ഇന്ത്യൻ ജനാധിപത്യത്തിന്റെ മായാത്ത കരുത്ത്: എസ്.ഐ.ആർ ശുദ്ധീകരണം ആർക്കുവേണ്ടി?

തിരുവനന്തപുരം: ആധുനിക ലോകത്തിലെ അസാധാരണമായ ഭരണനേട്ടങ്ങളിൽ ഒന്നാണ് ഭാരതത്തിലെ ജനാധിപത്യം. 140 കോടിയിലേറെ ജനങ്ങളും സാംസ്കാരികവും സാമ്പത്തികവുമായ വൈവിധ്യവുമുള്ള ഒരു രാജ്യത്ത്, അഞ്ചു വർഷത്തിലൊരിക്കൽ മത്സരാധിഷ്ഠിത തെരഞ്ഞെടുപ്പ് കൃത്യമായി നടക്കുന്നു എന്നത് ഇന്ത്യൻ ജനാധിപത്യത്തിന്റെ മാത്രം പ്രത്യേകതയാണ്. ഹിമാലയൻ ഗ്രാമങ്ങളും വിദൂര ദ്വീപുകളും നഗരങ്ങളും കോർത്തിണക്കി ഈ മഹാരാജ്യം നടത്തുന്ന ജനാധിപത്യ മാതൃക ലോകത്തിനാകെ അഭിമാനകരമാണ്.

എന്നാൽ, ഈ മഹായജ്ഞത്തെക്കുറിച്ചുള്ള തെറ്റായ പ്രചാരണങ്ങളും തെരഞ്ഞെടുപ്പ് കമ്മീഷന്റെ 'സ്പെഷ്യൽ ഇന്റൻസീവ് റിവിഷൻ' (എസ്.ഐ.ആർ) നടപടികളെക്കുറിച്ചുള്ള ആശങ്കകളും പലപ്പോഴും ഉയരാറുണ്ട്. വോട്ടർ പട്ടികയിൽ നിന്നും ലക്ഷക്കണക്കിന് പേരെ നീക്കം ചെയ്തു എന്ന തരത്തിലുള്ള ആരോപണങ്ങൾ വരുന്നുണ്ടെങ്കിലും, കാലഹരണപ്പെട്ട വിവരങ്ങൾ ഒഴിവാക്കുന്നതും യോഗ്യരായവരെ നിലനിർത്തുന്നതും തികച്ചും വ്യത്യസ്തമായ രണ്ട് കാര്യങ്ങളാണ്. സുതാര്യമായ വോട്ടർ പട്ടികയിലൂടെ മാത്രമേ നീതിയുക്തമായ തെരഞ്ഞെടുപ്പ് സാധ്യമാകൂ.

രാജ്യത്തെ ജനസംഖ്യാ വളർച്ചയും നിരന്തരമായ കുടിയേറ്റങ്ങളും മരണങ്ങളും വോട്ടർ പട്ടികയുടെ കൃത്യതയെ ബാധിക്കാറുണ്ട്. ഒരു സംസ്ഥാനത്തുനിന്നും മറ്റൊരിടത്തേക്ക് താമസം മാറുന്നവരുടെ പേരുകൾ യഥാസമയം മാറ്റാതിരുന്നാൽ വോട്ടവകാശം നഷ്ടപ്പെടാൻ ഇടയാകും. ഈയൊരു സാഹചര്യത്തിലാണ് എസ്.ഐ.ആർ പോലുള്ള പ്രക്രിയകൾ അനിവാര്യമാകുന്നത്. ഇത് വോട്ടവകാശം നിഷേധിക്കലല്ല, മറിച്ച് യഥാർത്ഥ വോട്ടർമാരുടെ അവകാശങ്ങൾ സംരക്ഷിക്കാനുള്ള നിയമപരമായ നടപടിയാണ്.

ഭരണഘടനയുടെ 324-ാം വകുപ്പും 1950-ലെ ജനപ്രാതിനിധ്യ നിയമവും നൽകുന്ന അധികാരമുപയോഗിച്ചാണ് തെരഞ്ഞെടുപ്പ് കമ്മീഷൻ ഇത്തരം ശുചീകരണ പ്രവർത്തനങ്ങൾ നടപ്പിലാക്കുന്നത്. മരണപ്പെട്ടവർ, മേൽവിലാസം മാറിയവർ എന്നിവരെ ഒഴിവാക്കുകയും പുതിയ വോട്ടർമാരെ ഉൾപ്പെടുത്തുകയും ചെയ്യുന്ന ഈ പ്രക്രിയ പൂർണ്ണമായും സുതാര്യമാണ്. അപ്പീലുകൾക്കും പരാതികൾക്കും കൃത്യമായ അവസരങ്ങൾ നൽകിയതിനുശേഷമേ അന്തിമ നടപടികളിലേക്ക് കടക്കാറുള്ളൂള്ളൂ എന്നതും ശ്രദ്ധേയമാണ്.

ഇന്ത്യയുടെ ഈ തെരഞ്ഞെടുപ്പ് മികവ് ഇന്ന് ലോകത്തിന് തന്നെ മാതൃകയാണ്. നൂറിലധികം രാജ്യങ്ങളിൽ നിന്നുള്ള ആയിരക്കണക്കിന് ഉദ്യോഗസ്ഥരാണ് ഇന്ത്യയിൽ തെരഞ്ഞെടുപ്പ് ഭരണത്തിൽ പരിശീലനം നേടുന്നത്. വോട്ടർമാരുടെ പങ്കാളിത്തവും സുതാര്യതയും ഉറപ്പാക്കുന്നതിലൂടെ ഭാരതം ലോക ജനാധിപത്യത്തിന് പുതിയ മാനങ്ങൾ നൽകുന്നു. എസ്.ഐ.ആർ പോലുള്ള സൂക്ഷ്മപരിശോധനകൾ ജനാധിപത്യത്തിന്റെ ശോഭ കെടുത്തുകയല്ല, മറിച്ച് അതിന്റെ വേരുകൾ കൂടുതൽ ആഴത്തിലുള്ളതാക്കുകയാണ് ചെയ്യുന്നത്.