ദുബായ്: കഴിഞ്ഞ നാല് വര്‍ഷമായി ഫ്‌ളൈ ദുബായില്‍ ജോലി ചെയ്യുന്നു. കപ്റ്റന്‍ സ്മിത്ത് മച്ചാറിന്റെ ലിങ്ക്ഡ്ഇന്‍ പ്രൊഫൈലില്‍ കാണിച്ചിരിക്കുന്നത് ഇങ്ങിനെയാണ്. അദ്ദേഹത്തിന് ബോയിംഗ് 737 ഫ്‌ലീറ്റില്‍ 13 വര്‍ഷത്തിലധികം വാണിജ്യ പറക്കല്‍ പരിചയമുണ്ട്. ഇന്ത്യന്‍ പൗരനായ ഈ പൈലറ്റാണ് കഴിഞ്ഞ ദിവസം വിമാന അട്ടിമറിക്കുള്ള ശ്രമം പരാജയപ്പെടുത്തി കോ-പൈലറ്റിനെ ധീരമായി ചെറുത്തുതോല്‍പ്പിച്ച ഫ്‌ളൈ ദുബായ് യുടെ വിമാനം സുരക്ഷിതമായി ഇറക്കിയത്.
ഫ്‌ലൈദുബായില്‍ ജോലി ചെയ്യുന്നതിന് മുന്‍പ് പത്തോളം വര്‍ഷം ഇന്ത്യയിലെ പ്രമുഖ ലോ-കോസ്റ്റ് എയര്‍ലൈനായ സ്‌പൈസ് ജെറ്റില്‍ അദ്ദേഹം സേവനം അനുഷ്ഠിച്ചിരുന്നു. ബോയിംഗ് 737 ഫ്‌ലീറ്റില്‍ 13 വര്‍ഷത്തിലേറെത്തെ വാണിജ്യ പറക്കല്‍ പരിചയമുണ്ട് അദ്ദേഹത്തിന്. ഒരു ലൈന്‍ ട്രെയിനിങ് ക്യാപ്റ്റനായി സേവനമനുഷ്ഠിച്ചിട്ടുള്ള അദ്ദേഹത്തിന് 9,750-ല്‍ അധികം ഫ്‌ലൈയിംഗ് അവര്‍ ഉണ്ട്.
2011-ലാണ് കപ്റ്റന്‍ മച്ചാര്‍ സ്‌പൈസ് ജെറ്റില്‍ ചേരുന്നത്. ലൈന്‍ ട്രെയിനിങ് ക്യാപ്റ്റന്‍, സീനിയര്‍ കമാന്‍ഡര്‍ തുടങ്ങി നിരവധി പദവികള്‍ അദ്ദേഹം അവിടെ വഹിച്ചിട്ടുണ്ട്. 2022 ജൂണില്‍ സ്‌പൈസ് ജെറ്റിലെ ജോലി അവസാനിപ്പിച്ച് അദ്ദേഹം നേരിട്ടുള്ള എന്‍ട്രി ക്യാപ്റ്റനായി ഫ്‌ലൈദുബായില്‍ ചേരുകയായിരുന്നു. ഫ്‌ലൈ ദുബായിയുടെ വിവരമനുസരിച്ച്, ദുബായ് ഇന്റര്‍നാഷണലില്‍ നിന്ന് ബെന്‍ ഗുറിയോണ്‍ അന്താരാഷ്ട്ര വിമാനത്താവളത്തിലേക്ക് ബുധനാഴ്ച രാവിലെ പുറപ്പെട്ടതായിരുന്നു എഫ് ഇസഡ് 1073 നമ്പര്‍ വിമാനം.
ആകാശത്തുവെച്ച് വിമാനത്തിന്റെ കോക്ക്പിറ്റില്‍ പൈലറ്റുമാര്‍ തമ്മില്‍ വാക്കേറ്റമുണ്ടായതായും, ഒരു പൈലറ്റ് വിമാനത്തിന്റെ സംവിധാനങ്ങള്‍ അട്ടിമറിക്കാന്‍ ശ്രമിച്ചതായും ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു ഒരു വീഡിയോ പ്രസ്താവനയില്‍ പറഞ്ഞു. ക്യാപ്റ്റന്‍ മച്ചാര്‍ അദ്ദേഹത്തെ തടയാന്‍ ശ്രമിച്ചെങ്കിലും കുത്തേറ്റു.
