നടക്കുമ്പോള്‍ വേദനിക്കുന്ന കാല്‍മുട്ട്, രാവിലെ എഴുന്നേല്‍ക്കുമ്പോള്‍ വടിയതുപോലെ തോന്നുന്ന കണങ്കാല്‍, ജിമ്മില്‍ തിരികെ പ്രവേശിച്ചപ്പോള്‍ വേദനിക്കാന്‍ തുടങ്ങുന്ന തോള്‍സന്ധി. വര്‍ഷങ്ങള്‍ക്ക് മുന്‍പ് നിങ്ങള്‍ക്ക് ഒരു സ്‌പോര്‍ട്‌സ് പരുക്കേറ്റിട്ടുണ്ടെങ്കില്‍, അന്നത്തെ ആ സംഭവവുമായി യാതൊരു ബന്ധവുമില്ലാത്തതായി തോന്നുമായിരിക്കും ഈ ലക്ഷണമൊക്കെ. എന്നാല്‍ ചില സന്ദര്‍ഭങ്ങളില്‍, ഇവ രണ്ടും തമ്മില്‍ ബന്ധമുണ്ടായിരിക്കാം. ഒരു പഴയ പരുക്കിന്, ഒരു സന്ധി ചലിക്കുന്ന വിധത്തിലോ ഭാരം താങ്ങുന്നതിലോ ശാരീരിക പ്രവര്‍ത്തനങ്ങളോട് പ്രതികരിക്കുന്നതിലോ മാറ്റം വരുത്താന്‍ സാധിക്കും. തുടക്കത്തിലുണ്ടായിരുന്ന വേദന അപ്രത്യക്ഷമായിട്ടുണ്ടാകാം, എന്നിരുന്നാലും തരുണാസ്ഥികള്‍ (cartilage), ലിഗമെന്റുകള്‍ അല്ലെങ്കില്‍ മറ്റ് ഭാഗങ്ങള്‍ എന്നിവയ്ക്കുണ്ടായ കേടുപാടുകള്‍ കാരണം കാലക്രമേണ സന്ധി കൂടുതല്‍ ദുര്‍ബലമായി മാറിയേക്കാം.
ഒരു പഴയ പരുക്ക് വീണ്ടും പ്രത്യക്ഷപ്പെടുന്നത് എന്തുകൊണ്ട്?
പ്രധാനപ്പെട്ട ഒരു ലിഗമെന്റ് പരുക്ക്, തരുണാസ്ഥിക്ക് സംഭവിക്കുന്ന പരുക്ക്, എല്ലുപൊട്ടല്‍ അല്ലെങ്കില്‍ സന്ധികള്‍ക്ക് ആവര്‍ത്തിക്കപ്പെടുന്ന ആഘാതം എന്നിവയെല്ലാം ഒരു സന്ധിയിലൂടെ ബലം കടന്നുപോകുന്ന രീതിയെ ബാധിച്ചേക്കാം. നിങ്ങള്‍ സാധാരണ രീതിയിലുള്ള ചലനങ്ങള്‍ വീണ്ടെടുത്താല്‍ പോലും, പരുക്കിന് മുന്‍പുണ്ടായിരുന്നതുപോലെ സന്ധി കൃത്യമായി പ്രവര്‍ത്തിക്കണമെന്നില്ല.
ഇതിന് ഏറ്റവും മികച്ച ഉദാഹരണമാണ് കാല്‍മുട്ട്. മുന്‍ ക്രൂസിയേറ്റ് ലിഗ്‌മെന്റ് (ACL) പരുക്കേറ്റ ആളുകള്‍ക്ക് പില്‍ക്കാലത്ത് കാല്‍മുട്ടില്‍ ഓസ്റ്റിയോ ആര്‍ത്രൈറ്റിസ് (knee osteoarthritis) വരാനുള്ള സാധ്യത കൂടുതലാണെന്ന് ഗവേഷണങ്ങള്‍ കണ്ടെത്തിയിട്ടുണ്ട്. മെനിസ്‌കസ് (meniscus) പരുക്കുകളും ഈ സാധ്യത വര്‍ദ്ധിപ്പിക്കും, പ്രത്യേകിച്ചും ഇത് ലിഗമെന്റ് തകരാറുമായോ ശസ്ത്രക്രിയയുമായോ ഒത്തുവരുമ്പോള്‍.
