ഓക്‌ലന്റ്: ഇന്ത്യക്കെതിരായ വരാനിരിക്കുന്ന പരിമിത ഓവര്‍ പരമ്പരയ്ക്ക് മുന്നോടിയായി കിവീസ് ക്യാമ്പില്‍ ആശങ്ക പടര്‍ത്തി പ്രമുഖ താരങ്ങളുടെ പരിക്ക്. പരിക്കിനെ തുടര്‍ന്ന് വെടിക്കെട്ട് ബാറ്റര്‍ മാര്‍ക്ക് ചാപ്മാനും പേസര്‍ സാക് ഫൗള്‍ക്‌സിനും ഇന്ത്യയുമായുള്ള ടി20 പരമ്പര പൂര്‍ണ്ണമായും നഷ്ടമായി. ന്യൂസിലന്‍ഡ് ക്രിക്കറ്റ് ബോര്‍ഡ് തന്നെയാണ് ഇക്കാര്യം ഔദ്യോഗികമായി സ്ഥിരീകരിച്ചത്.
യൂറോപ്യന്‍ ടി20 പ്രീമിയര്‍ ലീഗില്‍ കളിക്കുന്നതിനിടെയാണ് മാര്‍ക്ക് ചാപ്മാന്റെ ഇടത് ഹാംസ്ട്രിംഗിന് പരിക്കേറ്റത്. ടി20 മത്സരങ്ങള്‍ നഷ്ടപ്പെടുമെങ്കിലും, പരമ്പരയ്ക്ക് ശേഷമുള്ള ഏകദിന മത്സരങ്ങളിലൂടെ താരം തിരിച്ചെത്തുമെന്നാണ് മെഡിക്കല്‍ ടീമിന്റെ വിലയിരുത്തല്‍. എന്നാല്‍ കാന്റര്‍ബറിക്കൊപ്പം പരിശീലനം നടത്തുന്നതിനിടയില്‍ വലത് ഹിപ് ഫ്ലെക്സര്‍ പരിക്കിന് ഇരയായ പേസര്‍ സാക് ഫൗള്‍ക്‌സിന്റെ മടങ്ങിവരവ് എപ്പോഴാകുമെന്ന് വ്യക്തമല്ല.
പരിക്കേറ്റ താരങ്ങള്‍ക്ക് പകരം ഓള്‍റൗണ്ടര്‍ ജോഷ് ക്ലാര്‍ക്സനെയും ഫാസ്റ്റ് ബോളര്‍ ബ്ലെയര്‍ ടിക്നറെയും ന്യൂസിലന്‍ഡ് ടീമില്‍ ഉള്‍പ്പെടുത്തിയിട്ടുണ്ട്. ഈ വര്‍ഷം ആദ്യം നടന്ന ടി20 ലോകകപ്പ് ഫൈനലിന് ശേഷം ഇരു ടീമുകളും വീണ്ടും നേര്‍ക്കുനേര്‍ വരികയാണ്. ഒക്ടോബര്‍ 22-നാണ് പരമ്പരയ്ക്ക് കൊടിയേറുന്നത്. ക്രൈസ്റ്റ് ചര്‍ച്ച്, വെല്ലിംഗ്ടണ്‍, ഓക്ലന്‍ഡ്, ഹാമില്‍ട്ടണ്‍ എന്നിവിടങ്ങളിലായി അഞ്ച് ടി20 മത്സരങ്ങളും, തുടര്‍ന്ന് അഞ്ച് ഏകദിനങ്ങളും രണ്ട് ടെസ്റ്റ് മത്സരങ്ങളുമാണ് പരമ്പരയിലുള്ളത്.
Comments