'യാത്രക്കാരുമായി വിമാനം ഇസ്രായേലിലേക്ക് അടുക്കുന്നതിനിടയില്‍, ഒരു പൈലറ്റ് മറ്റൊരു പൈലറ്റിനെ കുത്തുകയും വിമാനത്തില്‍ ഉണ്ടായിരുന്ന എല്ലാവരെയും സഹിതം വിമാനം ഇടിച്ചിറക്കാന്‍ ശ്രമിക്കുകയും ചെയ്തു' എന്ന് അദ്ദേഹം പറഞ്ഞു. എന്നാല്‍ ഒരു ക്രൂ അംഗവും യാത്രക്കാരനും ചേര്‍ന്ന് കോക്ക്പിറ്റില്‍ അതിക്രമിച്ചു കയറി പ്രതിയെ 'കീഴടക്കുകയായിരുന്നു'. കോക്ക്പിറ്റില്‍ മല്‍പ്പിടുത്തത്തം നടക്കുമ്പോള്‍ രണ്ട് മിനിറ്റിനുള്ളില്‍ വിമാനം 17,400 അടിയിലധികം താഴേക്ക് പതിച്ചുവെങ്കിലും, ഒരു ക്രൂ അംഗം കോക്ക്പിറ്റില്‍ പ്രവേശിച്ച് വിമാനം നിയന്ത്രണവിധേയമാക്കിയതായി നെതന്യാഹു വ്യക്തമാക്കി. തുടര്‍ന്ന് വിമാനം വഴിതിരിച്ചുവിട്ട് സൗദി അറേബ്യയിലെ വിമാനത്താവളത്തില്‍ സുരക്ഷിതമായി ലാന്‍ഡ് ചെയ്തു. യാത്രക്കാരെല്ലാം സുരക്ഷിതരാണ്.
സംഭവവുമായി ബന്ധപ്പെട്ട് പ്രതിയെ അറസ്റ്റ് ചെയ്യുകയും സൗദി അധികൃതര്‍ ചോദ്യം ചെയ്തുവരികയും ചെയ്യുന്നു. ഇസ്രായേല്‍, ഇന്ത്യ, യുണൈറ്റഡ് അറബ് എമിറേറ്റ്‌സ് എന്നിവിടങ്ങളില്‍ നിന്നുള്ളവരാണ് വിമാനത്തിലുണ്ടായിരുന്നതെന്ന് ഇസ്രായേല്‍ വിദേശകാര്യ മന്ത്രാലയം അറിയിച്ചു. വിമാനത്തിലുണ്ടായിരുന്ന നാല് യാത്രക്കാര്‍ക്ക് അമേരിക്കന്‍ പൗരത്വമുണ്ടെന്ന് യുഎസ് സ്റ്റേറ്റ് ഡിപ്പാര്‍ട്ട്‌മെന്റും വ്യക്തമാക്കി.
ഇസ്രായേലിലേക്കും തിരിച്ചുമുള്ള സര്‍വീസുകള്‍ താല്‍ക്കാലികമായി നിര്‍ത്തിവയ്ക്കുന്നതായി ഫ്‌ളൈദുബായ് അറിയിച്ചു. പ്രതിയെ ചോദ്യം ചെയ്യുന്നതില്‍ ഇസ്രായേലും പങ്കാളിയാകാന്‍ യുഎഇ പ്രസിഡന്റ് സമ്മതിച്ചതായി നെതന്യാഹു പറഞ്ഞു. ഇസ്രായേലില്‍ ഹമാസിന്റെ നേതൃത്വത്തിലുള്ള ഒക്ടോബര്‍ 7 ആക്രമണത്തിന്റെ വാര്‍ഷികം അടുത്തുവരുന്ന പശ്ചാത്തലത്തില്‍, സുരക്ഷാ ഭീഷണികളെക്കുറിച്ച് നെതന്യാഹു കഴിഞ്ഞ ദിവസങ്ങളില്‍ മുന്നറിയിപ്പ് നല്‍കിയിരുന്നു.
Comments