തൊണ്ണൂറുകളില്‍ മലയാളത്തിലെ മിക്ക മുൻനിര നായികനടിമാർക്കും ശബ്ദം നല്‍കിയ ഡബ്ബിംഗ് ആർട്ടിസ്റ്റാണ് ഭാഗ്യലക്ഷ്മി. ശോഭന, ഉർവശി, രേവതി തുടങ്ങിയ പ്രമുഖരുടെയെല്ലാം ശബ്ദമായി അന്ന് നിറഞ്ഞു നിന്നിരുന്നത് ഭാഗ്യലക്ഷ്മിയാണ്. കാലങ്ങളായുള്ള സിനിമാ ജീവിതത്തിൽ 258 ലേറെ അഭിനേത്രികൾക്ക് ശബ്ദം നൽകിയ ഭാഗ്യലക്ഷ്മി, ഡബ്ബിംഗ് ആര്‍ട്ടിസ്റ്റ് എന്നതിലുപരി മികച്ച ഒരു അഭിനേത്രി കൂടിയാണ്. നിരവധി സിനിമകളില്‍ മികച്ച കഥാപാത്രങ്ങള്‍ താരം നല്‍കിയിട്ടുണ്ട്. സോഷ്യല്‍ മീഡിയയിലും സജീവ സാന്നിധ്യമാണ് താരം.
തന്റെ നിലപാടുകളും അഭിപ്രായങ്ങളും വിമര്‍ശനങ്ങളുമൊക്കെ മുഖം നോക്കാതെ താരം പലപ്പോഴും പങ്കുവയ്ക്കാറുണ്ട്. അതിന്റെ പേരില്‍ വലിയ സൈബര്‍ മീഡിയ അറ്റാക്കുകളും താരം നേരിടാറുണ്ട്. തന്റെ സിനിമാ ജീവിതത്തിലെ പല തുറന്നുപറച്ചിലുകൾ കൊണ്ടും അനുഭവങ്ങള്‍ പങ്കിടുകയും ചെയ്യുന്നതു വഴി പലപ്പോഴും താരം വിമര്‍ശിക്കപ്പെടാറുണ്ട്.
ഇപ്പോഴിതാ ലങ്ക എന്ന സിനിമയിൽ നിന്ന് തന്റെ ശബ്ദം മാറ്റിയപ്പോൾ ഒരു വാക്ക് പോലും പറഞ്ഞില്ലെന്നു പറയുകയാണ് ഭാഗ്യലക്ഷ്മി. തന്നെ അറിയിക്കാതെ ലങ്ക സിനിമയിൽ നിന്ന് മാറ്റിയ അനുഭവത്തെക്കുറിച്ച് പറയുന്ന താരം പിന്നീടൊരിക്കല്‍ നയൻതാരയുമായി സംസാരിച്ച് ഒരു സിനിമ ഉപേക്ഷിച്ചതിനെക്കുറിച്ചുമാണ് പറയുന്നത്.
‘‘സുരേഷ് ഗോപിയും മംമ്ത മോഹൻദാസും അഭിനയിച്ച ‘ലങ്ക’ സിനിമയില്‍ എന്നെ ഡബ് ചെയ്യാൻ വിളിച്ചിരുന്നു. അത് കണ്ടപ്പോൾ തന്നെ ഈ കഥാപാത്രത്തിന് ഞാൻ ഡബ്ബ് ചെയ്‌താൽ ശരിയാവില്ലലോ എന്ന് ഞാൻ പറഞ്ഞിരുന്നു. എന്നിട്ടും സംവിധായകന്‍ എ കെ സാജൻ ആ സിനിമയ്ക്ക് എന്നോട് അത് ഡബ്ബ് ചെയ്യാൻ പറഞ്ഞു . ഡബ്ബ് ചെയ്തപ്പോൾ തന്നെ അത് വളരെ ആർട്ടിഫിഷ്യൽ ആയി എനിക്ക് തോന്നിയിരുന്നു. പക്ഷേ ഇവർ ഒന്നും പറയുന്നില്ല. ഞാൻ ഒരു മണിക്കൂർ ഡബ്ബ് ചെയ്തു. അതിനു ശേഷം എന്നോട് പൊക്കോളാൻ പറഞ്ഞു, അടുത്ത ഒരു ദിവസം ഡബ്ബ് ചെയ്യാം എന്ന് പറഞ്ഞു. പക്ഷേ പിന്നീട് അത് ശ്രീജ ഡബ്ബ് ചെയ്തുവെന്ന് ഞാൻ അറിഞ്ഞു. ഇത് എന്നോട് തുറന്ന് പറഞ്ഞാൽ മതി. പക്ഷേ അത് പറഞ്ഞില്ല. പറയാതിരുന്നതാണ് പ്രശ്നം...
