ലോഹിതദാസ് സംവിധാനം ചെയ്ത സൂത്രധാരൻ എന്ന സിനിമയിലൂടെ വെള്ളിത്തിരയിലെത്തിയ താരമാണ് മീര ജാസ്മിന്‍. വളരെ പെട്ടെന്ന് താരപദവിയിലേക്കെത്തിയ മീര, ചുരുങ്ങിയ കാലം കൊണ്ടു തന്നെ പ്രേക്ഷകരുടെ ഹൃദയം കീഴടക്കി. ഒരു കാലത്ത് മലയാളം സിനിമയിൽ മീര ജാസ്മിൻ സൃഷ്ടിച്ച തരംഗം ചെറുതായിരുന്നില്ല. മികച്ച നടിയ്ക്കുള്ള ദേശീയ പുരസ്കാരവും കേരള സംസ്ഥാന ചലച്ചിത്ര പുരസ്കാരവും സ്വന്തമാക്കിയ മീര, വിവാഹത്തോടെ അഭിനയത്തിൽനിന്നും ഇടവേളയെടുത്തിരുന്നു.
ഏറെ നാളുകൾക്കുശേഷം സത്യൻ അന്തിക്കാടിന്റെ ‘മകൾ’ എന്ന സിനിമയിലൂടെ ബിഗ്സ്ക്രീനിലേക്ക് മടങ്ങി എത്തിയപ്പോഴും മീരയെ മലയാളികൾ ഇരുകൈയും നീട്ടി സ്നേഹത്തോടെ സ്വീകരിച്ചു. അന്നും മിന്നും മലയാളികൾക്ക് മീര ജാസ്മിനോട് വല്ലാത്തൊരു ഇഷ്ടമാണ്. മടങ്ങിവരവില്‍ സോഷ്യല്‍ മീഡിയയിലും സജീവമാണ് മീര. വ്യത്യസ്ത ഗെറ്റപ്പിലുള്ള നിരവധി ചിത്രങ്ങള്‍ മീര സോഷ്യല്‍ മീഡിയയിലൂടെ പങ്കിടാറുണ്ട്.
ഇപ്പോഴിതാ നവരാത്രി സ്പെഷ്യല്‍ ഫോട്ടോഷൂട്ട് ചിത്രങ്ങള്‍ പങ്കിടുകയാണ് മീര. പട്ടുസാരിയുടുത്ത് കൈയില്‍ കുപ്പിവളകളുമണിഞ്ഞ് നാടന്‍ സുന്ദരിയായിട്ടാണ് മീര ചിത്രങ്ങളില്‍ തിളങ്ങുന്നത്. ‘‘ഹാപ്പി നവരാത്രി...’’ എന്ന ക്യാപ്ഷന്‍ നല്‍കിയാണ് മീര ചിത്രങ്ങള്‍ പങ്കിട്ടിരിക്കുന്നത്.
മോഹന്‍ലാലിന്റെ ‘ഹൃദയപൂര്‍വ്വം’ സിനിമയില്‍ അതിഥി താരമായി മീര എത്തിയിരുന്നു. മോഹൻലാൽ-തരുൺ മൂർത്തി ചിത്രമായ ‘അതിമനോഹര’മാണ് മീരയുടേതായി റിലീസ് കാത്തിരിക്കുന്ന ചിത്രം. ലൗലജൻ എന്ന കഥാപാത്രത്തിന്റെ ഭാര്യ നൈസിയുടെ വേഷത്തിലാണ് മീര ഈ സിനിമയിൽ എത്തുന്നത്. ‘ലേഡീസ് ആൻഡ് ജെന്റിൽമാൻ’ എന്ന സിനിമയിലാണ് മോഹൻലാലിനൊപ്പം മുഴുനീള വേഷത്തിൽ മീര ജാസ്മിൻ ഏറ്റവും ഒടുവിൽ അഭിനയച്ചത്. 13 വർഷങ്ങൾക്കു ശേഷമാണ് പ്രേക്ഷകരുടെ പ്രിയതാരങ്ങൾ വീണ്ടും ഒന്നിച്ചെത്തുന്നത്. ഇവര്‍ ഒന്നിച്ചെത്തിയ ചിത്രങ്ങളെല്ലാം പ്രേക്ഷകരുടെ ഹൃദയം കീഴടക്കിയിട്ടുണ്ട്.
Comments