ആക്ഷേപഹാസ്യത്തിലൂടെ പ്രേക്ഷകരുടെ ഹൃദയം കീഴടക്കിയ ജനപ്രിയ പരമ്പരയാണ് മറിമായം. സാമൂഹിക പ്രസക്തിയുള്ള വിഷങ്ങളെ നർമത്തിലൂടെ അവതരിപ്പിച്ചാണ് ‘മറിമായം’ കൈയടി നേടാറുള്ളത്. മുന്നും പിന്നും ഒന്നും നോക്കാതെ സർക്കാർ സ്ഥാപനങ്ങളിൽ കാണുന്ന സാധാരണ സാഹചര്യങ്ങളും, സാധാരണക്കാർ അഭിമുഖീകരിക്കുന്ന സാമൂഹിക പരീക്ഷണങ്ങളും രാഷ്ട്രീയസംഭവവികാസങ്ങളും വിവരിക്കുന്ന ആക്ഷേപഹാസ്യ സ്കെച്ചുകളാണ് ഈ പരമ്പരയില്‍ കാണിക്കാറുള്ളത്. മണികണ്ഠൻ പട്ടാമ്പി, വിനോദ് കോവൂർ, സ്നേഹ ശ്രീകുമാർ, നിയാസ് ബക്കർ, റിയാസ് നർമ്മകല, മണി ഷൊർണൂർ, സലീം ഹസൻ എന്നിവരാണ് ഈ പരമ്പരയിലെ പ്രധാന കഥാപാത്രങ്ങളായി പ്രേക്ഷകര്‍ക്ക് മുന്നിലെത്തുന്നത്.
ഇപ്പോഴിതാ മറിമായം ആയിരം എപ്പിസോഡുകള്‍ പൂര്‍ത്തിയാക്കിയ സന്തോഷം പങ്കിടുകയാണ് വിനോദ് കോവൂര്‍. മറിമായം പതിനാറാം വർഷത്തിലേക്ക് കടക്കുമ്പോള്‍ പരമ്പരയുടെ ഭാഗ്യ ലൊക്കേഷനായ അമ്മച്ചിവീടിന്റെ ചിത്രം പങ്കുവച്ച് വീട്ടുടമയ്ക്ക് ആശംസകൾ നേർന്നാണ് വിനോദിന്റെ ഫെയ്സ്ബുക്ക് കുറിപ്പ്.
‘‘അടുത്ത മാസം മറിമായം ആയിരം എപ്പിസോഡുകൾ പൂർത്തിയാക്കുകയാണ്...പതിനാറാം വർഷത്തിലേക്ക് പ്രവേശിക്കുന്നു...ഒരുപാട് എപ്പിസോഡുകൾ ചിത്രീകരിച്ച ഞങ്ങളുടെ ഭാഗ്യ ലൊക്കേഷനായ അമ്മച്ചി വീടാണ് ഇത്. മറിമായത്തിന്റെ ഭാഗ്യ വീട്....ഈ വീടിന്റെ ഉടമയായ അമ്മച്ചിക്ക് ഈ അവസരത്തിൽ ആയുരാരോഗ്യ സൗഖ്യം നേരുന്നു...’’ എന്ന് കുറിച്ചാണ് വിനോദ് കോവൂര്‍ ഈ സന്തോഷം പങ്കിട്ടിരിക്കുന്നത്. സഹതാരങ്ങളടക്കം നിരവധി പേര്‍ കുറിപ്പിനു താഴെ രസകരമായ കമന്റുകള്‍ കുറിക്കുന്നുണ്ട്.
Comments