കരിയറിൽ ആദ്യമായി പാർവതി തിരുവോത്ത് പൊലീസ് വേഷത്തിലെത്തിയ ചിത്രമെന്ന നിലയില്‍ റിലീസിനു മുമ്പു തന്നെ ശ്രദ്ധിക്കപ്പെട്ട ചിത്രമായിരുന്നു ഷഹദ് സംവിധാനം ചെയ്ത ‘പ്രഥമ ദൃഷ്ട്യാ കുറ്റക്കാർ’. മികച്ച പ്രേക്ഷക പ്രതികരണം നേടി അൻപത് കോടി ക്ലബ്ബിൽ ഇടംപിടിച്ച ഈ ചിത്രം തിയേറ്ററുകളിൽ വിജയകരമായി പ്രദർശനം തുടരുകയാണ്. ആദ്യ ദിനം മുതൽ സിനിമയ്ക്ക് മികച്ച പ്രേക്ഷക പ്രതികരണമാണ് ലഭിച്ചത്.
ഇപ്പോഴിതാ ‘പ്രഥമ ദൃഷ്ട്യാ കുറ്റക്കാർ’ തിയേറ്ററിൽ മികച്ചൊരു അനുഭവം സമ്മാനിച്ചുവെന്ന് കുറിക്കുകയാണ് സംവിധായിക അഞ്ജലി മേനോൻ. അഭിനേതാക്കളുടെ പ്രകടനത്തെയും തിരക്കഥയെയും വാനോളം പുകഴ്ത്തിയ അഞ്ജലി, ചിത്രത്തിലെ സ്ത്രീ കഥാപാത്രങ്ങളുടെ സ്വാഭാവികമായ പ്രകടനവും പാർവതിയുടെ തകർപ്പൻ പെർഫോമൻസും എടുത്തുപറഞ്ഞ് സിനിമയുടെ മുഴുവൻ ടീമിനും അഭിനന്ദനങ്ങള്‍ അറിയിച്ചാണ് കുറിപ്പ് പങ്കിട്ടിരിക്കുന്നത്.
‘‘ഷഹദ് കെ. മുഹമ്മദിന്റെ മികച്ച സംവിധാനത്തിലും, പി.എസ്. സുബ്രഹ്മണ്യം - വിജേഷ് എന്നിവർ ഒരുക്കിയ മുറുക്കമുള്ളതും എന്നാൽ ആഴമുള്ളതുമായ തിരക്കഥയിലും ഒരുങ്ങിയ അർജുൻ സെൽവ നിര്‍മ്മിച്ച ‘പ്രഥമ ദൃഷ്ട്യാ കുറ്റക്കാര്‍’ എന്ന മലയാള ചിത്രം മികച്ചൊരു തിയേറ്റർ അനുഭവമായിരുന്നു. വിജയരാഘവൻ, സിദ്ധാർത്ഥ് ഭരതൻ, ഉണ്ണിമായ പ്രസാദ്, മാത്യു തോമസ്, വിനയ് ഫോർട്ട് എന്നിവരടങ്ങുന്ന മികച്ച അഭിനേതാക്കളുടെയും അണിയറപ്രവർത്തകരുടെയും പ്രകടനം ഈ ചിത്രത്തെ ശ്രദ്ധേയമാക്കി.
ഒരു മികച്ച സിനിമ ബോക്സ് ഓഫീസിൽ വലിയ വിജയം നേടുന്നത് കാണുമ്പോൾ, പ്രേക്ഷകരിലും സിനിമ എന്ന കലയിലുമുള്ള വിശ്വാസം കൂടുതൽ ദൃഢമാകുന്നു. ഓരോ കഥാപാത്രത്തോടും നമുക്ക് അടുപ്പം തോന്നുന്ന തരത്തിലുള്ള, മികച്ച രീതിയിലുള്ള കഥാപാത്ര വികാസവും സൂക്ഷ്മമായ ഭാവങ്ങളും ഏറെ ഇഷ്ടപ്പെട്ടു. അലീനയും ഹാരിസ് മീരാനും തമ്മിലുള്ള, ഏകലവ്യ-ഗുരു ബന്ധത്തെ അനുസ്മരിപ്പിക്കുന്ന മനോഹരമായ ആത്മബന്ധമായിരുന്നു എനിക്ക് ഏറ്റവും ഇഷ്ടപ്പെട്ടത്. വൈവിധ്യമാർന്ന നിരവധി സ്ത്രീ കഥാപാത്രങ്ങളെ കാണാനായത് വലിയ സന്തോഷം നൽകി; വെറും നാമമാത്രമായ സാന്നിധ്യമായോ ഉപദേശങ്ങൾ നൽകുന്നവരായോ അല്ല അവരെ അവതരിപ്പിച്ചത്, മറിച്ച് യഥാർത്ഥ ജീവിതത്തിലെന്നപോലെ സ്വാഭാവികമായി ആ ലോകത്ത് ജീവിക്കുന്നവരായാണ്.
പിന്നെ അലീന - അതീവ ലോലമായ ഭാവങ്ങളും, എന്നാൽ കരുത്തുറ്റ സ്ത്രീകൾക്ക് മാത്രം സ്വന്തമായ അചഞ്ചലമായ ദൃഢതയും ഒത്തിണങ്ങിയ ഒരു അതിജീവിത. പാർവതി തനിക്ക് ഏറ്റവും നന്നായി വഴങ്ങുന്ന ആ വേഷം അവിസ്മരണീയമാക്കിയിരിക്കുന്നു,ഗംഭീര പ്രകടനം...അണിയറപ്രവർത്തകർക്ക് വലിയ അഭിനന്ദനങ്ങൾ...’’ എന്നാണ് അഞ്ജലി മേനോന്‍ കുറിച്ചിരിക്കുന്നത്. അഞ്ജലിയുടെ ഈ പോസ്റ്റിനു മറുപടിയായി, ‘നന്ദി, അഞ്ജലി മേനോൻ....’ എന്ന് പാര്‍വതിയുടെ കമന്റ് നല്‍കിയിട്ടുണ്ട്.
സാങ്കേതികമായ കാഴ്ചകളേക്കാള്‍ തിരക്കഥയെ മാത്രം ആശ്രയിച്ച് മുന്നോട്ടു പോകുന്ന ഈ ത്രില്ലർ-പ്രൊസീജ്യറൽ ഡ്രാമ ഗണത്തിലുള്ള ചിത്രം അക്ഷരാർഥത്തിൽ ശ്വാസമടക്കിപ്പിടിച്ച് കാണേണ്ട സിനിമയാണ്. ഒരു നിമിഷം പോലും പ്രേക്ഷകന്റെ ശ്രദ്ധ ചിത്രത്തിൽ നിന്ന് വിട്ടുപോകാൻ അനുവദിക്കാത്ത തിരക്കഥയും അഭിനേതാക്കളുടെ മികച്ച പ്രകടനവും നല്ലൊരു തിയേറ്റര്‍ അനുഭവം സമ്മാനിക്കുന്നുവെന്ന് സിനിമ കണ്ടിറങ്ങുന്ന ഓരോ പ്രേക്ഷകനും അഭിപ്രായപ്പെട്ടിരുന്നു.
Comments