വാസ്തവം എന്ന ചിത്രത്തിലൂടെ തുടക്കം കുറിച്ച് പിന്നീട് നിരവധി സിനിമകളില്‍ നായികയടക്കമുള്ള കഥാപാത്രങ്ങള്‍ ചെയ്ത ശേഷം മിനിസ്ക്രീൻ പ്രേക്ഷകരുടെ ഇഷ്ടതാരമായി മാറിയ അഭിനേത്രിയാണ് വരദ. പ്രശസ്ത സംവിധായകൻ ലോഹിതദാസാണ് എമിമോള്‍ക്ക് വരദ എന്ന പേരു നല്‍കിയത്. ‘സുൽത്താൻ’ എന്ന സിനിമയിലെ നായികയായി അരങ്ങേറ്റം കുറിച്ച വരദ പിന്നീട് അവതാരകയായും മോഡലായും മിനിസ്‌ക്രീനില്‍ തിളങ്ങി. നിരവധി കരുത്തുറ്റ കഥാപാത്രങ്ങള്‍ വരദ മിനിസ്ക്രീന്‍ പ്രേക്ഷകര്‍ക്ക് സമ്മാനിച്ചിട്ടുണ്ട്. തന്റെ എല്ലാ വിശേഷങ്ങളും വരദ ആരാധകരുമായി പങ്കിടാറുണ്ട്.
ഇപ്പോഴിതാ മാംഗല്യം എന്ന തന്റെ സീരിയലിലെ ലാസ്റ്റ് ഡേ ഷൂട്ടില്‍ നിന്നുള്ള ചിത്രം പങ്കിട്ട് വൈകാരികമായ പോസ്റ്റ് പങ്കിടുകയാണ് വരദ. തന്റെ സന്തോഷം, സങ്കടം, ദേഷ്യം, ഫ്രസ്ട്രേഷന്‍സ്, ആരോഗ്യ പ്രശ്നങ്ങള്‍ എല്ലാം ഈ ടീം കണ്ടിട്ടുണ്ടെന്നും കൂട്ടിക്കിഴിച്ചു നോക്കിയാൽ എല്ലാം കൊണ്ടും സന്തോഷം മാത്രം തന്ന വര്‍ക്കായിരുന്നു ഇതെന്നും വരദ കുറിക്കുന്നു.
‘‘ഗുഡ്ബൈ...ഇതാണ് മാംഗല്യം സീരിയലിൽ നിന്നുള്ള എന്റെ അവസാനത്തെ ഫോട്ടോസ്...
‘മാംഗല്യം’ - ആയിരത്തിലധികം എപ്പിസോഡുകൾ.. മൂന്നിലധികം വർഷങ്ങൾ.. അഭിനയ പ്രാധാന്യമുള്ള കഥാപാത്രം.. എന്റെ കരിയറിൽ കിട്ടിയ മറ്റൊരു ഹിറ്റ്‌.. ഒത്തിരി സന്തോഷം.. അഭിമാനം...പക്ഷെ എനിക്ക് മാംഗല്യം ഇതു മാത്രമല്ല...മാംഗല്യത്തിൽ നിന്ന് എനിക്ക് ഒരു പിടി നല്ല സൗഹൃദങ്ങൾ ലഭിച്ചു.. ഒരു പറ്റം നല്ല മനുഷ്യരോടൊപ്പം വർക്ക്‌ ചെയ്യാൻ സാധിച്ചു.. കൂട്ടിക്കിഴിച്ചു നോക്കിയാൽ എല്ലാം കൊണ്ടും സന്തോഷം മാത്രം തന്ന വര്‍ക്ക്.. സത്യത്തിൽ ഈ മൂന്ന് വർഷത്തിൽ എനിക്ക് ലഭിച്ച മറ്റൊരു കുടുംബമായിരുന്നു മാംഗല്യം..
