കാലാവസ്ഥയിലെ മാറ്റങ്ങള്‍ തണുപ്പുള്ള പ്രഭാതങ്ങളും മാറിക്കൊണ്ടിരിക്കുന്ന താപനിലയും ഒപ്പം ഇന്ത്യയിലെ പല ഭാഗങ്ങളിലും വര്‍ദ്ധിച്ചുവരുന്ന വായുമലിനീകരണവുമൊക്കെ അസുഖങ്ങള്‍ കൊണ്ടുവരുന്നു. ഈ സമയത്ത് ജലദോഷം, ഫ്‌ലൂ തുടങ്ങിയ ശ്വാസകോശ സംബന്ധമായ അണുബാധകള്‍ വ്യാപകമാകാന്‍ സാധ്യതയുണ്ട്. കാലാവസ്ഥാ വ്യതിയാനം നേരിട്ട് പ്രതിരോധശേഷിയെ കുറയ്ക്കില്ലെങ്കിലും, അന്തരീക്ഷത്തിലെ വ്യതിയാനങ്ങളും ശ്വാസകോശ വൈറസുകളുമായുള്ള സമ്പര്‍ക്കവും രോഗം വരാനുള്ള സാധ്യത വര്‍ദ്ധിപ്പിക്കുന്നു. അതിനാല്‍, രോഗപ്രതിരോധ ശേഷി വര്‍ദ്ധിപ്പിക്കുന്നതില്‍ സമീകൃതമായ ഭക്ഷണക്രമം വളരെ പ്രധാനപ്പെട്ട പങ്കുവഹിക്കുന്നു. ഒരു പ്രത്യേക ഭക്ഷണത്തിന് മാത്രം അണുബാധകളെ പൂര്‍ണ്ണമായി തടയാനോ പ്രതിരോധശേഷി ഉറപ്പുനല്‍കാനോ കഴിയില്ല. ആരോഗ്യകരമായ ഭക്ഷണരീതികളോടൊപ്പം ആവശ്യത്തിന് ഉറക്കം, പതിവ് വ്യായാമം, കൃത്യമായ ജലപാനം (Hydration) എന്നിവയും ശരിയായി പരിപാലിക്കേണ്ടതുണ്ട്. കാലാവസ്ഥാ മാറ്റ സമയത്ത് നിങ്ങളുടെ പ്രതിരോധശേഷി വര്‍ദ്ധിപ്പിക്കാന്‍ സഹായിക്കുന്ന ചില ഭക്ഷണങ്ങള്‍ താഴെ നല്‍കുന്നു:
1. സിട്രസ് പഴങ്ങള്‍ (Citrus Fruits) - ഓറഞ്ച്, മധുരനാരങ്ങ (Musambi), നെല്ലിക്ക (Amla) തുടങ്ങിയ സിട്രസ് പഴങ്ങളില്‍ വിറ്റാമിന്‍ സി ധാരാളമായി അടങ്ങിയിട്ടുണ്ട്. ഇത് പ്രതിരോധസംവിധാനത്തെ ശക്തിപ്പെടുത്താനും അണുബാധകള്‍ക്കെതിരെ പോരാടാനും സഹായിക്കുന്നു. തണുപ്പ് കൂടുമ്പോള്‍ വിറ്റാമിന്‍ സി അടങ്ങിയ ഭക്ഷണങ്ങള്‍ കഴിക്കുന്നത് ശ്വേതരക്താണുക്കളുടെ (White Blood Cells) ഉത്പാദനവും പ്രവര്‍ത്തനവും മെച്ചപ്പെടുത്തും. ഇത് കോശങ്ങളെ ഫ്രീ റാഡിക്കലുകള്‍ ഉണ്ടാക്കുന്ന ഓക്‌സിഡേറ്റീവ് നാശത്തില്‍ നിന്ന് സംരക്ഷിക്കുകയും ചെയ്യുന്നു.
2. പച്ചക്കറികളും ചീരവര്‍ഗ്ഗങ്ങളും (Green Leafy Vegetables) - ഭക്ഷണത്തില്‍ പച്ചക്കറികളും ചീരവര്‍ഗ്ഗങ്ങളും ഉള്‍പ്പെടുത്താന്‍ ഏറ്റവും അനുയോജ്യമായ സമയമാണിത്. ചീര, കടുക് ഇല (Mustard Greens), ഉലുവയില (Fenugreek) എന്നിവ പ്രതിരോധശേഷിക്ക് ആവശ്യമായ വിറ്റാമിനുകളും ആന്റിഓക്സിഡന്റുകളും നല്‍കുന്നു. ഉദാഹരണത്തിന്, ചീരയിലെ വിറ്റാമിന്‍ എ ചര്‍മ്മത്തിന്റെയും ശ്വാസകോശ പാതയുടെയും (Respiratory tract) ആരോഗ്യം നിലനിര്‍ത്താന്‍ സഹായിക്കുന്നു.
3. അണ്ടിപ്പരിപ്പുകളും വിത്തുകളും (Nuts And Seeds) - ബദാം, വാള്‍നട്ട്, മത്തങ്ങ വിത്തുകള്‍ (Pumpkin seeds) എന്നിവ തണുപ്പുകാലത്ത് ഭക്ഷണത്തില്‍ ഉള്‍പ്പെടുത്തുന്നത് നല്ലതാണ്. ഇവയില്‍ നല്ല കൊഴുപ്പ്, പ്രോട്ടീന്‍, വിറ്റാമിന്‍ ഇ, സിങ്ക് തുടങ്ങിയ ധാതുക്കള്‍ അടങ്ങിയിട്ടുണ്ട്. ബദാമിലെ വിറ്റാമിന്‍ ഇ കോശങ്ങളെ സംരക്ഷിക്കുമ്പോള്‍, മത്തങ്ങ വിത്തുകളിലെ സിങ്ക് പ്രതിരോധ കോശങ്ങള്‍ക്ക് അത്യാവശ്യമാണ്. വാള്‍നട്ടില്‍ അടങ്ങിയിരിക്കുന്ന ഒമേഗ-3 ഫBooleanField കൊഴുപ്പുകള്‍ ശരീരത്തിന് ഏറെ ഗുണകരമാണ്.
