ആഗോളതലത്തിൽ ഏറെ ശ്രദ്ധ നേടിയ റിയാലിറ്റി ഷോയായ ബിഗ് ബോസ് മലയാളത്തിലേക്ക് എത്തിയപ്പോള്‍ കുടുംബപ്രേക്ഷകര്‍ ഇരുകൈയും നീട്ടിയാണതിനെ സ്വീകരിച്ചത്. മോഹന്‍ലാലിന്റെ അവതരണമാണ് ബിഗ് ബോസിന്റെ ഏറ്റവും വലിയ ഹൈലൈറ്റ്. ഏഴു സീസണുകള്‍ക്ക് ശേഷമെത്തിയാ എട്ടാം സീസണെയും വലിയ ആവേശത്തോടെയാണ് പ്രേക്ഷകര്‍ കാത്തിരുന്നത്. വലിയ ട്വിസ്റ്റുകളും ഞെട്ടിപ്പിക്കുന്ന സസ്പെൻസുകളുമായി മുന്നേറുന്ന ഈ സീസണ്‍ തുടക്കം മുതല്‍ തന്നെ ശ്രദ്ധിക്കപ്പെട്ടിരുന്നു.
സാധാരണക്കാരായ മത്സരാർത്ഥികളെ പ്രധാന ബിഗ് ബോസ് ഹൗസിലേക്ക് തിരഞ്ഞെടുക്കുന്നതിനായി നടത്തിയ വെല്ലുവിളികൾ നിറഞ്ഞ അഗ്നിപരീക്ഷയും പിന്നീടെത്തിയ രസകരവും കൗതുകകരവും സംഭവ ബഹുലവുമായി നിരവധി കാര്യങ്ങളും ഹൗസിലെ മത്സരാര്‍ത്ഥികളുടെയും പ്രേക്ഷകരുടെയും ആവേശം കൂട്ടി. ഇക്കഴിഞ്ഞ ദിവസമാണ് അഗ്നിപരീക്ഷയിലൂടെ ഹൗസിനുള്ളിലെത്തിയ രാകേഷ് ജേക്കബിന്റെ എവിക്ഷന്‍ നടന്നത്. ഹൗസിനുള്ളിലെ എന്റർടെയ്ൻമെന്റ് ഘടകങ്ങളില്‍ പ്രധാനിയായിരുന്ന രാകേഷിന്റെ എവിക്ഷന്‍ ഒരുപാട് ആരാധകരെ വിഷമിപ്പിച്ചിട്ടുണ്ട്.
ഇപ്പോഴിതാ ബിഗ് ബോസ് ഹൗസില്‍ നിന്ന് എവിക്ഷനായ ശേഷം വീട്ടിലേക്ക് മടങ്ങിയെത്തിയ രാകേഷിന്റെ വീഡിയോയാണ് സോഷ്യല്‍ മീഡിയയിലൂടെ ശ്രദ്ധ നേടുന്നത്. മത്സരാർഥിയായി ബിഗ് ബോസ് വീട്ടില്‍ നിന്ന് പുറത്തേക്ക് വന്ന മകനെ സ്നേഹത്തോടെ സ്വീകരിക്കുന്ന രാകേഷിന്റെ അമ്മയാണ് ഈ വീഡിയോയിലെ പ്രധാന ആകര്‍ഷണം. വീട്ടിലേക്കെത്തിയ മകനെ സ്വീകരിക്കുന്നതിനൊപ്പം ട്രോളാനും അമ്മ മറക്കുന്നില്ല.
വീടിന്റെ മുറ്റത്തെത്തിയ രാകേഷ് ഉറക്കെ ‘ബിഗ് ബോസ്’ എന്ന് വിളിച്ചുകൊണ്ട് അകത്തേക്ക് കയറുന്നത് ദൃശ്യങ്ങളില്‍ കാണാം. പിന്നാലെ രാകേഷിനെ കാത്തുനിന്ന അമ്മയുടെ വക ആദ്യ ട്രോള്‍ എത്തി. ‘യോദ്ധ’ യിലെ പ്രശസ്ത ഡയലോഗ് കടമെടുത്ത് ‘തോറ്റ് തുന്നം പാടി എത്തിയിരിക്കുകയാണ് മോൻ’ എന്ന് പറഞ്ഞായിരുന്നു അമ്മയുടെ വരവേല്‍പ്പ്.