അതുകൊണ്ടുതന്നെ, നിങ്ങള്‍ വര്‍ഷങ്ങളോളം പ്രശ്‌നങ്ങളൊന്നുമില്ലാതെ കഴിഞ്ഞേക്കാം, എന്നാല്‍ നിങ്ങളുടെ ശാരീരിക പ്രവര്‍ത്തനങ്ങള്‍ വര്‍ദ്ധിക്കുമ്പോള്‍ വേദന അനുഭവപ്പെടാം. നിങ്ങള്‍ വീണ്ടും ഓടാന്‍ തുടങ്ങുമ്പോഴോ, പുതിയൊരു കളിയില്‍ ഏര്‍പ്പെടുമ്പോഴോ, ശരീരഭാരം വര്‍ദ്ധിക്കുമ്പോഴോ, അതല്ലെങ്കില്‍ കൂടുതല്‍ സമയം പടികള്‍ കയറുമ്പോഴോ ഈ പ്രശ്‌നം പ്രകടമായേക്കാം.
പരുക്ക് നിങ്ങളുടെ ചലനരീതിയെ മാറ്റിയിട്ടുണ്ടാകാം
ഒരു പരുക്കിന് ശേഷം, നിങ്ങളുടെ ശരീരം പലപ്പോഴും നിങ്ങള്‍ അറിയാതെ തന്നെ അതിനോട് പൊരുത്തപ്പെടുന്നു. നിങ്ങള്‍ ഒരു കാലില്‍ അല്പം കൂടുതല്‍ ഭാരം നല്‍കുകയോ, സന്ധി പൂര്‍ണ്ണമായി മടക്കാതിരിക്കുകയോ, അല്ലെങ്കില്‍ മറ്റൊരു പേശി വിഭാഗത്തെ കൂടുതല്‍ ആശ്രയിക്കുകയോ ചെയ്‌തേക്കാം.
ഈ മാറ്റങ്ങള്‍ പിന്നീട് ശീലമായി മാറിയേക്കാം. ഉദാഹരണത്തിന്, കണങ്കാലിലെ ഉളുക്കിന് ശേഷം, നീരും വേദനയും മാറിയാലും നിങ്ങളുടെ കണങ്കാലിന്റെ ചലനശേഷി കുറവായിരിക്കുകയോ അല്ലെങ്കില്‍ ബാലന്‍സ് കുറഞ്ഞിരിക്കുകയോ ചെയ്യാം. ഇത് നടക്കുമ്പോഴോ വ്യായാമം ചെയ്യുമ്പോഴോ നിങ്ങളുടെ കാല്‍മുട്ടും ഇടുപ്പും ചലിക്കുന്ന രീതിയെ ബാധിക്കാം.
ഇതുകൊണ്ടാണ് വേദനരഹിതമായിരിക്കുന്നത് എന്നത് സന്ധി പൂര്‍ണ്ണമായും അതിന്റെ പഴയ പ്രവര്‍ത്തനരീതിയിലേക്ക് മടങ്ങിയെത്തി എന്നതിന്റെ അര്‍ത്ഥമാക്കാത്തത്.
നിങ്ങള്‍ എപ്പോഴാണ് ശ്രദ്ധിക്കേണ്ടത്?
മുന്‍പത്തെ പരുക്കിന്റെ ഫലമായി ഉണ്ടാകുകയും, ഒരേ പ്രവര്‍ത്തനങ്ങളില്‍ തന്നെ വീണ്ടും വീണ്ടും പ്രത്യക്ഷപ്പെടുകയും ചെയ്യുന്ന സന്ധിയിലെ വേദന കൂടുതല്‍ ശ്രദ്ധ അര്‍ഹിക്കുന്നു.
