രാമപുരം: പാര്‍ശ്വവല്‍ക്കരിക്കപ്പെട്ട ജനവിഭാഗങ്ങളുടെ ഉന്നമനത്തിനായി ജീവിതം ഉഴിഞ്ഞുവെച്ച വാഴ്‌ത്തപ്പെട്ട തേവര്‍പറമ്പില്‍ കുഞ്ഞച്ചന്റെ തിരുനാളിന്‌ രാമപുരം സെന്റ്‌ അഗസ്‌റ്റിന്‍സ്‌ ഫൊറോനാ പള്ളിയില്‍ വിപുലമായ ഒരുക്കങ്ങള്‍ പൂര്‍ത്തിയായി. വരുന്ന 7 മുതല്‍ 16 വരെയാണ്‌ തിരുനാള്‍ ചടങ്ങുകള്‍ നടക്കുന്നത്‌. 1891 ഏപ്രില്‍ ഒന്നിന്‌ രാമപുരത്തെ പുരാതനമായ തേവര്‍പറമ്പില്‍ കുടുംബത്തിലാണ്‌ അഗസ്‌റ്റിനച്ചന്‍ എന്ന കുഞ്ഞച്ചന്‍ ജനിച്ചത്‌.
മീനച്ചില്‍ താലൂക്കിന്റെ വിവിധ പ്രദേശങ്ങളില്‍ അവഗണിക്കപ്പെട്ടവരുടെയും പാര്‍ശ്വവല്‍ക്കരിക്കപ്പെട്ടവരുടെയും കണ്ണീരൊപ്പാന്‍ അദ്ദേഹം തന്റെ ജീവിതം പൂര്‍ണമായും സമര്‍പ്പിച്ചു. ഒരു വൈദികന്‍ എന്ന നിലയില്‍ ആത്മീയ ശുശ്രൂഷകള്‍ക്കൊപ്പം സമൂഹത്തില്‍ പിന്തള്ളപ്പെട്ടവര്‍ക്ക്‌ അര്‍ഹമായ ഇടം നേടിക്കൊടുക്കാന്‍ കഠിനാധ്വാനം ചെയ്‌തു.
ജീവിതകാലം മുഴുവന്‍ സ്‌നേഹത്തിന്റെയും സേവനത്തിന്റെയും പ്രകാശമായ കുഞ്ഞച്ചന്റെ ഓര്‍മ്മകള്‍ക്ക്‌ മുന്നില്‍ പ്രാര്‍ത്ഥനാപൂര്‍വ്‌വം തിരുനാള്‍ പരിപാടികളില്‍ പങ്കെടുക്കാന്‍ എത്തുന്ന ആയിരക്കണക്കിന്‌ വിശ്വാസികളെ വരവേല്‍ക്കാനൊരുങ്ങിയിരിക്കുകയാണ്‌ രാമപുരം പള്ളി. അടിച്ചമര്‍ത്തപ്പെട്ടവരുടെ ആശ്രയകേന്ദ്രമായിരുന്ന അച്ചന്റെ വിശുദ്ധി തിരിച്ചറിഞ്ഞ സഭ, 2006 ഏപ്രില്‍ 30നാണ്‌ അദ്ദേഹത്തെ വാഴ്‌ത്തപ്പെട്ടവരുടെ നാമത്തിലേക്ക്‌ ഉയര്‍ത്തിയത്‌.
അന്ന്‌ മുതല്‍ ലോകമെമ്പാടുമുള്ള വിശ്വാസികള്‍ക്ക്‌ വലിയൊരു ആശ്വാസകേന്ദ്രവും മധ്യസ്‌ഥനുമാണ്‌ വാഴ്‌ത്തപ്പെട്ട കുഞ്ഞച്ചന്‍. തിരുനാള്‍ ദിവസങ്ങളില്‍ നടക്കുന്ന പ്രത്യേക കുര്‍ബാനകളിലും നൊവേനകളിലും വിശ്വാസികള്‍ക്ക്‌ പങ്കാളികളാകാം. തന്റെ ജീവിതംകൊണ്ട്‌ സ്‌നേഹത്തിന്റെ അര്‍ത്ഥം പഠിപ്പിച്ച കുഞ്ഞച്ചന്റെ തിരുനാള്‍ ദിനങ്ങള്‍ വിശ്വാസതീക്ഷ്‌ണതയോടെ ആചരിക്കാനുള്ള ഒരുക്കത്തിലാണ്‌ രാമപുരം.
വിശ്വന്‍ രാമപുരം
Comments