എന്റെ സന്തോഷം, സങ്കടം, ദേഷ്യം, ഫ്രസ്ട്രേഷന്‍സ്, ആരോഗ്യ പ്രശ്നങ്ങള്‍ എല്ലാം ഈ ടീം കണ്ടിട്ടുണ്ട്.. ഈ യാത്രയിൽ കൂടെ നടന്നതിന്.. ചേർത്ത് നിർത്തിയതിന്.. ഈ സീരിയലിലെ മുന്നണിയിലും പിന്നണിയിലും പ്രവർത്തിച്ച എല്ലാവർക്കും ഒരുപാട് നന്ദി...ഇത്രയും ശക്തമായ ഒരു കഥാപാത്രം എനിക്ക് തന്ന സീ കേരളത്തിനും ഫിക്ഷന്‍ ഹൗസ് പ്രൊഡക്ഷന്‍സിനും ഒരു വലിയ നന്ദി..
അവന്തിക എന്ന കഥാപാത്രത്തിന്റെ രൂപം എന്റേതും ശബ്ദം ആര്‍ജെ നീനുവിന്റേതുമായിരുന്നു.. ആ ശബ്ദം കൂടി ആയപ്പോഴാണ് കഥാപാത്രം പൂർണമായത്.. അവന്തികയുടെ ശബ്ദമായതിന് നന്ദി ആര്‍ ജെ നീനു.
എന്റെ പ്രിയപ്പെട്ട പ്രേക്ഷകരെ.. വർഷങ്ങളായി നിങ്ങൾ എനിക്ക് തന്ന സ്നേഹവും സപ്പോർട്ടും കൊണ്ടാണ് ഇന്നത്തെ ഞാൻ ഉണ്ടായത്.. അവന്തിക എന്ന ക്രൂരയായ വില്ലത്തിയായിട്ടു പോലും നിങ്ങൾ അവന്തികയെ വെറുത്തു കൊണ്ട് എന്നെ സ്നേഹിച്ചു.. നിങ്ങളോട്‌ എത്ര നന്ദി പറഞ്ഞാലും മതിയാവില്ല.. എന്റെ ഇനിയുള്ള യാത്രകളിലും നിങ്ങളുടെ ഈ സ്നേഹവും പ്രാർത്ഥനയും പ്രതീക്ഷിച്ചു കൊണ്ട്..
നിങ്ങളുടെ സ്വന്തം, വരദ ...’’ എന്നാണ് ലൊക്കേഷന്‍ ചിത്രങ്ങള്‍ പങ്കിട്ട് വരദ കുറിച്ചിരിക്കുന്നത്.
തിരക്കേറിയ നായികയായപ്പോള്‍ വ്യക്തിജീവിതത്തിലും ഒരുപാട് വെല്ലുവിളികള്‍ വരദ നേരിട്ടു. സീരിയലുകളിൽ വില്ലൻ വേഷങ്ങൾ ചെയ്തിരുന്ന ജിഷിൻ മോഹനെ പ്രണയിച്ചു വിവാഹം കഴിച്ച വരദയ്ക്ക് ജിയാൻ എന്നൊരു മകന്‍ ജനിച്ചു. പക്ഷേ ആ വിവാഹം പിന്നീട് വിവാഹമോചനത്തില്‍ ചെന്നു കലാശിച്ചു. തന്റെ വിവാഹം പരാജയപ്പെടാനുള്ള കാരണം വരദയാണെന്ന് ജിഷിന്‍ പലപ്പോഴും പറയാതെ പറഞ്ഞിട്ടുണ്ട്. തന്റെ സഹതാരമായിരുന്ന അമേയ നായരെ രണ്ടാമത് വിവാഹം ചെയ്ത് ജിഷിനിപ്പോള്‍ സന്തോഷത്തോടെ ജീവിക്കുന്നു. എന്നാല്‍ വരദയാകട്ടെ തന്റെ ഏകമകനു വേണ്ടി ഉഴിഞ്ഞു വച്ചിരിക്കുകയാണ് തന്റെ ജീവിതം.
Comments