4. ഇഞ്ചിയും വെളുത്തുള്ളിയും (Ginger And Garlic) - ഇന്ത്യന്‍ പാചകത്തില്‍ സാധാരണയായി ഉപയോഗിക്കുന്ന ഇഞ്ചിയും വെളുത്തുള്ളിയും രുചിക്കൊപ്പം മികച്ച പോഷകഗുണങ്ങളും നല്‍കുന്നു. ഇഞ്ചിയില്‍ അടങ്ങിയിരിക്കുന്ന 'ജിഞ്ചറോള്‍' (Gingerols) എന്ന സംയുക്തത്തിന് ആന്റിഓക്സിഡന്റ്, ആന്റി-ഇന്‍ഫ്‌ലമേറ്ററി ഗുണങ്ങളുണ്ട്. വെളുത്തുള്ളിയിലെ 'അല്ലിസിന്‍' (Allicin), സള്‍ഫര്‍ സംയുക്തങ്ങള്‍ എന്നിവ പ്രതിരോധശേഷി വര്‍ദ്ധിപ്പിക്കാന്‍ സഹായിക്കുന്നു.
5. തൈരും മറ്റ് ഫെര്‍മെന്റഡ് ഭക്ഷണങ്ങളും (Curd And Fermented Foods) - തൈര് പ്രോട്ടീന്‍, കാല്‍സ്യം, ശരീരത്തിന് ഗുണകരമായ ബാക്ടീരിയകള്‍ (Probiotics) എന്നിവ നല്‍കുന്നു. കുടലിലെ നല്ല ബാക്ടീരിയകളുടെ സന്തുലിതാവസ്ഥ നിലനിര്‍ത്താന്‍ ഇത് സഹായിക്കും. ശരീരത്തിന്റെ പ്രതിരോധസംവിധാനത്തില്‍ കുടലിന്റെ ആരോഗ്യം വളരെ പ്രധാനപ്പെട്ടതായതിനാല്‍, തൈര്, ഇഡ്ഡലി, ദോശ തുടങ്ങിയ പുളിപ്പിച്ച ഭക്ഷണങ്ങള്‍ ഡയറ്റില്‍ ഉള്‍പ്പെടുത്തുന്നത് നല്ലതാണ്.
6. മുട്ടയും മറ്റ് പ്രോട്ടീന്‍ സമൃദ്ധമായ ഭക്ഷണങ്ങളും (Eggs And Protein-Rich Foods) - ശരീര കോശങ്ങളുടെ പുനര്‍നിര്‍മ്മാണത്തിനും ആന്റിബോഡികളുടെ ഉത്പാദനത്തിനും പ്രോട്ടീന്‍ അത്യന്താപേക്ഷിതമാണ്. പഴങ്ങള്‍ക്കും പച്ചക്കറികള്‍ക്കും പുറമെ ആവശ്യത്തിന് പ്രോട്ടീന്‍ ലഭിക്കുന്നുണ്ടെന്ന് ഉറപ്പാക്കണം. മുട്ടയില്‍ ഉയര്‍ന്ന ഗുണനിലവാരമുള്ള പ്രോട്ടീനും വിറ്റാമിന്‍ ബി12, സെലിനിയം എന്നിവയും അടങ്ങിയിരിക്കുന്നു. മസൂര്‍ പരിപ്പ്, ചെറുപയര്‍, കടല, പനീര്‍, പാല്‍, സോയ ഉല്‍പ്പന്നങ്ങള്‍ എന്നിവയില്‍ നിന്നും സസ്യഭുക്കുകള്‍ക്ക് പ്രോട്ടീന്‍ ലഭിക്കും. മീനും കൊഴുപ്പ് കുറഞ്ഞ ഇറച്ചിയും (Lean Meat) പ്രോട്ടീന്റെ നല്ല സ്രോതസ്സുകളാണ്.
7. മധുരക്കിഴങ്ങ്, കാരറ്റ് എന്നിവ (Sweet Potatoes, Carrots & Seasonal Vegetables) - മധുരക്കിഴങ്ങിലും കാരറ്റിലും ബീറ്റാ കരോട്ടിന്‍ ധാരാളമായി അടങ്ങിയിട്ടുണ്ട്. ശരീരം ഇതിനെ വിറ്റാമിന്‍ എ ആക്കി മാറ്റുന്നു. മൂക്ക്, തൊണ്ട, ശ്വാസകോശം എന്നിവയുടെ ആന്തരിക പാളികളെ വിറ്റാമിന്‍ എ സംരക്ഷിക്കുകയും ഹാനികരമായ രോഗാണുക്കള്‍ ശരീരത്തില്‍ പ്രവേശിക്കുന്നത് തടയുകയും ചെയ്യുന്നു. കാരറ്റിലെ നാരുകളും മധുരക്കിഴങ്ങിലെ കാര്‍ബോഹൈഡ്രേറ്റുകളും ശരീരത്തിന് ഊര്‍ജ്ജവും ഉന്മേഷവും നല്‍കുന്നു. മത്തങ്ങ പോലുള്ള മറ്റ് പച്ചക്കറികളും ഭക്ഷണക്രമത്തില്‍ ഉള്‍പ്പെടുത്താവുന്നതാണ്.
Comments