മദ്യപിച്ച് വാഹനമോടിച്ചതിന് യൂട്യൂബറും സിനിമ റിവ്യൂവറുമായ അശ്വന്ത് കോക്ക് പിടിയിലായ സംഭവത്തിൽ പ്രതികരണവുമായി നടൻ അനീഷ് ഗോപാലിന്റെ ഭാര്യ വർണ അനീഷ് . അശ്വന്ത് കോക്കിനെക്കുറിച്ച് മുമ്പ് അനീഷ് ഗോപാൽ പറഞ്ഞിട്ടുള്ള വാക്കുകൾ സമൂഹമാധ്യമങ്ങളിൽ പങ്കുവെച്ചുകൊണ്ടായിരുന്നു വർണയുടെ പ്രതികരണം.
"അശ്വന്ത് കോക്കിനോടാണ് പറയുന്നത്; റിവ്യൂ പറയുമ്പോൾ നീ വെള്ളമടിച്ചിട്ടാണ് പറയുന്നത്, സത്യമല്ലേ? ഞാനവനെ ഫോൺ ചെയ്തു. അപ്പോൾ അവൻ എന്നോട് പറയുന്നത്, ഞാൻ രണ്ടെണ്ണം അടിച്ചിട്ട് ഒരു ഓളത്തിൽ പറഞ്ഞുപോയതാണെന്നാണ്" - പഴയ അഭിമുഖത്തിൽ അനീഷ് പറയുന്ന ഈ ഭാഗമാണ് വർണ വീഡിയോയിൽ ഉൾപ്പെടുത്തിയിരിക്കുന്നത്.
പഴയ അഭിമുഖത്തിൽ നിന്നുള്ള അനീഷിന്റെ വാക്കുകളും, പോലീസ് പിടിയിലാകുന്ന അശ്വന്ത് കോക്കിന്റെ ദൃശ്യങ്ങളും കോർത്തിണക്കിയാണ് വർണ വീഡിയോ പങ്കുവെച്ചിരിക്കുന്നത്. 'ഇപ്പോ എങ്ങനെ ഇരിക്കണ്' എന്ന ക്യാപ്ഷനോടെ പങ്കുവെച്ച ഈ വീഡിയോ ഇതിനോടകം സോഷ്യൽ മീഡിയയിൽ വലിയ ചർച്ചയായിട്ടുണ്ട്.
ധ്യാൻ ശ്രീനിവാസൻ നായകനായ 'വിവാഹ്' എന്ന ചിത്രത്തിന്റെ റിവ്യുവിൽ അനീഷിനെതിരെ അശ്വന്ത് കോക്ക് നടത്തിയ പരാമർശം വലിയ വിവാദമായിരുന്നു. ഇതിനെതിരെ അനീഷും വർണയും ശക്തമായി രംഗത്തെത്തിയിരുന്നു. അശ്വന്ത് കോക്ക് നടത്തിയ വ്യക്തിഹത്യ കുട്ടികളെ അടക്കം ബാധിച്ചുവെന്നും, റിവ്യുവിലെ അധിക്ഷേപങ്ങൾ ഏൽപ്പിച്ച മാനസികാഘാതത്തിൽ നിന്നും പുറത്തുകടക്കാൻ വർണയ്ക്ക് മാനസികാരോഗ്യ വിദഗ്ധന്റെ സഹായം തേടേണ്ടി വന്നുവെന്നും അനീഷ് മുൻപ് വെളിപ്പെടുത്തിയിരുന്നു.
അതേസമയം, മദ്യപിച്ച് വാഹനമോടിച്ച കേസിൽ അശ്വന്ത് കോക്കിന് പിന്നീട് ജാമ്യം ലഭിച്ചു. കോഴിക്കോട് നടക്കാവ് പോലീസ് സ്റ്റേഷനിൽ രജിസ്റ്റർ ചെയ്ത കേസിലാണ് ജാമ്യം അനുവദിച്ചത്. തിങ്കളാഴ്ച വൈകിട്ടോടെ കോഴിക്കോട് എരഞ്ഞിപ്പാലത്തിന് സമീപമായിരുന്നു സംഭവം. അശ്വന്ത് ഓടിച്ച വാഹനം മറ്റ് മൂന്ന് വാഹനങ്ങളിൽ ഇടിച്ച് നിർത്താതെ പോയെന്നാണ് പരാതി. തുടർന്ന് നാട്ടുകാർ ചേർന്ന് യൂട്യൂബറെ തടഞ്ഞുവെക്കുകയും പോലീസിന് കൈമാറുകയുമായിരുന്നു.
Comments