനങ്ങൾ ഒത്തുകൂടി സംഗീതകച്ചേരിയുടെ മാതൃകയിൽ കൈയടിച്ചും നൃത്തം ചെയ്തും ആസ്വദിക്കുന്ന ആധുനിക സാംസ്കാരിക രീതിയാണ് ഭജൻ ക്ലബ്ബിങ്. ലഹരി വസ്തുക്കളില്ലാതെ ക്ലബ്ബ് അന്തരീക്ഷത്തിൽ നടക്കുന്ന ഇത്തരം പരിപാടികൾ ഇന്ത്യയിലെ പല നഗരങ്ങളിലും വിദേശത്തും ജനപ്രീതി നേടിക്കൊണ്ടിരിക്കുകയാണ്. മുൻനിരയിൽ ഇരുന്ന് ശ്രീരാമനായുള്ള ഭജന് കയ്യടിക്കുകയും തബല പോലുള്ള വാദ്യം മുഴക്കുകയും ചെയ്യുന്ന പ്രധാനമന്ത്രിയുടെ ദൃശ്യങ്ങൾ സമൂഹമാധ്യമങ്ങളിൽ ശ്രദ്ധ നേടിയിരുന്നു.സംഘപരിവാർ സൈദ്ധാന്തികൻ ദീനദ്യാൽ ഉപാധ്യായയുടെ 110-മത് ജന്മവാർഷികത്തോടനുബന്ധിച്ചായിരുന്നു ഭജൻ ക്ലബ്ബിങ് നടത്തിയത്.
പരിപാടിയിലെ പ്രധാനമന്ത്രിയുടെ സാന്നിധ്യത്തെ ചോദ്യം ചെയ്ത പ്രിയങ്ക് ഖാർഗെ, ഭജൻ ക്ലബ്ബിങ്ങിന് സമയമുള്ള പ്രധാനമന്ത്രി തിരഞ്ഞെടുപ്പ് കമ്മീഷനെക്കുറിച്ചുള്ള ഗുരുതരമായ ചോദ്യങ്ങൾക്ക് മറുപടി നൽകാൻ തയ്യാറാകുന്നില്ലെന്ന് കുറ്റപ്പെടുത്തി.
"പ്രധാനമന്ത്രിക്ക് 'ഭജൻ ക്ലബ്ബിങ്ങിന്' സമയമുണ്ട്, എന്നാൽ തിരഞ്ഞെടുപ്പ് കമ്മീഷനിലൂടെ ജാതിവ്യവസ്ഥയെ തകർക്കുന്നതിനെക്കുറിച്ചുള്ള ഗുരുതരമായ ചോദ്യങ്ങൾക്ക് മറുപടി നൽകാൻ സമയമില്ല" എന്ന് അദ്ദേഹം എക്സിൽ കുറിച്ചു. കഴിഞ്ഞ 13 വർഷമായി സർക്കാർ നേരിടുന്ന പ്രയാസകരമായ ചോദ്യങ്ങൾക്ക് മുന്നിൽ പ്രധാനമന്ത്രി മൗനം പാലിക്കുന്നതാണ് സ്ഥിരം രീതിയെന്നും ആഘോഷങ്ങൾക്ക് സമയമുള്ള അദ്ദേഹത്തിന് ജനങ്ങൾക്ക് മുന്നിൽ ഉത്തരവാദിത്തമില്ലെന്നും പ്രിയങ്ക് ഖാർഗെ വിമർശിച്ചിരുന്നു.
Comments