തിരുവനന്തപുരം: ഗ്യാനേഷ്‌കുമാറിനെതിരെ നടത്തിയ യൂത്ത് കോണ്‍ഗ്രസിന്റെ പ്രകടത്തിന് നേരെയാണ് ആദ്യം കല്ലേറ് ഉണ്ടായതെന്ന് കോണ്‍ഗ്രസ് നേതാവ് പി.സി. വിഷ്ണുനാഥ്. സംഘര്‍ഷം ഉണ്ടായത് അതിന്റെ ഭാഗമായിരുന്നെന്നും പറഞ്ഞു. ഇന്നലെ രാത്രിയുണ്ടായ യൂത്ത് കോണ്‍ഗ്രസ് - എസ്എഫ്‌ഐ സംഘര്‍ഷത്തിലായിരുന്നു പ്രതികരണം.
ഇത് എസ്എഫ്‌ഐയ്ക്ക് എതിരേയുള്ള സമരമല്ലല്ലോ എന്നും യൂത്ത് കോണ്‍ഗ്രസ് പ്രകടനത്തിന് നേരെ പിന്നെ എന്തിനാണ് എസ്എഫ്‌ഐ കല്ലെറിയുന്നത് എന്നും ചോദിച്ചു. യൂണിവേഴ്സിറ്റി കോളേജില്‍ എസ്എഫ്‌ഐ ഗുണ്ടായിസം നടത്തുന്നുണ്ടോ എന്ന് എസ്എഫ്‌ഐ യോട് ചോദിച്ചാല്‍ മതിയെന്നും ഗുണ്ടകളെ ഹോസ്റ്റലില്‍ താമസിപ്പിക്കുമ്പോള്‍ പഠിക്കാനായെത്തിയ വിദ്യാര്‍ത്ഥികളെ ആണ് ബുദ്ധിമുട്ടിക്കുന്നതെന്നും പി സി വിഷ്ണുനാഥ് പറഞ്ഞു.
സംഘര്‍ഷത്തിനെതിരെ ഉണ്ടായ പൊലീസ് നടപടിയില്‍ വിശദീകരണം പോലീസ് നല്‍കും. അടിക്ക് തിരിച്ചടി എന്നത് തങ്ങളുടെ ശൈലി അല്ലെന്നും വിഷയത്തില്‍ ഉന്നതരാഷ്ട്രീയ നേത്വത്വം ഇടപെടണം എന്നും ആവശ്യപ്പെട്ടു. ഇതിനുംമാത്രം ബീയര്‍ കുപ്പികള്‍ എങ്ങിനെയാണ് യൂണിവേഴ്സിറ്റി ഹോസ്റ്റലില്‍ എത്തിയതെന്ന് പരിശോധിക്കണമെന്ന് നേരത്തേ അബിന്‍വര്‍ക്കിയും പ്രതികരിച്ചിരുന്നു.
ഗ്യാനേഷ്‌കുമാറിനെതിരേ പ്രതിഷേധിക്കുന്നതില്‍ എസ്എഫ്‌ഐ യ്ക്ക് എന്തിനാണ് ചൊറിച്ചില്‍ എന്നും അബിന്‍വര്‍ക്കി ചോദിച്ചു. സമാധാനപരമായാണ് സമരം തുടങ്ങിയതെന്നും യൂണിവേഴ്സിറ്റി ഹോസ്റ്റലിന് മുന്നിലെത്തിയപ്പോള്‍ അതിനുള്ളില്‍ നിന്ന് കല്ലേറുണ്ടായെന്നും അബിന്‍വര്‍ക്കി പറഞ്ഞു.
Comments