അരനൂറ്റാണ്ടോളം നീണ്ട അഭിനയ ജീവിതത്തിൽ കരുത്തുറ്റ ഒട്ടനവധി കഥാപാത്രങ്ങള്‍ നൽകിയ അതുല്യ നടൻ നാനാ പടേക്കർ വിടവാങ്ങിയത് ആരാധകർക്ക് മാത്രമല്ല സഹതാരങ്ങൾക്കും വലിയൊരു ഞെട്ടലായിരുന്നു. ആ അതുല്യപ്രതിഭയുടെ വേര്‍പാടിന്റെ ദുഃഖത്തിലാണ് ബോളിവുഡ്-മറാത്തി ചലച്ചിത്ര ലോകം. നിരവധി സഹതാരങ്ങൾ അപ്രതീക്ഷിത വേര്‍പാടില്‍ അനുശോചനവും നൊമ്പരവും പങ്കിടുന്നുണ്ട്.
ഇപ്പോഴിതാ തന്റെ ആത്മസുഹൃത്തിന്റെ വേർപാടിൽ നൊമ്പരം പങ്കിടുകയാണ് ബോളിവുഡ് താരം അനിൽ കപൂർ. വർഷങ്ങളായി തങ്ങൾക്കിടയിലുണ്ടായിരുന്ന ആഴമേറിയ ബന്ധം വെളിപ്പെടുത്തുന്ന ഹൃദയസ്പർശിയായ ഒരു ആദരാഞ്ജലി പങ്കിട്ട അനിൽ കപൂർ, ‘നാന’യെ ‘നാനിയ’ എന്ന് സ്നേഹത്തോടെ വിളിച്ച്, അദ്ദേഹത്തെ ലോകത്തിലെ ഏറ്റവും വലിയ കലാകാരൻ എന്നാണ് വിശേഷിപ്പിച്ചത്. തന്റെ പ്രിയ സുഹൃത്തില്ലാത്ത ജീവിതത്തെക്കുറിച്ചും സിനിമയെക്കുറിച്ചും ചിന്തിക്കുന്നത് പോലും എത്ര പ്രയാസകരമാണെന്ന് അനിൽ കുറിച്ചു.
‘‘എന്റെ സുഹൃത്ത് എന്നെ വിട്ടുപോയി... ആദ്യം സതീഷ്, ഇപ്പോൾ എന്റെ നാനിയയും. നാനിയാ, നീ ഇത്ര പെട്ടെന്ന്, ഇത്ര നേരത്തെ വിട്ടുപോയല്ലോ... ലോകത്തിലെ ഏറ്റവും മികച്ച കലാകാരൻ നമ്മളെ എന്നെന്നേക്കുമായി വിട്ടുപോയിരിക്കുന്നു. ജീവിതത്തിലും സെറ്റിലും ഫോണിലും ബിഗ് സ്‌ക്രീനിലും... എല്ലായിടത്തും ഞാൻ നിന്നെ വല്ലാതെ മിസ് ചെയ്യും...’’ എന്നാണ് അനിൽ കപൂർ കുറിച്ചിരിക്കുന്നത്. ഈ പോസ്റ്റിനു താഴെ അനിൽ കപൂറിന്റെ മകളും അഭിനേത്രിയുമായ സോനം കപൂറും തന്റെ ദുഃഖം പങ്കിടുന്നുണ്ട്. ‘എനിക്ക് അതിയായ വിഷമമുണ്ട്, അച്ഛാ. അച്ഛന് അദ്ദേഹത്തെ അത്രയേറെ ഇഷ്ടമായിരുന്നു...’ എന്നാണ് സോനം കപൂർ കുറിച്ചത്.
Comments