സൗദിയിൽ സഖ്യസേനയുടെ ഹെലികോപ്റ്റർ തകർന്നുവീണു; രണ്ട് ക്രൂ അംഗങ്ങൾ ​കൊല്ലപ്പെട്ടു

റിയാദ്: സൗദി അറേബ്യയിലെ നജ്റാനിൽ സഖ്യസേനയുടെ നിരീക്ഷണ ഹെലികോപ്റ്റർ തകർന്നുവീണ് രണ്ട് പേർ മരിച്ചു. ഹെലികോപ്റ്ററിലുണ്ടായിരുന്ന രണ്ട് ക്രൂ അംഗങ്ങളാണ് കൊല്ലപ്പെട്ടത്. എ.എച്ച്.-6ഐ വിഭാഗത്തിൽപ്പെട്ട ഹെലികോപ്റ്ററാണ് സൗദി അതിർത്തിക്കുള്ളിൽ തകർന്നുവീണത്. യെമൻ അതിർത്തിയോട് ചേർന്നുകിടക്കുന്ന പ്രദേശമാണ് നജ്റാൻ.

സാങ്കേതിക തകരാറാണ് അപകടത്തിന് കാരണമെന്നാണ് സഖ്യസേന വക്താവ് തുർക്കി അൽ മാലിക്കി അറിയിച്ചത്. ഹെലികോപ്റ്റർ തകർന്നുവീണത് സാങ്കേതിക തകരാറിനെത്തുടർന്നാണെന്ന് അദ്ദേഹം സാമൂഹിക മാധ്യമമായ എക്സിലൂടെയും വ്യക്തമാക്കി. ഹൂതി വിമതർ നിരന്തരം ആക്രമണം നടത്തിവരുന്ന പ്രദേശങ്ങളിലൊന്നാണ് നജ്റാൻ.

അതിനിടെ, ഞായറാഴ്ച രാവിലെ ഖമീസ് മുഷൈത്തിനുനേരെ തൊടുത്ത രണ്ട് മിസൈലുകളും റിയാദ് ലക്ഷ്യമിട്ടെത്തിയ ഒരു ഡ്രോണും സൗദി സഖ്യസേനയുടെ വ്യോമ പ്രതിരോധ വിഭാഗം തടഞ്ഞ് നശിപ്പിച്ചതായും തുർക്കി അൽ മാലിക്കി അറിയിച്ചു. മേഖലയിൽ സുരക്ഷാ സംഘർഷം തുടരുന്നതിനിടെയാണ് ഹെലികോപ്റ്റർ അപകടവും മിസൈൽ, ഡ്രോൺ ആക്രമണശ്രമങ്ങളും റിപ്പോർട്ട് ചെയ്തിരിക്കുന്നത്.