തുടർന്ന് അമ്മയുടെ കഴുത്തില്‍ ഹാരം അണിയിച്ച്, ബൊക്കെയും നല്‍കിയ രാകേഷ്, ‘ബിഗ് ബോസില്‍ നിന്ന് വന്നിട്ട് ഒന്നും കൊണ്ടുവന്നില്ലെന്ന് പറയണ്ട’ എന്നും തമാശയായി പറഞ്ഞു. മകന്റെ ഈ തമാശയ്ക്കും അമ്മയുടെ ട്രോള്‍ മറുപടി എത്തി.
ബിഗ് ബോസില്‍ പോയി ‘തോറ്റ് തുന്നം പാടി' തിരിച്ചെത്തിയതില്‍ അമ്മയ്ക്ക് എന്താണ് പറയാനുള്ളതെ’ന്ന് രാകേഷ് ചോദിച്ചു. ‘ഒരുപാട് അഭിമാനം ഉണ്ട്. അതില്‍ കയറാൻ പറ്റുക എന്നത് തന്നെ ഭാഗ്യമാണ്’ എന്നായിരുന്നു അമ്മയുടെ മറുപടി. ഇതിന് പിന്നാലെ ‘വീട്ടില്‍ തന്നെ ട്രോള്‍ ആണ്’ എന്നായിരുന്നു രാകേഷിന്റെ പ്രതികരണം.
ബിഗ് ബോസ് വീട്ടില്‍ നിന്ന് കപ്പുമായി മോൻ തിരിച്ചുവരുമെന്നായിരുന്നു തന്റെ വലിയ ആഗ്രഹം എന്നും അമ്മ പറഞ്ഞു. എന്നാല്‍ കപ്പ് നേടാൻ കഴിയാതിരുന്ന മകന് പകരം മറ്റൊരു ‘കപ്പ്’ അമ്മ ഒരുക്കിവച്ചിരുന്നു. രണ്ട് പപ്പായ എടുത്തുകൊടുത്തുകൊണ്ട് കപ്പിന് പകരം മോന് കപ്പങ്ങ നല്‍കുകയാണെന്ന് അമ്മ പറഞ്ഞു, ‘ഇതെങ്കിലും കിട്ടിയല്ലോ, അതുകൊണ്ട് പിടിച്ചോളൂ, അഭിമാനിക്കാം’ എന്ന രീതിയിലായിരുന്നു അമ്മയുടെ പരിഹാസം. കപ്പങ്ങ മുറുക്കെ പിടിച്ചോളാനും അമ്മ നിർദേശിച്ചു.
‘നാട്ടുകാർ ട്രോള്‍ ചെയ്യുന്നു, ഇപ്പോള്‍ സ്വന്തം വീട്ടില്‍നിന്നും ട്രോള്‍ ആണല്ലോ...’ എന്നായിരുന്നു ഇതിന് രാകേഷിന്റെ കൗണ്ടർ. ഒടുവില്‍ അമ്മ നല്‍കിയ കപ്പങ്ങ തന്നെ തനിക്ക് കപ്പിന് തുല്യമാണെന്നും രാകേഷ് തമാശയായി പറഞ്ഞു.
നിമിഷനേരം കൊണ്ടാണ് ഈ അമ്മയും മകനും തമ്മിലുള്ള ട്രോള്‍ സംഭാഷണം വൈറലായത്. ബിഗ് ബോസ് ഹൗസിനുള്ളിലെ പ്രകടനം മാത്രമല്ല രാകേഷിന് സ്വന്തം വീട്ടിലും ട്രോളിന് കുറവില്ലെന്നാണ് പലരും വീഡിയോയ്ക്ക് താഴെ തമാശയായി കുറിക്കുന്നത്. സ്നേഹവും ട്രോളുകളും ഒരുപോലെ നിറഞ്ഞ അമ്മയുടെയും മകന്റെയും സംഭാഷണം ഏറ്റെടുക്കുകയാണ് ആരാധകര്‍. നന്നായി പെര്‍ഫോം ചെയ്തിട്ടും രാകേഷ് പുറത്ത്പോകേണ്ടി വന്നതിലെ അമർഷവും നിരവധി ആരാധകർ കമന്റുകളായി വീഡിയോക്ക് താഴെ കുറിക്കുന്നുണ്ട്.
Comments