നയൻതാരയ്ക്ക് ഞാൻ ബോഡിഗാർഡ് ഡബ് ചെയ്തിട്ടുണ്ടായിരുന്നു. ഒരു സിനിമയ്ക്ക് നയൻതാര ഡബ് ചെയ്യണോ വേറെയാരെങ്കിലും ഡബ് ചെയ്യണോ എന്ന കണ്‍ഫ്യൂഷൻ വന്നു. ഭാഗ്യലക്ഷ്മിയുണ്ടെന്ന് നയൻതാര പറഞ്ഞു. ഞാൻ നയൻതാരയുമായി സംസാരിച്ചു. നയൻ, ഇദ്ദേഹത്തിന്റെ പടം ഡബ് ചെയ്യാൻ പോയിട്ട് ഇദ്ദേഹം എന്നെ മാറ്റിയിട്ടുണ്ട്, അതിനാല്‍ ഡബ് ചെയ്യില്ലെന്ന് ഞാൻ പറഞ്ഞു. എന്നാല്‍ ഞാൻ തന്നെ ഡബ് ചെയ്യാമെന്ന് നയൻതാര. അങ്ങനെ നയൻതാര തന്നെ പുതിയ നിയമം ഡബ് ചെയ്തു....’’ ഭാഗ്യലക്ഷ്മി പറഞ്ഞു. പോർട്രേയല്‍സ് ബെെ ഗദ്ദാഫി എന്ന യൂട്യൂബ് ചാനലിലാണ് ഭാഗ്യലക്ഷ്മി മനസ് തുറന്നത്. ഈയടുത്ത് ഉർവശി തലയണമന്ത്രത്തിലെ ഡബ്ബിംഗിനെക്കുറിച്ച്‌ സംസാരിക്കാത്തതിനെതിരെയും വിസ്മയ മോഹന്‍ലാല്‍ തന്റെ ഡബ്ബിംഗ് ആര്‍ട്ടിസ്റ്റിനെക്കുറിച്ച് പറഞ്ഞതിനെ പ്രശംസിച്ചും ഭാഗ്യലക്ഷ്മി രംഗത്തെത്തിയിരുന്നു.
നേരിട്ട് തുറന്നു പറഞ്ഞ മികച്ച സംവിധാകരുണ്ടെന്നും ഭാഗ്യലക്ഷ്മി പറയുന്നുണ്ട്. ‘‘അടൂർ സാറിന്റെ മതിലുകള്‍ ഡബ് ചെയ്യാൻ എന്നെ വിളിച്ചിരുന്നു. നേരിട്ട് എന്നെ വിളിച്ച്‌ പറഞ്ഞതാണ്. ഞാനവിടെ പോയി. ഡബ് ചെയ്ത് തുടങ്ങിയപ്പോള്‍ അടൂർ സർ പറഞ്ഞത് ഒരുപാട് നായികമാരാണ് അപ്പുറത്ത് നില്‍ക്കുന്നതെന്ന് തോന്നുന്നു, ശോഭനയോ ഉർവശിയോ രേവതിയോ ആണ് അപ്പുറത്ത് നില്‍ക്കുന്നതെന്ന് തോന്നുന്നു. അങ്ങ് ശരിയാകുന്നില്ലല്ലോ ഭാഗ്യലക്ഷ്മി എന്ന് അടൂർ സർ പറഞ്ഞു. ഒന്ന് ഭയങ്കര ചെറുപ്പമായ ശബ്ദം. ചെറുപ്പക്കാരിയല്ല മതിലിന് അപ്പുറത്ത് നില്‍ക്കുന്നത്. മാത്രമല്ല അന്നത്തെ പ്രധാന നായികമാരുടെ ശബ്ദവും. ഞാൻ വീട്ടില്‍ പോയി. അടൂർ സർ പറഞ്ഞതില്‍ കുറച്ച്‌ കൂടെ മാന്യത ഉണ്ടായിരുന്നു...’’ ഭാഗ്യലക്ഷ്മി പറഞ്ഞു.
Comments