സ്ത്രീയും പുരുഷനും ഒരുമിച്ച് ജോലിചെയ്താൽ ദൈവഭയമുള്ള സ്ത്രീകൾ "നശിച്ചുപോകാൻ" സാധ്യത; ഫ്ലൈദുബായ് കോ-പൈലറ്റിന്റെ പോസ്റ്റ്

വാഷിംഗ്ടൺ: ഫ്ലൈ ദുബായ് വിമാനത്തിൽ വെച്ച് ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിനെ ആക്രമിച്ച കേസിൽ ആരോപണവിധേയനായ ഒമാനി കോ-പൈലറ്റ് ഹമാം അൽ ഹമ്മാമിയുടെ സോഷ്യൽ മീഡിയ അക്കൗണ്ടുകളിൽ നിന്ന് നീക്കം ചെയ്ത പോസ്റ്റുകൾ, സ്ത്രീകൾ, മതം, സ്ത്രീപുരുഷന്മാർ ഒരുമിച്ച് ജോലി ചെയ്യുന്ന തൊഴിലിടങ്ങൾ എന്നിവയെക്കുറിച്ചുള്ള അദ്ദേഹത്തിന്റെ കാഴ്ചപ്പാടുകളിലേക്ക് വെളിച്ചം വീശുന്നു.

വിവാഹശേഷം നിഖാബ് ധരിക്കാനും ജോലി ഉപേക്ഷിക്കാനും തയ്യാറുള്ള ഒരു പെൺകുട്ടിയെ കണ്ടെത്താനുള്ള ബുദ്ധിമുട്ടുകളെക്കുറിച്ച് അൽ ഹമ്മാമി വിവരിച്ചിരുന്നതായി വിഷയവുമായി ബന്ധപ്പെട്ട നിരവധി ഉറവിടങ്ങളെ ഉദ്ധരിച്ച് സിഎൻഎൻ റിപ്പോർട്ട് ചെയ്തു. നീക്കം ചെയ്ത മറ്റൊരു പോസ്റ്റിൽ, സ്ത്രീ-പുരുഷന്മാർ ഒരുമിച്ച് ജോലി ചെയ്യുന്ന അന്തരീക്ഷം സ്ത്രീകളെ എങ്ങനെ ബാധിക്കുന്നുവെന്ന് അദ്ദേഹം ചോദ്യം ചെയ്യുകയും ഇത്തരം അന്തരീക്ഷത്തിൽ ദൈവഭയമുള്ള സ്ത്രീകൾ "നശിച്ചുപോകാൻ" സാധ്യതയുണ്ടെന്ന് എഴുതുകയും ചെയ്തു.

2021, 2022 വർഷങ്ങളിലെ നീക്കം ചെയ്ത ഏകദേശം 3,000 ട്വീറ്റുകളുടെ ഭാഗമായിരുന്നു ഈ പോസ്റ്റുകൾ. നിർമ്മിതബുദ്ധി (എഐ) ഉപയോഗിച്ചുള്ള സെമാന്റിക് സെർച്ച് മോഡൽ വഴിയാണ് സിഎൻഎൻ ഇവ വിശകലനം ചെയ്തത്. സെപ്റ്റംബർ 30-ന് ദുബായ്-ടെൽ അവീവ് വിമാനത്തിന്റെ കോക്ക്പിറ്റിൽ വെച്ച് അൽ ഹമ്മാമി, മച്ചാറിനെ ആക്രമിച്ചതിനെത്തുടർന്ന് വിമാനം കുത്തനെ താഴേക്ക് പതിക്കുകയും പിന്നീട് യാത്രക്കാരും ജീവനക്കാരും ചേർന്ന് ഇയാളെ കീഴ്പ്പെടുത്തുകയും ചെയ്ത സംഭവത്തിൽ അധികൃതർ അന്വേഷണം നടത്തുന്നതിനിടയിലാണ് ഈ വിവരങ്ങൾ പുറത്തുവരുന്നത്.

2022 ഫെബ്രുവരിയിലെ നീക്കം ചെയ്ത ഒരു പോസ്റ്റിൽ, നിഖാബ് ധരിക്കുക, വിവാഹശേഷം ജോലി ഉപേക്ഷിക്കുക തുടങ്ങിയ തന്റെ നിബന്ധനകൾ അംഗീകരിക്കുന്ന ഒരു ഭാര്യയെ കണ്ടെത്താൻ അമ്മ നടത്തുന്ന ശ്രമങ്ങളെക്കുറിച്ച് ചർച്ച ചെയ്തിരുന്നതായി സിഎൻഎൻ റിപ്പോർട്ട് ചെയ്യുന്നു. തന്റെ മകൻ ഒരു പൈലറ്റാണെന്ന് അമ്മ പറയുന്നതുവരെ പല പെൺവീട്ടുകാരും ഈ നിബന്ധനകൾ നിരസിച്ചിരുന്നുവെന്നും, പൈലറ്റാണെന്ന് അറിഞ്ഞതോടെ അവർ നിലപാട് മാറ്റിയെന്നും പോസ്റ്റിൽ അവകാശപ്പെടുന്നു.

2022 ജനുവരിയിലെ മറ്റൊരു പോസ്റ്റിൽ, അൽ ഹമ്മാമി സ്ത്രീപുരുഷന്മാർ ഒരുമിച്ച് ജോലി ചെയ്യുന്ന തൊഴിലിടങ്ങളെ വിമർശിക്കുകയും അത് സ്ത്രീകളിൽ ഉണ്ടാക്കുന്ന പ്രത്യാഘാതങ്ങളെ ചോദ്യം ചെയ്യുകയും ചെയ്തു. ഇയാളുടെ നീക്കം ചെയ്ത ട്വിറ്റർ അക്കൗണ്ടിൽ കടുത്ത മതപരമായ കാഴ്ചപ്പാടുകളും സ്ത്രീവിരുദ്ധതയും പ്രകടമായിരുന്നുവെന്ന് സിഎൻഎൻ വിവരിക്കുന്നു. എങ്കിലും ഈ പോസ്റ്റുകൾ അദ്ദേഹത്തിന്റെ മുൻകാല സോഷ്യൽ മീഡിയ പ്രസ്താവനകളെ മാത്രമാണ് സൂചിപ്പിക്കുന്നത്, ഫ്ലൈ ദുബായ് സംഭവത്തിന് പിന്നിലെ കൃത്യമായ ലക്ഷ്യം ഇവ കൊണ്ടുമാത്രം വ്യക്തമാകുന്നില്ല.