വ്യായാമത്തിനു ശേഷമുള്ള നീര്, നീണ്ടുനില്‍ക്കുന്ന കാഠിന്യം അല്ലെങ്കില്‍ മരവിപ്പ്, സന്ധി പിടിച്ചിരിക്കുകയോ ലോക്കാവുകയോ ചെയ്യുക, സന്ധി ഇടയ്ക്കിടെ വഴുതിപ്പോകുക, ചലനശേഷി കുറയുക, അല്ലെങ്കില്‍ വേദന ക്രമേണ എളുപ്പത്തില്‍ വരാന്‍ തുടങ്ങുക തുടങ്ങിയ ലക്ഷണങ്ങള്‍ ശ്രദ്ധിക്കുക.
ഇതിന്റെ പാറ്റേണും പ്രധാനമാണ്. നിങ്ങള്‍ മൂന്ന് കിലോമീറ്റര്‍ ഓടുമ്പോഴെല്ലാം കാല്‍മുട്ട് വേദനിക്കുകയോ, അല്ലെങ്കില്‍ ബാഡ്മിന്റണ്‍ ദീര്‍ഘനേരം കളിച്ചതിനു ശേഷം കണങ്കാല്‍ വീര്‍ക്കുകയോ ചെയ്യുകയാണെങ്കില്‍, അത് ശ്രദ്ധിച്ചു വെക്കുക. നിങ്ങളുടെ പ്രവര്‍ത്തനം, അതിന്റെ ദൈര്‍ഘ്യം, വേദന, നീര് എന്നിവയെക്കുറിച്ചുള്ള വിവരങ്ങള്‍ ഡോക്ടര്‍ക്ക് വളരെ പ്രയോജനപ്രദമാകും. വര്‍ദ്ധിച്ചുവരുന്ന വേദന പ്രായമാകുന്നതിന്റെ സ്വാഭാവിക ലക്ഷണം മാത്രമാണെന്ന് കരുതി തള്ളിക്കളയരുത്.
ആവര്‍ത്തിച്ചുള്ള നീര് അവഗണിക്കരുത്
വ്യായാമത്തിനു ശേഷമുള്ള നീര് സന്ധിക്കുള്ളിലെ അസ്വസ്ഥതകളെ സൂചിപ്പിക്കാം. നിരന്തരമായതോ ആവര്‍ത്തിക്കപ്പെടുന്നതോ ആയ നീര്, പ്രത്യേകിച്ച് സന്ധി ലോക്കാവുക, സ്ഥിരതയില്ലായ്മ അല്ലെങ്കില്‍ കഠിനമായ വേദന എന്നിവയ്ക്കൊപ്പമാണെങ്കില്‍, തീര്‍ച്ചയായും പരിശോധന നടത്തേണ്ടതാണ്.
നിങ്ങള്‍ക്ക് ആദ്യം ഒരു ഫിസിക്കല്‍ പരിശോധന ആവശ്യമായി വന്നേക്കാം. നിങ്ങളുടെ ലക്ഷണങ്ങളും പരുക്കുകളുടെ ചരിത്രവും അടിസ്ഥാനമാക്കി, ഡോക്ടര്‍ എക്‌സ്-റേയോ മറ്റ് പരിശോധനകളോ ശുപാര്‍ശ ചെയ്‌തേക്കാം. പഴയൊരു സ്‌പോര്‍ട്‌സ് പരുക്കുണ്ട് എന്നതുകൊണ്ട് മാത്രം നിങ്ങള്‍ക്ക് എം.ആര്‍.ഐ (MRI) പരിശോധനയോ ശസ്ത്രക്രിയയോ വേണമെന്നില്ല. സന്ധിയില്‍ നിലവില്‍ എന്താണ് സംഭവിക്കുന്നത് എന്നതിനെ ആശ്രയിച്ചിരിക്കും അനുയോജ്യമായ പരിശോധന.
Comments